Ennaan eo an Būreejtōnji eo Kein Kajuon, Jeptōm̧ba 2017
Rikanaan ro n̄an Tōl Kōj
Jet iiō remootļo̧k, ikar jijet ilo ruum̧ eo ilowaan Salt Lake Temple ijo Būreejtōnji eo Kein Kajuon im Doulul eo an Jon̄oulruo Rijilōk ro rej kweilo̧k ie juon kōttan juon wiik. Ikar kalimjōke wall eo ej jitōn̄ļo̧k ruum̧ eo an Būreejtōnji eo Kein Kajuon, im ijin ikar lale pija in kajjojo Būreejtōn ro an Kabun̄ in.
Ke ikar kalimjōki, rikanaan rein m̧okta jān n̄a—jān Rikanaan Josep Smith (1805–44) n̄an Būreejtōn Gordon B. Hinckley (1910–2008)—Ikar ļōmņak, “Ewi jon̄an aō m̧ōņōņō kōn tōl ko an kajjojo iaer.”
Em̧m̧aan rein rej jan̄in kar ebbeer, rej jan̄in kar wōtlo̧k, im rej jan̄in kar likjab. Er rej em̧m̧aan in Anij. Ilo aō ļōmņak kōn rikanaan ro raan kein ikar jeļā kajjeer im iakwe er, ij keememej mour ko aer, m̧wil ko aer, im katak ko aer reim̧we.
Būreejtōn Heber J. Grant (1856–1945) ekar Būreejtōn eo an Kabun̄ in ke ikar ļo̧tak. Ilo aō kejōkļo̧kjeņ kōn mour eo an im katak ko an, ij tōmak juon iaan kadkad ko an Būreejtōn Grant iien otemjej ekar waanjon̄ak kōn kijejeto—kijejeto ilo men ko rem̧m̧an im aorōk.
Būreejtōn George Albert Smith (1870–1951) ekar Būreejtōn eo an Kabun̄ in iien ko ikar jerbal āinwōt juon bisop an ward eo aō ilo Salt Lake City. Ekar kile bwe ewōr juon kankan to eļap ej waļo̧k ikōtaan Irooj im rikapo eo. “Eļan̄n̄e kwonaaj pād ilo turājet eo an Irooj ilo ļain eo,” ekar katakin, “kwonaaj pād ium̧win kajoor eo An im enaaj ejjeļo̧k am̧ ikdeelel n̄an kōm̧m̧an bōd.”1
Kar kūr eō n̄an jerbal āinwōt juon uwaan Doulul eo an Jon̄oulruo Rijilōk ro ilo 1963 jān Būreejtōn David O. McKay (1873–1970). Ekar katakin kea kōn ro jet kōn wāween an mour. “Rikūrijin eo Em̧ool,” ekar ba, “ej iakwe ej waļo̧k ilo kōm̧m̧an.”2
Būreejtōn Josep Fielding Smith (1876–1972), juon iaan rijeje ro an Kabun̄ in reļļap, ekar wōr ippān juon pedped in tōl ilo mour eo an gospel. Ekar jab mōk in riiti eoon kein im ekar lukkuun meļeļe kōn katak ko katakin im katak ko loi ilowaan peij ko aer jān jabdewōt armej ikar jeļā kake.
Būreejtōn Harold B. Lee (1899–1973) ekar jerbal āinwōt stake būreejtōn eo ke ikar juon ļaddik. Juon iaan naan ko ekkā an kout jāni “Kom̧win jutak ilo jikin ko rekwojarjar, im jab m̧akūtkūt.”3 Ej rōjan̄ Armej ro Rekwojarjar bwe ren pād wōt, im mōkaj aer eo̧ron̄, unoojdikdik ko an Jetōb Kwojarjar.
Ij tōmak juon pedped in tōl ilo mour eo an Būreejtōn Spencer W. Kimball (1895–1985) enaaj kar wūjlepļo̧k. Ekar lukkuun wūjlepļo̧k, lukkuun dim ilo an wūjlepļo̧k n̄an Irooj. Ekar barāinwōt wūjlepļo̧k e n̄an mour kōn gospel eo.
Ke Būreejtōn Ezra Taft Benson (1899–1994) ekar erom Būreejtōn eo an Kabun̄ in, ekar kūr eō bwe in jerbal āinwōt an Kein Karuo Rikakpilōklōk ilo Būreejtōnji eo Kein Kajuon. Iakwe ekar pedped in tōl eo an, eo ekar libobo ilo kout in em̧m̧an ippān, eo me Rilo̧mo̧o̧r eo ekar kōnono kake: “Armej rot kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij.”4
Būreejtōn Howard W. Hunter (1907–95) ekar juon eo me aolep iien ej kalimjōk wōt men ko rem̧m̧an ippān ro jet. Enan̄in ke kar kwaļo̧k kautiej; enan̄in ke kar kōttāik būruwōn. Ikar jeraam̧m̧an n̄an jerbal āinwōt an Rikakpilōklōk eo Kein Karuo.
Būreejtōn Gordon B. Hinckley ekar katakin kōj n̄an kōm̧m̧ane ijo em̧m̧antata. Ekar kwaļo̧k naan in kam̧ool eo ekajoor kōn Rilo̧mo̧o̧r eo im Mijen eo An. Ekar katakin kōj kōn iakwe. Jerbal āinwōt an Rikakpilōklōk eo Kein Kajuon ekar juon mennin utiej im juon kōjeraam̧m̧an n̄an n̄a.
Rilo̧mo̧o̧r eo ekar jilkintok rikanaan ro kōnke Ej iakwe kōj. Ilo kweilo̧k eo eļap Oktoba in, Ritōl ro Routiej an Kabun̄ in renaaj bar juon alen jeraam̧m̧an n̄an kwaļo̧k naan eo An. Kōm̧ij bōk eddo in kōn eļap tiljek im ettā bōro.
Ewi jon̄an ad jeraam̧m̧an bwe jepļaaktok eo an Kabun̄ eo an Jisos Kraist ej pād ioon laļ in im bwe Kabun̄ in ekar ejaak ioon dōkā in revelesōn. An wōnm̧aanļo̧k wōt revelesōn ej men eo elukkuun aorōk an gospel eo an Jisōs Kraist.
Jemaron̄ m̧aanjabpopo n̄an bōk revelesōn an juon make eo me ej itok ļap wōt im ļap ilo iien kweilo̧k eo eļap. Kōm̧m̧an bwe būruwōd ren obrak kōn jibadbad eļap ilo ad kotak peid n̄an rejtake rikanaan ro remour im rijilōk ro. Jen kōm̧m̧an bwe jen meļeļe ļo̧k, kōketak, aenōm̧m̧an, im kajoorļo̧k ilo ad ron̄jake ennaan ko aer. Im kōm̧m̧an bwe jen pojak in kallim̧uri kōj make n̄an Irooj Jisōs Kraist—gospel eo An im jerbal eo An—im n̄an mour ļōmņak ekāāl ilo kōjparok kien ko An im kōwōnm̧aanļo̧k Ankilaan.
© 2017 jān Intellectual Reserve, Inc. Aolep jim̧we ko rej pād ippan. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an First Presidency Message, September 2017. Marshallese. 97929 874