Cov Mus Saib Xyuas Tom Tsev tsab Xov, Cuaj Hlis Ntuj 2017
Ua Ib Siab
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas Vajtswv cov ntxhais to taub lub hom phiaj ntawm lub Koom Haum Niam Tsev yuav npaj lawv li cas kom txais tau cov koob hmoov ntawm txoj sia nyob mus ib txhis?
Kev Ntseeg Tsev Neeg Kev Pab
Thiab tus Tswv hu nws cov neeg ua Xi-oos, vim lawv koom siab koom ntsws, thiab ua raws li kev ncaj ncees; thiab tsis muaj cov neeg pluag (saib Mauxes 7:18). Peb yuav ua li cas kom ua ib lub siab?
Txwj Laug M. Russell Ballard ntawm Pawg Kaum Ob tug Thwj Tim hais tias: “Lub ntsiab tseem ceeb ntawm lo lus Akiv atonement, uas txhais tias kev theej txhoj yog lo lus one uas txhais tias ib. Yog tias txhua leej txhua tus to taub qhov no, yeej yuav tsis muaj leej twg uas peb tsis quav ntsej, tsis hais lawv laus li cas, yog haiv neeg twg, poj niam txiv neej, ntseeg dab tsi, los sis muaj koob muaj npe npaum li cas los. Peb yuav sim coj tus Cawm Seej tus yam ntxwv thiab yeej yuav tsis ua siab phem, saib tsis taus lwm tus, los yog hem lwm tus.”1
Thawj Tswj Hwm Henry B. Eyring, tus Pab Cuam hauv Thawj Pawg Thawj Tswj Hwm, qhia hais tias: “Thaum tib neeg muaj tus Ntsuj Plig nrog lawv nyob, [lawv] yeej yuav ntseeg tias yuav muaj kev sib haum xeeb. … Vajtswv tus Ntsuj Plig yeej tsis ua rau tib neeg sib cav sib ceg (saib 3 Nifais 11:29). …Ua rau yus nyob kaj siab lug thiab xav koom siab koom ntsws nrog lwm tus.”2
Hais txog tej kev tsis sib haum nyob hauv tsev neeg, Carole M. Stephens, uas yog tus Pab Cuam thib ib hauv Koom Haum Niam Tsev Pawg Tuam Thawj Tswj Hwm, hais tias: “Kuv yeej tsis tau nyiaj ntxeem kev sib nrauj, kev mob uas muaj thaum yus niam yus txiv tso yus tseg, los sis kev lav ris uas muaj thaum yus yog ib tug niam tsev uas tsis muaj tus txiv. Kuv tsis tau muaj ib tug me nyuam tuag, tsis tau raug kev muaj tsis taus me nyuam, los yog kev poj niam nyiam poj niam. Kuv tsis tau raug ntaus, raug mob ntev heev, los yog raug kev muaj yees. Tej kev sim siab no tsis yog kuv li.
“… Tiam sis dhau los ntawm kuv tej kev sim siab … ua rau kuv paub tus uas to taub tiag tiag. … Thiab tsis tas li ntawd, kuv tau raug txhua yam kev sim siab uas kuv tau hais txog thaum kuv ua ib tug ntxhais, ib tug niam, niam pog, viv ncaus, phauj, thiab phooj ywg.
“Peb uas yog cov ntxhais uas ua raws li Vajtswv tej kev khi lus muaj cib fim kawm tau los ntawm peb tej kev sim siab; thiab peb kuj muaj cib fim koom siab muaj kev khuv leej thaum peb txhawb nqa lwm tus hauv Vajtswv tsev neeg, raws li peb tau khi lus tseg.”3
Vaj Lug Kub thiab tej Ntaub Ntawv Xov Xwm Ntxiv
Yauhas 17:20–23; Efexus 4:15; Mauxiyas 18:21–22; 4 Nifais 1:15;
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/17. Pub txhais ua lus Hmoob: 6/17. Kev txhais Visiting Teaching Message, September 2017. Hmong. 97929 295