Naan in Katak an Kōrā, Jeptōm̧ba 2017

Kōn Juon Bōro

Kanooj jar ilo am̧ ekkatak kōn katak in im pukōt im̧we n̄an jeļā ta eo kwonaaj tilmaake. Ekōjkan ad naaj meļeļe unleplep eo an Doulul eo an Kōrā ro rej kōpooj leddik ro nejin Anij n̄an kōjeraam̧m̧an ko an mour indeeo?

“Im Irooj eaar ņa etan armej ro An Zaion, kōnke rekar juon wōt ilo bōro im juon wōt ilo ļōmņak, im rekar jokwe ilo wānōk; im ar ejjeļo̧k rijeram̧ōl ilubwiljier.” (Moses 7:18). Ewi wāween ad maron̄ erom juon?

Elder M. Russell Ballard jān Doulul eo an Jon̄oulruo Rijilōk ro ekar ba: “Jān m̧wilaļ in naan in English in pinmuur ej naan eo juon. Eļan̄n̄e aolep armej remeļeļe naan in, enej kar ejjeļo̧k jabdewōt ro me jeban jab kea kake, mekarta rūttoier, kil rot, m̧aan ak kōrā, kabun̄, ak iiaio ko ak jeraam̧m̧an ko aer. Jenaaj kar kajjieon̄ ļoor Rilo̧mo̧o̧r eo im ban kar jab jouj, oktak, jab kautiej, ak jab elļo̧k n̄an ro jet.”¹

Būreejtōn Henry B. Eyring, Rikakpilōklōk eo Kein Kajuon ilo Būreejtōnji eo Kein Kajuon, ekar katakin: “Ijo me armej ro ewōr Jetōb ippāer, [er] remaron̄ kōtmāne ineem̧m̧an ie. … Jetōb eo an Anij ejjab kalle aetwerōk (lale 3 Nipai 11:29). … Ej tōlļo̧k n̄an aenōm̧m̧an eo an juon make im juon en̄jake in ippān doon.”²

Kōnono kōn apan̄ ko an baam̧le, Carole M Stephens, eo ekar jerbal āinwōt Rikakpilōklōk eo Kein Kajuon ilo Doulul eo an Kōrā ro, ekar ba: “Ij jan̄in kar mour ilo mour in jepel, metak im jakoņ eo ej itok jān em̧m̧akūt, ak eddo eo ej ekkejelļo̧k ippān juon m̧am̧a ejjeļo̧k pāleen. Ej jan̄in wōr nejū ajri emej, jab maron̄ neji, ak kōņaan bar juon kōrā. Ij jan̄in kar ioon kōmetak ak nan̄inmej enana ak an̄ūrlep. Men kein rej jan̄in kar letok aō iien eddōkļo̧k.

“… Ak jān mālijjon̄ im kapo ko aō make … Ikar lukkuun jeļā kajjien Juon eo ej meļeļe. …Ilo kakkobaba, iaar en̄jake aolep mālijjon̄ ko an mour in ko ikar kwaļo̧ki jān wāween ko an leddik ro, m̧am̧a ro, bubu ro, kōrā eo jeid ak jatid, kōrā eo jined ak jemed, im ro m̧ōttad.

“Eddo in ad āinwōt leddik ro nejin Anij rej kōjparok bujen ko ej jab n̄an katak wōt kōn apan̄ ko ad make; ej n̄an ippān doon ilo m̧ōņōņō im tūriam̧o̧ ilo ad rie membōr ro jet an baam̧le eo an Anij ilo kijejeto ko aer.”³

Kakobaba in Eoon ko im Meļeļe ko

Jon 17:20–23; Epesōs 4:15; Mosaia 18:21–22; 4 Nipai 1:15;

reliefsociety.lds.org

© 2017 jān Intellectual Reserve, Inc. Aolep jim̧we ko rej pād ippan. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an Visiting Teaching Message, September 2017. Marshallese. 97929 874