Mensahe ti Umuna a Panguluen, Agosto 2017
Ti Panagbiag a kas iti maysa a Disipulo
Tallupulo a tawen ti napalabas idiay Ghana, simrek ti maysa a balasitang nga estudiante iti kolehio nga agnagan iti Doe iti maysa nga LDS meetinghouse iti umuna a gundaway. Inawis ti maysa a gayyem ni Doe a kumuyog kenkuana, ket naregget ni Doe a mangammo no ania ti kalalanga ti Simbaan.
Nasayaat ken mannakigayyem dagiti tao idiay a gapu ti nagsiddaawanna, “Ania a kita ti simbaan daytoy?”
Naawis unay ti rikna ni Doe isu nga inkeddengna ti mangadal iti ad-adu pay maipapan ti Simbaan ken dagiti taona, a napno iti aglaplapusanan a rag-o. Ngem apaman nga iruginan ti mangadal kadagitoy, nangrugi a sumuppiat iti panagsukisokna ti dadduma a miembro ti pamiliana ken dagiti gagayyemna nga agkalikagum iti pagsayaatanna. Pinadpadakesda ti Simbaan ket inaramidda ti amin a kabaelanda a manguyot kenkuana tapno saan a dumngeg.
Ngem nakaawat ni Doe iti maysa a pammaneknek.
Addaan isuna iti pammati, ket ipatpategna ti ebanghelio, a mangpumpunno iti biagna iti rag-o. Ket iti kamaudiananna, nagpabuniag isuna.
Kalpasanna, inraremna ti bagina iti panagadal ken panagkararag. Nagayuno isuna ken kinalikagumanna a maaddaan iti impluensia ti Espiritu Santo iti biagna. Kas bungana, pimmigsa ken immuneg ti pammaneknek ni Doe. Idi agangay, inkeddengna ti agserbi iti full-time mission para iti Apo.
Kalpasan ti panagsublina manipud iti panagserbina iti mision, kina-date ken inkallaysana ti maysa a nakapagsublin iti misionna—ti isu met la a tao a nangbuniag kenkuana idi—ket idi agangay nailantipda iti Johannesburg South Africa Temple.
Naglabas ti adu a tawen manipud pay idi umuna a napadasan ni Doe Kaku ti rag-o ti ebanghelio ni Jesucristo. Kabayatan dayta a panawen, saan a kanayon a makaay-ayo ti panagbiag para kenkuana. Inibturanna ti panagladingit ken pannakapaay, agraman ti ipupusay ti dua nga annakna—nadagsen pay laeng iti kaungganna ti nalaus a panagleddaang a gapu kadagita a padasna.
Ngem inkarigatanda iti asawana, ni Anthony, ti aginnasideg iti tunggal maysa ken iti ay-ayaten a Nailangitan nga Amada, nga ay-ayatenda iti amin a pusoda.
Ita, 30 a tawen kalpasan ti panagbuniagna, itay kallabes, naileppas ni Sister Kaku ti sabali pay a full-time mission—itoy a gundaway nakipagserbi iti asawana, a maysa a mission president iti Nigeria.
Kuna dagiti makam-ammo ken ni Sister Kaku, nga adda maysa a naisangsangayan a banag maipapan kenkuana. Naragsak isuna. Narigat a bubosen ti orasmo kenkuana no saanka a naragragsak mismo.
Awan duadua ti pammaneknekna: “Ammok nga ibilangnak ti Mangisalakan kas anak ken gayyemna (kitaen iti Mosiah 5:7; Ether 3:14),” kinunana. “Ken ad-adalek ken ikarkarigatak unay tapno agbalinak met a gayyemna—saan laeng a babaen ti panagsaok no di ketdi babaen pay ti panagaramidko.”
Datayo dagiti Disipulo
Maipada ti estoria ni Sister Kaku iti estoria ti adu a dadduma pay. Adda tarigagayna a mangammo iti kinapudno, inkarigatanna ti manggun-od iti naespirituan a pannakaawat, impakitana ti ayatna iti Dios ken iti padana a tao, ket iti panangaramidna napasaranna dagiti panagrigrigat ken panagleddaang.
Ngem iti baet ti pagsusupadian, ken panagleddaang, nagtalinaed a dimmur-as isuna iti pammati. Ket pinagtalinaedna ti rag-ona kas iti kapateg ti panangpatalinaedna iti pammatina. Nakasarak isuna iti wagas saan laeng a tapno agibtur kadagiti rigat no di ketdi pay tapno dumur-as a nespirituan iti baet dagitoy!
Maipada ti estoriana kadakayo ken kaniak.
Manmano a nalinis ti dalantayo wenno awanan iti pannubok.
Addaan ti tunggal maysa kadatayo kadagiti pakaburiboran, pannakapaay, ken panagleddaang.
Mabalin a mariknatayo pay ti kinaawan namnama ken no dadduma makatalipupos.”
Ngem dagiti agbiag a kas iti “panagbiag ti maysa a disipulo—nga agtalinaed a napudno ken agtalinaed a dumur-as iti pammati; nga agtalek iti Dios ken agtungpal kadagiti bilinna;1 nga agbiag iti ebanghelio iti inaldaw ken minuto; a mangted iti serbisio a kas ken ni Cristo kadagiti adda iti aglawlawda, maysa nga aramid iti maminsan—isuda dagiti addaan babassit nga aramid a masansan a makaaramid iti dakkel a pagdumaan.
Dagiti nasaysayaat bassit, dagiti ad-adda a managpakawan bassit, ken naas-asi ti aprosna ket isu dagiti manangngaasi nga umawatto iti kaasi.2 Dagiti mangaramid iti daytoy a lubong a maysa a nasaysayaat a lugar, babaen ti panangaramid iti panagkikinnaasi ken panaggiinnayat, ken asino man nga agkagumaan nga agbiag iti naparaburan, napennek, ken natalna a panagbiag kas iti panagbiag ti maysa a disipulo ni Jesucristo ket isu dagiti makasarakto iti rag-o iti kamaudianan.
Ammodanto a “ti ayat ti Dios, a nangyagsep iti bagina kadagiti puso ti annak dagiti tao … ti kangrunaan a matarigagayan iti amin a banag … ken ti kangrunaan a makaparag-o iti kaunggan.”3
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, August 2017. Ilokano. 97928 864