Mensahe sa Visiting Teaching, Oktubre 2017
Pag-inakop nga may Pagpalangga Sadtong mga Nagtalang
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano bala ang paghangop sang katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?
Pagtuo, Pamilya, Bulig
“Ang kamatuoran amo nga wala sang perpekto nga mga pamilya … ,” siling ni Pangulong Dieter F. Uchtdorf, Ika-duhang Manuglaygay sa Unang Panguluhan. “Kon ano man ang problema nga ginaatubang sang inyo pamilya, kon ano man ang dapat ninyo himuon para masolbar ini, ang umpisa kag ang katapusan sang solusyon amo ang pagpalangga sa isigkatawo, ang puraw nga pagpalangga ni Cristo.”1
Sa ila nga wala nagapasakop sing lubos sa ebanghelyo, si Linda K. Burton, anay Pangkabilugan nga Pangulo sang Relief Society, nagsiling: “Palangga sang Amay nga Langitnon ang tanan Niya nga kabataan. … Bisan diin pa sila—yara man ukon wala sa banas—luyag Niya nga makabalik sila pauli.”2
“Bisan daw ano ka salawayon [sang inyo kabataan], … kon magsugilanon ukon maghambal kamo sa ila, himoa ini indi sa kaakig, himoa ini indi sa kasingki, sa isa ka nagapanghusga nga espiritu,” tudlo ni Pangulong Joseph F. Smith (1838–1918). “Hambala sila sing may kalulo.”3
Si Elder Brent H. Nielson sang Seventy nagsulit sang panulin sang Manluluwas sa sadtong mga may 10 kabilog nga pilak kag nadulaan sing isa: “Pangitaa tubtob makita ninyo ini. Kon ang nagtalang amo ang inyo anak nga lalaki ukon babayi, inyo utod nga lalaki ukon babayi, … pagkatapos sang tanan naton nga mahimo, palanggaon naton ang ina nga tawo sa aton bug-os nga tagipusuon. …
“Kabay nga ikaw kag ako makabaton sang diosnon nga giya agud mahibal-an ang pinakamaayo nga buhaton agud lab-uton sila nga nadula sa aton kabuhi, kag kon kinahanglan, agud makaangkon sang pasensya kag pagpalangga sang aton Amay sa Langit kag sang Iya Anak, nga si Jesucristo, samtang kita nagapalangga, nagabantay, kag nagahulat sang nagtalang.”4
Si Pangulong Henry B. Eyring, Unang Manuglaygay sa Unang Panguluhan, nagsiling: “Nagpangamuyo ako sing may pagtuo nga ang tawo nga ginpalangga ko magapangita kag makabatyag sang gahum sang Pagbayad-sala. Nagpangamuyo ako sing may pagtuo nga may tawhanon nga mga anghel nga magapalapit sa pagbulig sa ila, kag nag-abot sila.
“Ang Dios nagtigana sang paagi agud maluwas ang tagsa Niya ka kabataan.”5
Dugang nga Balaan nga mga Kasulatan kag Impormasyon
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang Visiting Teaching Message, October 2017 Hiligaynon. 97930 861