Poraus seni ewe Aewin Presetensi, October 2017
Winiti Ennetin Chon Kaeo
Seni Preseten Henry B. Eyring
Aemonun Chon Aninis non ewe Aewin Presetensi
Non meinisin mwichen sakramen, a wor rech ewe tufich ach sipwe pwon ngeni Samach Kot won Nang pwe sipwe chechemeni ewe Chon Amanau iteiten fansoun meinisin me fori An kewe annuk pwe Ngunun epwe nonnom rech (nengeni Moronai 4:3;5:2; D&C 20:77, 79 Chechemeni I epwe pusin fisingenikich fansoun meinisin nupwen sia wata itan woch. Sia fori non chommong an nge akaewin nupwen sia anisi ekkoch non itan, anneani pukefel, me iotek ach sipwe sinei met I a mochen sipwe fori.
A fisingeniei nupwen uwa fori ewe angangen papatais ren emon onuon at. Uwa sinei pwe uwa kokko meren noun ewe Chon Amanau ekkewe chon angang ussun emon misineri ai upwe afanafana An ewe kapas annim me pwarata ussun I me An ew ennetin Mwichefen. Chienei we misineri me ngang am ouwa pwon ngeni ewe anuon at pwe I epwe nimenimoch ren ewe manmanen ewe Achasefan an Jises Kraist nupwen a aier fiti nuku non ewe Chon Amanau me papatais meren emon noun kewe chon angang mi angei an mumuta.
Nupwen uwa apwaratai ewe anuon at seni ewe konikin papatais, a mongunungununong non seningei, “Ua nimenimoch, ua nimenimoch.” Non ena fansoun, ua chemeni an ewe Chon Amanau ewe papatais meren John soun Papatais non ewe Chonupupu Jordan. Nge napenon, ua chemeni pwe ua fori ewe angangen amanau an ewe Chon Amanau mi manau sefan me manau—fiti ewe Ngun mi Fel, ussun John a fori.
Ren ngang me emon me emon kich, chechemeni ewe Chon Amanau a tongeni nap seni ach sipwe anongonong won met sia chechemensefani me sia sinei ren I. Sia tongeni ekiekieta met sipwe ekieki iteiten ran an epwe akana ngenikich I non ei fansoun.
Ewe mecheresin mettoch sipwe ekiekin fori ach sipwe anneani ekewe pukefel Ren ach fori, sia tongeni anapano ach memefin arap ngeni I. Ren ngang, arap ngeni napengeni a wor nupwen uwa anneani ewe Puken Mormon. Non ekkewe minich uwa anneani ekkewe sopun 2 Nifai, ua rong non ai ekiek ekkewe mongungun Nifai me Liai ra porous ussun ewe Chon Amanau ussun nge ita ir mi fen pusin sisinei I. Ew memefin arap ngeni a wor.
Ren en, ekkoch neni me non ekkewe pukefel meni repwe akana ngonuk I. Nge ian me inet ka anneani ewe kapasen Kot, fiti tekisoson me ennetin om mochen om kopwe chemeni ewe chon Amanau, kopwe anapano om mochen kopwe wata Itan wom non unusen manauom.
Ewe mochen epwe siwini napanapen om aninis non ewe Mwichefen an ewe Samon. Kopwe iotek ngeni samach Kot won Nang ren aninis an epwe anapano ren met epwe pwa ngonuk an epwe ew kukkun kokko. Ewe aninis kopwe tingor ewe tufich om kopwe nemenono inisum me tumunoch won met ewe Chon Amanau a mochen ren ion kewe ka kokko ngeni om kopwe anisir.
Ua fen mefi Poun me an arap ngeniei non ai angangen aninis fiti nouch kewe nupwen ua iotek ai upwe sinei ifa ussun ai upwe anisir ar repwe kuna ewe kinamwe ewe chok kapas annim a tongeni awora. Ren ei sokkun fansoun, use kon ekieki ussun ai upwe pwano pwe ngang emon sam mi fetanoch, nge uwa kon ekieki ussun ewe fefeitan me tumunun nei kewe.
Ewe mochen ach sipwe awora ngeni ekewe sia angang ngenir met ewe Chon Amanau epwe ngenir a emwen ngeni iotekin tingor ngeni Samach Kot won Nang, ennetin non iten Jises Kraist. Nupwen sia iotek non ena sokkun napanap—non iten ewe Chon Amanau, fiti ach nuku non I—ewe Sam a ponueni. A tinatiw ewe Ngun mi Fel an epwe emwenikich, oururu kich, me pesekich. Pokiten ewe Ngun a awora pwarata ren ewe Chon Amanau (nengeni 3 Nifai 11:31, 36; 28:11; Ether 12:41), kaukun ach sipwe tongei ewe Samon fiti unusen netipach, ekiek, me pochokun mi napeno (nengeni Mark 12:30; Luke 10:27; D&C 59:5).
Ekkewe feiochun chechemeni iei me fansoun meinisin repwe mang ne feitto me ekis me ekis nupwen sia angang ngeni I, kametip won an ewe kapas, me iotek non nuku won Itan. Me ei chechemeni epwe emwirinokicheno ach sipwe winiti ennetin chon kaeo noun ewe Samon Jises Kraist non An mu won ei fonufan—me mwirin ren Saman non ewe murinon fonufan epwe feitto.
© 2017 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon awewen: 6/17. Chiakun First Presidency Message, October 2017. Chuukese (Trukese). 97923 901