Thawj Pawg Thawj Tswj Hwm tsab Xov, Yim Hli Ntuj 2017
Ib tug Thwj Tim lub Neej
Peb caug xyoos dhau los nyob hauv Ghana, yog thawj zaug uas ib tug ntxhais kawm ntawv qib siab hu ua Doe nkag mus rau hauv ib lub tsev sib ntsib LDS. Ib tug phooj ywg twb caw Doe nrog nws mus, thiab Doe xav paub tias lub Koom Txoos no zoo li cas.
Cov neeg nyob ntawd twb ua siab dawb siab zoo rau nws ua rau nws xav paub seb hais tias, “Lub koom txoos no yog dab tsi?”
Ua rau Doe txais kev tshoov siab heev nws thiaj li txiav txim siab kawm ntxiv txog lub Koom Txoos thiab cov neeg nyob haud, cov neeg uas muaj kev xyiv fab heev. Tiam sis thaum nws pib kawm, nws tsev neeg thiab cov phooj ywg uas txhawj txog nws pib tawm tsam nws txhua lub sij hawm. Lawv hais tej yam phem phem txog lub Koom Txoos thiab ua txhua yam lawv ua tau kom nws tsis txhob koom lub Koom Txoos.
Tiam sis Doe twb muaj ib zaj lus tim khawv lawm.
Nws muaj kev ntseeg, thiab nws nyiam txoj moo zoo no, uas ua rau nws lub neej muaj kev xyiv fab. Yog li ntawd, nws thiaj li ua kev cai raus dej.
Tom qab ntawd, nws cia li kawm vaj lug kub thiab thov Vajtswv tas li. Nws yoo mov thiab nrhiav tus Vaj Ntsuj Plig Dawb Huv tej kev tshoov siab hauv nws lub neej. Yog li ntawd, Doe zaj lus tim khawv thiab txoj kev ntseeg loj tuaj thiab muaj zog tuaj. Ces nws txiav txim siab ua ib tug ntxhais txib rau tus Tswv.
Tom qab nws ua ntxhais txib lawm, nws tham thiab yuav ib tug tub txib uas tau rov qab los tsev lawm—yog tib tug uas tau muab nws ua kev cai raus dej ntau xyoo tas los—thiab nkawd ua kev sib khi nyob hauv lub Tuam Tsev Johannesburg South Africa.
Ntau xyoo twb dhau los lawm txij thaum Doe Kaku pib muaj kev xyiv fab los ntawm Yexus Khetos txoj moo zoo. Thaum lub sij hawm ntawd, tsis yog nws muaj lub neej zoo txhua lub sij hawm. Nws twb raug tej kev nyuaj siab thiab kev poob siab, tsis hais qhov uas nws xiam ob tug me nyuam—kev tu siab kawg los ntawm tej xwm txheej no tseem ua rau nws muaj kev nyuaj siab heev.
Tiam sis nws thiab nws tus txiv, Anthony, twb siv zog koom siab koom ntsws thiab koom ua ke nrog nkawd Leej Txiv Saum Ntuj Ceeb Tsheej, tus uas nkawd hlub kawg siab kawg ntsws.
Hnub no, 30 xyoo tom qab nws ua kev cai raus dej, tsis ntev tas los Muam Kaku twb rov qab los tom qab nws ua ib tug ntxhais txib ib zaug dua—lub sij hawm no nws tus txiv, uas yog qhov chaw tshaj tawm txoj moo zoo tus thawj tswj hwm nyob hauv Nigeria, nrog nws mus.
Cov uas paub Muam Kaku hais tias nws muaj ib yam dab tsi tshwj xeeb. Nws ci ntsa iab heev. Thaum yus siv sij hawm nrog nws ua rau yus yeej zoo siab dua li qub.
Nws zaj lus tim khawv yeej ruaj khov: Nws hais tias, “Kuv paub tus Cawm Seej saib kuv zoo li Nws tus ntxhais thiab phooj ywg (saib Mauxiyas 5:7; Ethaws 3:14). Thiab kuv kawm thiab siv zog ua Nws tus phooj ywg thiab—tsis yog los ntawm tej yam kuv hais xwb tiam sis kuj yog los ntawm tej yam kuv ua.”
Peb Yog cov Thwj Tim
Muam Kaku zaj yeej zoo li lwm tus zaj thiab. Nws xav paub qhov tseeb, nws twb them tus nqi kom tau txoj kev kaj ntawm sab ntsuj plig, nws qhia tias nws hlub Vajtswv thiab nws cov neeg zej zog, thiab thaum nws ua neej nws raug tej yam uas nyuaj thiab kev tu siab.
Tiam sis txawm nws raug xwm txheej dab tsi, txawm nws tu siab npaum li cas los, nws tseem muaj kev ntseeg mus tom ntej. Thiab qhov tseem ceeb heev, nws tseem muaj kev xyiv fab. Nws nrhiav ib txoj kev kom tiv tau tej kev txom nyem ntawm lub neej no thiab muaj ib lub neej zoo txawm yog nws raug tej xwm txheej ntawd!
Nws zaj yeej zoo li nej thiab kuv zaj.
Peb lub neej yeej yog ib lub neej uas nyuaj thiab muaj kev sim siab.
Peb txhua tus muaj kev nyuaj siab, kev poob siab, kev tu siab.
Tej lub sij hawm ua rau peb ntshai thiab ntxhov siab heev.
Tiam sis cov uas ua neej zoo li ib tug thwj tim—cov uas rau siab ntseeg thiab muaj kev ntseeg mus tom ntej; cov uas tso siab rau Vajtswv thiab ua raws li Nws cov lus txib;1 cov uas ua raws li txoj moo zoo txhua hnub thiab txhua lub sij hawm; cov uas pab tib neeg nyob ib puag ncig lawv zoo li Khetos, ua ib qho zoo rau ib lub sij hawm—yog cov uas ua tej yam me me uas pab tau ntau kawg.
Cov uas ua siab zoo ntxiv, zam txim me ntsis ntxiv, thiab muaj kev siab hlub me ntsis ntxiv yog cov uas yuav txais tau kev siab hlub.2 Cov uas pab neeg ntiaj teb kom lawv ua zoo dua, los ntawm lawv tej kev saib xyuas thiab txoj kev hlub, thiab cov uas siv zog ua neej kaj siab, txaus siab, thiab tau koob hmoov zoo li ib tug thwj tim ntawm Yexus Khetos yog cov uas yuav tau kev xyiv fab thaum kawg.
Cov no yuav paub tias “kev hlub los ntawm Vajtswv, uas tau nthuav kom dav rau txhua txhia qhov chaw nyob rau hauv noob neej tej siab tej ntsws … yog yam uas xav tau tshaj plaws txhua txhia yam huv tib si … thiab qhov kev zoo siab tshaj plaws rau tus ntsuj plig.”3
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/17. Pub txhais ua lus Hmoob: 6/17. Kev txhais First Presidency Message, August 2017. Hmong. 97928 295