Pweng ke Forfor Luti, Septempuh 2017
Ke Inse Sefanna
Pruhe in lutlutkihn kuhfa se inge ac suk kolyuck in etuh ma in akacsruhi kac. Kahlwem ke srihpac luhn Rilif Sosaiti uh ac ahkoelah fuhkah muhtwacn nuhtin God nuh ke mwe insewowo luhn moul ma pahtpaht uh?
Luhlahlfongi Sucu Kahsruh
Ac Leum El pahngon mwet lal Zion, mweyen elos inse sefanna ac nuhnak sefanna, ac muhta in suwohswohs; ac wacngihn suhkahsruhp inmahsrlolos (liye Moses 7:18). Kuht ac kuh in ma sefanna fuhkah?
Elder M. Russell Ballard of the Quorum of the Twelve Apostles el fahk: “Ke insiyac luhn kahs English se atonement pa kahs sie. Fin mwet nuhkwewa kahlwem ke ma se inge, ac fah wacngihn sie mwet suc kuht ac fah tiac elyah kac, tiac elyah ke matwac, mwet fuhkah, mokul kuh muhtwacn, alu, kuh ohiyac sahyac. Kuht fah kahfweacng in etahin Mwet Lahngo ac fah oruh in kuhlwang, tiac siena, ahkfuhlwact, kuh in tiac oruh upac nuh sin mwet sahyac.”1
Prestuhn Henry B. Eyring, Mwet in Kahsruh Se Met ke Prestuhnsi Se Met, el luti: “Yen mwet uh oasr [na] Nguhn in elos uh, [elos] ac ahksrui lihkihn puhsra wowo. … Nguhn luhn God tiacna puhrakwack lokoalok (liye 3 Nephi 11:29). … El kol kom nuh ke mihs lom sifacna ac puhla lom in tuhkweni wi mwet sahyac.”2
Sramsramkihn ma upac ke sucu uh, Carole M. Stephens, suc kuhlwacnsap ekihn Mwet in Kahsruh Se Met ke Rilif Sosaiti Prestuhnsi, fahk: “Nga tiacna moulkihn sie sahf, kweok ac sensen ma tuhkuh ke muhkwelacna uh, kuh ma kunac ma oasr ekihn ninac lolacp se uh. Nga soenna falyang nuh ke misac luhn sie tuhlihk, tiac kuh in orek tuhlihk, kuh akohnohki inmahsrlon mokul mokul kuh muhtwacn muhtwacn. Nga soenna srihke ngan oruh ohiyac koluk, mas, kuh pahlah in oruh ma se uh. Ohiyac inge tiac ma nga ahkoeyuc nuh kac.
“… Tuhsruhk ke srihkasrak luhk sifacna … nga puhlakihn woiyacn tuhkweni wi Mwet Se ma kahlwem kac uh. … Ac in weacng, nga puhlakihn nohfohn mwe srihkasrak luhn moul ma nga fahk tari ke mwe liyeyuck luhn tuhlihk muhtwacn se, ninac se, ninac mahtuh se, tahmtahel se, muhtwacn, ac kawuck uh.
“Pacl wowo lasr in ekihn tahmtahel liyacacng-olwelah nuhtin God tiac pa in lotwelah ke ma upac lasr muhkwena; pa in tuhkweni ke pahkomuhta ac luhngse ke kuht tahpuhk kais sie mempucr ke sucu luhn God ke mwe keok lalos uh.”3
Ma Suhmuhslah ac Koano in Weacng
© 2017 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn Visiting Teaching Message, September 2017. Kosraean. 97929 868