Messaġġ tal-Għalliema taż-Żjajjar, Settembru 2017
Ta’ Qalb Waħda
Bl-għajnuna tat-talb studjaw dan il-materjal u fittxu li tiksbu l-ispirazzjoni biex tkunu tafu x’ għandkom taqsmu ma’ ħutkom. Li jifhmu l-għan tas-Soċjetà tal-Għajnuna kif jista’ jħejji lill-ulied nisa ta’ Alla għall-barkiet tal-ħajja eterna?
Fidi, Familja, Għajnuna
“U l-Mulej sejjaħ lill-poplu tiegħu Sijon, għaliex huma kienu ta’ qalb waħda u moħħ wieħed, u għammru flimkien fi tjubija; u fosthom ma kienx hemm foqra” (Moses 7:18). Kif nistgħu nsiru ħaġa waħda?
Il-Presbiteru M. Russell Ballard tal-Kworum tat-Tnax-il Appostlu qal: “Fil-qalba tal-kelma Ingliża atonement hemm il-kelma one. Jekk l-umanità kollha tifhem dan, ma jkunx hawn persuna waħda li ma jimpurtaniex minnha, tkun xi tkun l-età, ir-razza, is-sess, ir-reliġjon jew il-qagħda soċjali u ekonomika tagħha. Aħna nkunu rridu nagħmlu l-almu tagħna biex nimxu wara l-eżempju tas-Salvatur u qatt ma nkunu kefrin, indifferenti, jew insensittivi ma’ ħaddieħor, kif ukoll qatt ma nuru nuqqas ta’ rispett lejn xi ħadd.”1
Il-President Henry B. Eyring, l-Ewwel Kunsillier fl-Ewwel Presidenza, għallem: “Fejn in-nies ikollhom magħhom l-Ispirtu, huma għandhom jistennew li jkollhom l-armonija fosthom. … L-Ispirtu ta’ Alla qatt ma jwassal għat-tilwim (ara 3 Nephi 11:29). … Huwa jwassal għall-paċi personali u għal sentiment ta’ għaqda ma’ ħaddieħor.”2
Meta kienet qed titkellem dwar ċerti sfidi fil-familja, Carole M. Stephens, li serviet bħala l-Ewwel Kunsillier fil-President Ġenerali tas-Soċjetà tal-Għajnuna, qalet: “Jiena f’ ħajti qatt ma esperjenzajt divorzju, l-uġigħ u l-inċertezza li wieħed iħoss meta jiġi abbandunat, u qatt ma esperjenzajt ir-responsabbiltà li ġġorr omm single. Jiena qatt ma esperjenzajt il-mewt ta’ xi ħadd minn uliedi, l-infertilità jew attrazzjoni lejn l-istess sess. Jiena qatt ma kelli niġġieled l-abbuż, xi marda kronaka jew xi vizzju. Jiena ma ġejtx ippruvata b’ dan il-mod.
“… Iżda permezz tal-isfidi personali tiegħi … jien sirt naf mill-viċin lil Dak li jifhem sew dawk l-isfidi kollha. … U barra minn hekk, jiena esperjenzajt l-isfidi kollha mortali li għadni kif semmejt permezz tal-lenti ta’ bint, ta’ omm, ta’ nanna, ta’ oħt, ta’ zija u ta’ ħabiba.
“L-opportunità tagħna bħala wlied ta’ Alla li nżommu l-patti tagħna mhijiex biss li nitgħallmu minn dawn l-isfidi tagħna; hija li aħna ningħaqdu flimkien fl-empatija u l-kompassjoni hekk kif aħna nissapportjaw lil membri oħra tal-familja ta’ Alla fl-isfidi tagħhom.”3
Skrittura u Informazzjoni Addizzjonali
© 2017 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/17. Approvazzjoni tat-traduzzjoni: 6/17. Traduzzjoni ta’ Visiting Teaching Message, September 2017. Maltese. 97929 159