ຂ່າວສານການຢ້ຽມສອນ, ເດືອນກັນຍາ 2017

ການມີໃຈດຽວ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈຈຸດປະສົງຂອງສະມາຄົມສະຕີສົງເຄາະ ຕຽມທິດາຂອງພຣະເຈົ້າ ສຳລັບພອນແຫ່ງຊີວິດນິລັນດອນແນວໃດ?

ແລະ ພຣະຜູ້ເປັນເຈົ້າໄດ້ເອີ້ນຜູ້ຄົນຂອງພຣະອົງວ່າ ຊີໂອນ, ເພາະວ່າພວກເຂົາມີໃຈດຽວ ແລະ ມີຄວາມຄິດດຽວ, ແລະ ໄດ້ດຳລົງຢູ່ໃນຄວາມຊອບທຳ, ແລະ ບໍ່ມີຄົນຍາກຈົນໃນບັນດາພວກເຂົາ (ເບິ່ງ Moses 7:18). ເຮົາຈະເປັນໜຶ່ງໄດ້ແນວໃດ?

ແອວເດີ ເອັມ ຣະໂຊ ບາເລີດ ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ: “ຢູ່ໃຈກາງຂອງຄຳວ່າ atonement ມີຄຳວ່າ one ຊຶ່ງໝາຍຄວາມວ່າ ໜຶ່ງ. ຖ້າຫາກມວນມະນຸດເຂົ້າໃຈຄຳນີ້, ຄົງຈະບໍ່ມີຄົນໃດ ທີ່ເຮົາບໍ່ສົນໃຈນຳ, ໂດຍບໍ່ຄຳນຶງເຖິງອາຍຸ, ເຊື້ອຊາດ, ເພດ, ສາດສະໜາ, ຫລື ຖານະໃນສັງຄົມ ແລະ ເສດຖະກິດ. ເຮົາຈະພະຍາຍາມເອົາແບບຢ່າງຂອງພຣະຜູ້ຊ່ວຍໃຫ້ລອດ ແລະ ຈະບໍ່ປະພຶດໃນທາງທີ່ບໍ່ມີຄວາມກະລຸນາ, ບໍ່ສົນໃຈ, ຫລື ບໍ່ມີຄວາມຮູ້ສຶກ ຕໍ່ຄົນອື່ນ.”¹

ປະທານເຮັນຣີ ບີ ໄອຣິງ, ທີ່ປຶກສາທີໜຶ່ງໃນຝ່າຍປະທານສູງສຸດ, ໄດ້ສອນວ່າ: “ບ່ອນໃດທີ່ຜູ້ຄົນມີພຣະວິນຍານສະຖິດຢູ່ກັບເຂົາເຈົ້າ, ບ່ອນນັ້ນ [ເຂົາເຈົ້າ] ຈະມີຄວາມຖືກຕ້ອງປອງດອງ. … ພຣະວິນຍານຂອງພຣະເຈົ້າ ບໍ່ເຄີຍຂະຫຍາຍຄວາມຂັດແຍ້ງ (ເບິ່ງ 3 ນີໄຟ 11:29). … ມັນຈະນຳຄວາມສະຫງົບສ່ວນຕົວ ແລະ ນຳຄວາມຮູ້ສຶກທີ່ເປັນອັນໜຶ່ງດຽວກັນ ກັບຄົນອື່ນມາໃຫ້ບຸກຄົນ.”²

ເມື່ອກ່າວເຖິງການທ້າທາຍຂອງຄອບຄົວ, ແຄວໂຣ ເອັມ ສະຕີເວັນສ໌, ຜູ້ໄດ້ຮັບໃຊ້ເປັນທີ່ປຶກສາທີໜຶ່ງ ໃນຝ່າຍປະທານສະມາຄົມສະຕີສົງເຄາະສາມັນ, ໄດ້ກ່າວວ່າ: “ຂ້າພະເຈົ້າບໍ່ເຄີຍຜ່ານການຢ່າຮ້າງ, ບໍ່ເຄີຍມີຄວາມເຈັບປວດ ແລະ ຄວາມບໍ່ໝັ້ນໃຈ ທີ່ມາຈາກການຖືກປະຖິ້ມ, ຫລື ມີຄວາມຮັບຜິດຊອບ ທີ່ເປັນແມ່ລ້ຽງລູກດ້ວຍຕົວຄົນດຽວ. ຂ້າພະເຈົ້າບໍ່ເຄີຍປະສົບກັບການຕາຍຂອງລູກ, ບໍ່ເຄີຍເປັນໝັນ, ຫລື ບໍ່ເຄີຍມັກຮັກຄົນເພດດຽວກັນ. ຂ້າພະເຈົ້າບໍ່ເຄີຍຕ້ອງໄດ້ອົດທົນກັບການຂົ່ມເຫັງ, ຫລື ບໍ່ເຄີຍມີພະຍາດຊຳເຮື້ອ, ຫລື ການຕິດແສດ. ສິ່ງດັ່ງກ່າວບໍ່ໄດ້ເປັນໂອກາດທີ່ເຮັດໃຫ້ຂ້າພະເຈົ້າຕ້ອງສູ້ຊົນ.

“… ແຕ່ຜ່ານການທົດສອບ ແລະ ຄວາມຫຍຸ້ງຍາກຕ່າງໆ ຂອງຂ້າພະເຈົ້າ … ຂ້າພະເຈົ້າຈຶ່ງຮູ້ຈັກຜູ້ທີ່ເຂົ້າໃຈ ເປັນຢ່າງດີ. … ແລະ ນອກເໜືອຈາກນີ້, ຂ້າພະເຈົ້າເຄີຍປະສົບກັບການທົດສອບ ໃນທຸກສິ່ງທີ່ຂ້າພະເຈົ້າໄດ້ກ່າວມານັ້ນ ຈາກມຸມມອງຂອງຜູ້ເປັນລູກສາວ, ແມ່, ແມ່ຕູ້, ເອື້ອຍນ້ອງ, ປ້ານ້າອາ, ແລະ ໝູ່ເພື່ອນ.

“ໂອກາດຂອງເຮົາ ໃນຖານະທີ່ເປັນທິດາຜູ້ຮັກສາພັນທະສັນຍາຂອງພຣະເຈົ້າ ບໍ່ແມ່ນພຽງແຕ່ເພື່ອຮຽນຮູ້ຈາກການທ້າທາຍຂອງເຮົາເທົ່ານັ້ນ, ແຕ່ເພື່ອເຮັດໃຫ້ເຮົາເຂົ້າໃຈຄວາມຮູ້ສຶກຂອງຄົນອື່ນ ແລະ ມີຄວາມເຫັນອົກເຫັນໃຈກັນໃຫ້ເປັນອັນໜຶ່ງດຽວກັນ ເມື່ອເຮົາຊ່ວຍເຫລືອສະມາຊິກຄົນອື່ນໆ ໃນຄອບຄົວຂອງພຣະເຈົ້າ ໃນເວລາທີ່ເຂົາເຈົ້າກຳລັງດີ້ນລົນ.”³

ຂໍ້ພຣະຄຳພີ ແລະ ຂໍ້ມູນເພີ່ມເຕີມ

ໂຢຮັນ 17:20–23; ເອເຟໂຊ 4:15; ໂມໄຊຢາ 18:21–22; 4 ນີໄຟ 1:15;

reliefsociety.lds.org

© 2017 by Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Message, September 2017. Laotian. 97929 331