Iren Mahsen en Presidensi Keieu, Septempe 2017
Soukohp kan kin Kaweid Kitail
Sounpar kei samwalahro, I wie mwomwohd nan ehu pere nan Tehnpas Sarawi en Salt Lake wasa me Presidensi Keieu oh Pwihn en Wahnparon Ehk-riemeno kin tuhpene pak ehu nan ehu wihk. I kilengda ni dihd me kin sohsohpeidohng Presidensi Keieu, oh kilangada kilel en emen emen irail Presiden kan en Mwomwohdiso wet.
Ni ei kilkilang irail, me ketlahr mwohi kan—sang Soukohp Joseph Smith (1805–44) lel Presiden Gordon B. Hinckley (1910–2008)—I medewehda, “Ia uwen ahi kaping kalahnganki kaweid en emen emen irail.”
Ohl pwukat wia ohl kesempwalkei me sohte kin pweiek, sohte kin pwangada, oh kin pweida ansou koaros. Olen Koht kei met. Ni ei kin medewe soukohp en rahn pwukat me I esehier oh kin poakehng, I kin tamanda mwomwen arail mour, arail wiewia oh arail padahk ngenin kan.
Presiden Heber J. Grant (1856–1945) me wia Presiden en Mwomwohdiso wet ansou me I ipwidi. Ni ei kin medewe mwomwen ah mour oh ah padahk kan, I kamehlele me ehu wiewia me Presiden Grant kin kalap kasalehda iei tengediong—tengediong mehkot me mwahu oh kesempwal.
Presiden George Albert Smith (1870–1951)me wia Presiden en Mwomwohdiso wet ansou me I wia pisop nan ahi wardo nan Kahnihmw en Salt Lake. E kasawiada me mie siai en ep-sel kalaimwun ehu wiewiawi nan pwungen Kauno oh tepelo. “Ma kumwail pahn iang wawaik sahlo ni sapwellimen Kauno palio,” e padahngki, “kumwail pahn patpato pahn kupwure oh sohte men wiahda me sapwung.”1
I malipilipda ien wiahla emen tohn Pwihn en Wahnparon Ehk-riemeno nan 1963 sang Presiden David O. McKay (1873–1970). E padahngki duwen medemedewe mehteikan sang ni mwomwen ah momourki ah mouro. E mahsani “Souleng mehlel kin mwekmwekidki limpoak.”2
Presiden Joseph Fielding Smith (1876–1972), emen tohn Mwomwohdiso me kin kalapw nting, wiahki ah mehn kaweidih ah mour kasukuhlki rongamwahuo. E kin wadek iren pwuhk sarawi kan oh kin kak wehwehki padahk kan oh kosonned akan me kin dierek nan pwuhk sarawi laudsang koaros me I kin ese.
Presiden Harold B. Lee (1899–1973) wia ahi stake presiden ansou me I wia kisin pwutak. Lepin kahs me e keieu pwungki iei “Kumwail kesihnen nan wasa sarawi, oh dehr mwekid.”3 E kangoangehki Souleng kan en kin ehuieng, oh pohnese, ngihl tikitik kan en Ngehn Sarawi.
I kamehlele me ehu koasoandien kaweid nan mour en Presiden Spencer W. Kimball (1895–1985) iei tohnmetei. Ohlo ni unsek, tohnmetei kihla ah mour ong Kauno. E pil koasoanehdi en momourki rongamwahuo.
Ni ansou me Presiden Ezra Taft Benson (1899–1994) wiahla Presiden en Mwomwohdiso wet, e eker iehda en wia sapwellime Sounsawas Keriau nan Presidensi Keieu. Limpoak me wia sapwellime mehn kaweid, me kin sansal nan lepin kahs me e keiuhn pwungki, me Sounkomouro mahsani: “Eri soangen aramas dahnge me kumwail en wia? Mehlel I indahiong kumwail, kumwail en duweiehte” (3 Nephi 27:27).4
Presiden Howard W. Hunter (1907– 95) wia aramas men me kin kilekilangete dahme mwahu rehn mehteikan. Ohl waun; oh karakarahk men. E wia kapai ieu ahi kak wia sapwellime Sounsawas Keriau.
Presiden Gordon B. Hinckley padahkiheng kitail en wia atail kak koaros. E wia kadehde kehlail me pid Sounkomouro oh Sapwellime doadoahk. E kasukuhli kitail ni limpoak. I ahneki wahu oh kapai ni ahi wia sapwellime Sounsawas Keieu.
Sounkomouro ketkihdo soukohp kan pwehki E ketin poakehng kitail. Ni kapokon lap en Oaktohpe, Kaun Lapalap kan en Mwomwohdiso pahn pil pwurehng ahneki ansou mwahu en ehukihda Sapwellime mahsen. Se kin wia doadoahk kesempwal wet ni wahu oh karakarahk.
Kitail mehd pai pwehki Mwomwohdiso en Sises Krais kopwurpwurdohr pohn sampah oh Mwomwodisou poahsoandahr pohn takai en kaudial. Kaudial poatopoat me kin wia komourpen rongamwahu en Sises Krais.
Kitail onopada pwehn ale pein atail kaudial me tohto me kin kohda ni ansoun kapokon lap. Atail mohngiong kan en ahneki lamalam kehlail ni atail kin kauwada pehtail pwehn utungada soukohp ieias oh wahnpoaron kan. Kitail en marainla, audaudkihda, nsenamwahula, oh kehlailda ni atail kin rong arail padahk kan. Oh kitail en onopada pwehn katenge kitaildi rehn Kauno Sises Krais—Sapwellime rongamwahuo oh Sapwellime doadoahk—oh momouruki inou kapw wet ni atail kolokol Sapwellime kosonned akan oh ideidawehn Kupwure.
© 2017 by Intellectual Reserve, Inc. All rights reserved. Ntingdahr nan USA. Mweimwei en lokaiahn wai: 6/17. Mweimwei en kawewehdi: 6/17. Kawehwehpen First Presidency Message, September 2017. Pohnpeian. 97929 885