Cov Mus Saib Xyuas Tom Tsev tsab Xov, Yim Hli Ntuj 2017
Kev Ua Neej Fij Siab
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas Vajtswv cov ntxhais to taub lub hom phiaj ntawm lub Koom Haum Niam Tsev yuav npaj lawv li cas kom txais tau cov koob hmoov ntawm txoj sia nyob mus ib txhis?
Kev Ntseeg Tsev Neeg Kev Pab
Txwj Laug D. Todd Christofferson los ntawm Pawg Kaum Ob tug Thwj Tim hais tias, “Kev muab fij tseg txhais hais tias yus muab ib yam dab tsi tsa los yog fij tseg ua ib yam dawb ceev, uas siv kom ua tej yam dawb huv. Yuav vam meej hauv lub neej no tiag tiag thaum peb muab peb lub neej, uas yog peb txoj kev siv sij hawm thiab tej yam peb xaiv, fij tseg rau Vajtswv tej lub hom phiaj.”1
Txwj Laug Neal A. Maxwell (1926–2004) los ntawm Pawg Kaum Ob tug Thwj Tim hais tias, “Peb pheej xav hais tias kev muab fij tseg yeej yog kev ywj peb tej khoom ntawm lub ntiaj teb no, thaum Vajtswv hais kom ua li ntawd xwb. Tiam sis kev muab fij tseg tiag tiag yog kev muab yus tus kheej rau Vajtswv.”2
Thaum peb muab peb tus kheej fij tseg rau Vajtswv tej lub hom phiaj, peb txoj kev ntseeg Yexus Khetos thiab Nws txoj Kev Theej Txhoj yuav loj tuaj. Thaum peb muab peb lub neej fij tseg, tej yam peb ua li ntawd yuav ua rau peb hloov ua neeg dawb huv.
Carole M. Stephens, Pab Cuam thib ib nyob hauv lub Koom Haum Niam Tsev Pawg Thawj Tswj Hwm, hais tias: “Txwj Laug Robert D. Hales qhia tias, ‘Thaum peb khi thiab khaws peb tej lus khi, ces peb tso lub nitaj teb tseg thiab nkag mus rau hauv Vajtswv lub nceeg vaj lawm.’
“Peb tau pauv. Peb zoo txawv, thiab peb coj txawv lawm. Tej yam uas peb mloog thiab nyeem thiab hais yeej txawv thiab tej ris tsho uas peb hnav yuav txawv vim peb ua Vajtswv cov ntxhais thiab khi lus rau Nws lawm.”3
Kev muab fij tseg yog kev khi lus uas Vajtswv khi nrog “tsev neeg Ixayees li no: Kuv yuav ua kom lawv nco ntsoov kuv tej kev cai rau nruab siab. Kuv yuav ua lawv tus Vajtswv thiab lawv yuav ua kuv haiv neeg” (Yelemis 31:33). Kev ua neej uas tau muab fij tseg rau Vajtswv yeej muaj raws li Vajtswv txoj hau kev rau peb.
Vaj Lug Kub Ntxiv
1 Thexalaunikes 1:3; Lus Qhuab Qhia thiab Kev Khi Lus 105:5;
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/17. Pub txhais ua lus Hmoob: 6/17. Kev txhais Visiting Teaching Message, August 2017. Hmong. 97928 295