Thawj Pawg Thawj Tswj Hwm tsab Xov, Cuaj Hli Ntuj 2017
Cov Yaj Saub uas Coj Peb Kev
Ob peb xyoos tas los lawm, kuv zaum hauv chav ntawm lub Tuam Tsev Salt Lake uas Thawj Pawg Thawj Tswj Hwm thiab Pawg Kaum Ob tug Thwj Tim sib ntsib txhua lub lim tiam. Kuv twb ntsia phab ntsa uas nyob ntawm Thawj Pawg Thawj Tswj Hwm saib, thiab nyob ntawd kuv pom daim duab ntawm txhua tus Thawj Tswj Hwm ntawm lub Koom Txoos.
Thaum kuv ntsia lawv, cov uas nyob ua ntej kuv—txij ntawm tus Yaj Saub Yauxej Xamiv (1805–44) mus txog Thawj Tswj Hwm Gordon B. Hinckley (1910–2008)—ua rau kuv xav hais tias, “Kuv ris txhua tus txiaj vim lawv tau coj kuv kev.”
Cov neeg no yeej yog txiv neej zoo uas yeej tsis tau hloov siab, tsis tau ntshai, thiab yeej tsis tau tso tseg. Cov no yog cov txiv neej ntawm Vajtswv. Thaum kuv xav txog cov yaj saub hauv lub caij nyoog kawg no uas kuv paub thiab hlub heev, kuv xav txog lawv lub neej, lawv tej cwj pwm, thiab lawv tej lus qhia uas txais los ntawm kev tshoov siab.
Thawj Tswj Hwm Heber J. Grant (1856–1945) yog tus Thawj Tswj Hwm ntawm lub Koom Txoos thaum kuv yug los. Thaum kuv xav txog nws lub neej thiab tej lus qhia, kuv ntseeg tias ib tug cwj pwm uas Thawj Tswj Hwm Grant coj yam ntxwv txog yog kev tiv tiag tiag—kev tiv tiag tiag ua tej yam uas zoo thiab tseem ceeb.
Thawj Tswj Hwm George Albert Smith (1870–1951) yog tus Thawj Tswj Hwm ntawm lub Koom Txoos thaum lub sij hawm uas kuv yog tus npisov ntawm kuv pawg ntseeg hauv Salt Lake City. Nws pom tias tus Tswv thiab tus yeeb ncuab yeej sib tawm tsam zoo li nkawd sib rub hlua. Nws qhia tias, “Yog nej yuav nyob rawv tus Tswv tog, ces nej yuav txais nws lub hwj huam thiab yuav tsis xav ua txhaum hlo li.”1
Thawj Tswj Hwm David O. McKay (1873–1970) yog tus uas hu kuv ua ib tug mej zeej hauv Pawg Kaum Ob tug Thwj Tim thaum xyoo 1963. Nws qhia kom neeg xav txog lwm tus los ntawm nws txoj kev ua nws lub neej. Nws hais tias, “Kev ntseeg Khetos tiag tiag yog kev hlub lwm tus.”2
Thawj Tswj Hwm Joseph Fielding Smith (1876–1972), ib tug uas sau ntawv ntau heev nyob hauv lub Koom Txoos, muaj ib lub ntsiab cai uas tau coj nws lub neej uas yog kev kawm txog txoj moo zoo. Nws tau nyeem vaj lug kub tsis tu tsis tseg thiab paub txog tej lus qhia thiab tej lus qhuab qhia nyob hauv cov ntawv vaj lug kub ntau tshaj txhua tus uas kuv paub.
Thawj Tswj Hwm Harold B. Lee (1899–1973) yog kuv ceg txheem ntseeg tus thawj tswj hwm thaum kuv yog ib tug tub hluas. Ib yam uas nws pheej nyiam hais yog “Sawv hauv tej qhov chaw dawb huv, thiab tsis txav li.”3 Nws yaum kom Tsoom Haiv Neeg Ntseeg mloog zoo, thiab ua raws li, tus Vaj Ntsuj Plig Dawb Huv tej lus ntxhi.
Kuv ntseeg tias ib lub ntsiab cai uas coj Thawj Tswj Hwm Spencer W. Kimball (1895–1985) lub neej yog kev rau siab. Nws yeej rau siab ntso rau tus Tswv tag nrho. Nws kuj rau siab ua neej raws li txoj moo zoo.
Thaum Thawj Tswj Hwm Ezra Taft Benson (1899–1994) los ua tus Thawj Tswj Hwm ntawm lub Koom Txoos, nws hu kuv ua nws tus Pab Cuam thib Ob hauv Thawj Pawg Thawj Tswj Hwm. Kev hlub yog lub ntsiab cai uas coj nws kev, uas yeej nyob hauv kab lus uas nws nyiam tshaj, uas tus Cawm Seej tau hais tias: “Nej yuav tsum ua neeg zoo li cas? Kuv hais rau nej tseeb tias, zoo tib yam li kuv.”4
Thawj Tswj Hwm Howard W. Hunter (1907–95) yog ib tug uas pheej nrhiav qhov zoo nyob hauv lwm tus. Nws yeej ua siab zoo; nws yeej txo hwj chim. Kuv tau koob hmoov vim kuv yog nws tus Pab Cuam thib Ob.
Thawj Tswj Hwm Gordon B. Hinckley qhia kom peb ua zoo npaum li peb ua tau. Nws tau ua tim khawv txog tus Cawm Seej thiab Nws ntiag tug hauj lwm. Nws muaj kev hlub qhia peb. Qhov uas kuv ua nws tus Pab Cuam thib Ib yeej yog lub sam xeeb thiab ib txoj koob hmoov rau kuv.
Tus Cawm Seej txib cov yaj saub los vim Nws hlub peb. Thaum lub tuam rooj sab laj lub Kaum Hli Ntuj no, cov Tuam Thawj Coj ntawm lub Koom Txoos yuav rov qab muaj cib fim qhia txog tus Cawm Seej tej lus. Peb txo hwj chim thiab saib kev lav ris no tseem ceeb heev.
Peb tau koob hmoov ntau vim Yexus Khetos lub Koom Txoos uas tau muab txum tim rov qab los nyob hauv lub ntiaj teb thiab lub Koom Txoos muaj lub hauv paus uas yog lub pob zeb ntawm kev tshwm sim. Kev tshwm sim uas tsis tu tsis tseg yeej yog qhov uas ua rau Yexus Khetos txoj moo zoo muaj zog.
Thov kom peb yuav npaj siab txais kev tshwm sim rau peb tus kheej uas los nplua mias nyob hauv lub tuam rooj sab laj. Thov kom peb yuav mob siab tsa tes txhawb nqa cov yaj saub thiab cov thwj tim uas muaj txoj sia nyob. Thov kom peb yuav txais kev kaj, kev txhawb nqa, kev nplij siab, thiab kev dag zog thaum peb mloog lawv tej zaj lus. Thiab thov kom peb yuav rov qab cog lus rau tus Tswv Yexus Khetos—Nws txoj moo zoo thiab Nws txoj hauj lwm—thiab rau siab ua neej raws li nws tej lus txib thiab ua raws li Nws lub siab nyiam.
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/17. Pub txhais ua lus Hmoob: 6/17. Kev txhais First Presidency Message, September 2017. Hmong. 97929 295