Mulwol ko Bin Somm’on e Presidency, September 2017
Pi Profet ni nge Pow’iy Dad
In e duw ni ke yan, ni gube par u lane singgil u Salt Lake Temple ko gini ba’ram ni ma mo’olung e Bin Somm’on e Presidency nge fare Ulung ko fare Ragag nge L’agruwi Apostle ta’abyay u rebe wik. Mug sap nga downgin e rungrung ki gin ba’ram ni ma sap e Bin Somm’on e Presidency ngay, mug par nga’ug yaliy e pi sasing ni ya’an e President ko Galasia.
Ma nap’an ni gube yaliy, e pi cha’ney ni yad ba mo’on rog ni nap’an— rok Profet Joseph Smith (1805–44) nge yani mada’ ku President Gordon B. Hinckley (1910–2008)—mug lemnag ni, “Karigu falan’ ngay ko fonow rok bagayad.”
Pi chaney e bogi pumo’on ni yad ba fel’ nib fel’ ni dani yad ma loerloer, dani ma tuntun, ma ku dani ma waer. Pi chaney e gidii’ rok Got. Nap’an ni gura lemnag e pi profet ni kafram nem ni kugu manang ma ri yad ba tu’uf rok, gumanang rogon e yafos rorad, rogon e gafgow rorad, nge rogon ni yad be fil ban’en ni ba magan’ rad ngay.
President Heber J. Grant (1856–1945) e ire President ko Galasia u nap’an ni gu sum. Nap’an ni gu nang fan e yafos rok nge pi n’en ni be fil, me mich u wun’ug ba ya’an ni ba gaa’ ni ma yoeg President Grant e situntun—situntun ko tin ba’ray e ban’en ni ba mangil nge gel bugwan.
President George Albert Smith (1870–1951) e ba President ko fare Galasia ko ngiyal’ ni baray ni gaag e bisof ko birog e ward u Salt Lake City. Me par nge sap me guy ni bay ba gereng nib gel u thilin fare Somoel nge fare lumel. “Fa’anra ngam par ko baq rok Somoel e wo’,” nike fil, “gara par ni gabe rin’ ni boed rogon ni be rin’ ma dakir sulsul e tafney rom ni ngam adag ni ngam rin’ e kireb.”1
Kanoeg ngog ni ngug mang rebe chonggin fare Ulung ko fare Ragag nge L’agruw ko 1963 ni yib rok President David O. McKay (1873–1970). Ke fil ngodad ni ngad tafney niged bochi gadad nge rogon ni be par u lane yafos rok. “Bin Riyul’ e Kristiano,” ni be yoeg, “e tu’ufeg ni yibe rin’.”2
President Joseph Fielding Smith (1876–1972), rebe e tayol ko Galasia ni rib cheag, ni boed e n’en nib ga’fan nima gagyeg nigey u lane yafos rok ko gospel scholarship. Ma bi’eg e bible ni dar ma tal ma ke machem ko pi skul nge faan ni yira pir’eg u lane pi babyor nem ni dariy bea’ ni kug guy nga fani cheg nge migid.
President Harold B. Lee (1899–1973) e ire stake president nap’an ni ri gub bitir. Ma n’en ni riba a’dag ni yug ma yoeg e “Mu sak’iy nga daken e but nib thothup, ma dab mu chuw riy.”3 Me pii’ gelngin e pi gidii’en kristus ni ngan un ngay, ma ngan fol ko, fare Kan ni Thothup ni be kathkath ngom.
Ba mich u wunug ni guiding principle u lane yafos ku President Spencer W. Kimball (1895–1985) e kani mu’ i yoloey nga babyor. Kari pii’ ir ni polo’, ni kari mich ma be rin’ gubin banen ni be yoeg fare Somoel. Ma kari par ni be fol ko gospel.
Nap’an President Ezra Taft Benson (1899–1994) e mang President ko Galasia, me piningeg ni ngug mang e bin L’agruw e Counselor rok ko fare Bin Somm’on Presidency. Tu’ufeg e ire guiding principle rok, ni ire ke mang thin rok ni rib adag, ni yoeg fare Tabiyul: “Miti mang gidii’’ e gaba a’dag ni ngam boed? Rug be ga’ar ngomed, ngam boeded gag.”4
President Howard W. Hunter (1907–95) e bea’ ni ma sap nag falngin e gidii’. Ri ba gol; ma ri kuba sobutan’. Rib magan’ug ngay ni ngug mang Bin Somm’on e Counselor.
President Gordon B. Hinckley e fil ngodad ni ngad rin’ed u rogon ni rayog rodad. Ma kari weliy rogon gelngin e mich rok fare Tabiyul nge fare murwel rok. Ke skul nag dad u fithik e tu’ufeg. Murwel ni woed fare Bin Somm’on e Counselor rok e ri ban’en ni ri gub falfalan’ ngay ma kuba tawa’ath ngog.
Fare Tabiyul e ke pii’ e pi profet ni bochan e tu’ufeg rok ngodad. Nap’an e general conference ko October, ma fare General Authority ko Galasia e ku yad ba’adag ni ku yad ra weliy boch e thin Rok. Ngad uned ko re n’ey u fithik e adag nge sobutan’.
Kad taw’ath gad ni kani sulweg e Galasia ku Yesus Kristus ngaray nga fayleng ma re Galasia ney e kani ufnguy nga daken e malang ko yi’iy. Ma ku be ‘ul’ul e yi’iy ni ire gelngin fare gospel rok Yesus Kristus.
Ngadi fal’eged rogdad ni nge yaag ngodad e pi revelation ni ma yib u nap’an e general conference. Ma nge sug gumircha’en dad ni kan turguy u nap’an ni gadad ra tining pa’ dad nga lang ni ngad sustain niged e pi profet nge apostle. Ma ngad ba’ud gad, me chibiydad, gapaseg, me gel nag dad u napan ni gadad ra motoyil ko milwol rorad. Ma ngad faleged rogodad ni ngad micheged gadad ku Samol Yesus Kristus apostle Rok nge murwel Rok ma ngan par ni kan bi’ech ma ngani rol ko pi motochiyol rok ma ngani rin’ ni boed rogon ni ke yoeg.
© 2017 by Intellectual Reserve, Inc. All rights reserved. Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg thin ko First Presidency Message, September 2017. Yapese. 97929 905