Mensahe sang Unang Panguluhan, Oktubre 2017

Ang Mangin Matuod-tuod nga mga Disipulo

Ni Pangulong Henry B. Eyring

Unang Manuglaygay sa Unang Panguluhan

Sa tagsa ka pangsakramento nga miting, may pribelihiyo kita nga magpangako sa Amay nga Langitnon nga aton pirme panumdumon ang Manluluwas kag tumanon ang Iya mga kasuguan agud mangin kaupod naton ang Iya Espiritu (tan-awa sa Moroni 4:3; 5:2; D&C 20:77, 79). Ang pagdumdom sa Iya natural nga magaabot sa aton sa aton pagdala sang Iya ngalan sa aton kaugalingon. Ginahimo naton ini sa madamo nga mga paagi ilabi na gid kon mag-alagad kita sa iban sa Iya ngalan, magbasa sang Iya balaan nga mga pulong, kag magpangamuyo agud mahibal-an kon ano ang Iya buot ipahimo sa aton.

Natabo ini para sa akon sang naghikot ako sang bunyag sang isa ka pamatan-on nga lalaki. Nahibal-an ko nga gintawag ako sang gin-ordinan nga mga alagad sang Manluluwas bilang isa ka misyonero agud magtudlo sang Iya ebanghelyo kag magsaksi sa Iya kag sang Iya matuod nga Simbahan. Kami sang akon kaupod nga misyonero nagpangako sa pamatan-on nga sia pagatinluan paagi sa gahum sang Pagbayad-sala ni Jesucristo kon sia maghinulsol nga may pagtuo sa Manluluwas kag mabunyagan sang isa sa Iya awtorisado nga mga alagad.

Sang ginpabutwa ko ang pamatan-on halin sa tubig sang baptismal font, naghutik sia sa akon, “Matinlo na ako, matinlo na ako.” Sa sina nga tion, nadumduman ko ang pagbunyag sa Manluluwas ni Juan Bautista sa Suba sang Jordan. Labi pa gid, nadumduman ko nga ginahimo ko ang buluhaton sang pagpangsalbar sang isa ka nabanhaw kag buhi nga Manluluwas—nga ginaupdan sang Balaan nga Espiritu, kasubong sa kay Juan.

Para sa akon kag sa tagsa sa aton, ang pagdumdom sa Manluluwas mahimo nga mas sobra sangsa pagsalig sa aton matandaan sang aton ihibalo kag mga inagihan upod sa Iya. Nagahimo kita sang mga pagpili tagsa ka adlaw nga nagapalapit pa gid sa aton sa Iya sa karon nga panahon.

Ang pinakasimple nga pagpili mahimo nga ang pagbasa sang balaan nga mga kasulatan. Sa paghimo sini, sarang kita makaangkon sang pamatyagan nga malapit kita sa Iya. Para sa akon, ang kalapit masami nagaabot kon magbasa ako sang Libro ni Mormon. Sa una nga mga minuto nga ginabasa ko ang mga kapitulo sa 2 Nefi, mabatian ko sa akon hunahuna ang mga tingug nanday Nefi kag Lehi nga ginalaragway ang Manluluwas nga dawsa kilala nila Sia sing personal. Nagaabot ang pamatyagan sang kalapit.

Sa inyo, ang iban nga bahin sang balaan nga kasulatan mahimo nga nagapalapit sa inyo sa Iya. Pero kon sa diin man kag kon san-o man nga basahon ninyo ang pulong sang Dios, nga may mapainubuson kag matuod-tuod nga katuyuan nga panumdumon ang Manluluwas, magatubo sa inyo ang inyo handum nga dalhon ang Iya ngalan sa inyo adlaw-adlaw nga pagpangabuhi.

Ang ina nga handum magabag-o sang pamaagi nga nagaalagad kamo sa Simbahan sang Ginuo. Magapangamuyo kamo para sa bulig sang Amay nga Langitnon agud himuon sing maayo bisan inang sa pamatyag ninyo isa ka gamay nga buluhaton. Ang bulig nga inyo pangayuon amo ang ikasarang sa pagkalipat sang inyo kaugalingon kag pagtutok pa gid sa kon ano ang luyag sang Manluluwas para sadtong imo dapat alagaran.

Nabatyagan ko ang Iya kamot kag ang Iya kalapit sa akon pag-alagad upod ang amon kabataan sang nagpangamuyo ako agud mahibal-an kon paano ko sila buligan nga makita ang kalinong nga ang ebanghelyo lamang ang nagadala. Sa amo sini nga tinion, wala ko ginapanumdom ang kabigon nga isa ka madinalag-on nga ginikanan, kundi ginaulikdan ko gid sing dako ang kadalag-an kag ikaayo sang akon kabataan.

Ang handum nga ihatag sa aton mga ginaalagaran ang kon ano ang igahatag sang Manluluwas sa ila nagatuga sang mga pangamuyo nga nagapakitluoy sa Amay nga Langitnon, sa ngalan gid ni Jesucristo. Kon nagapangamuyo kita sa amo sina nga paagi—sa ngalan sang Manluluwas, nga may pagtuo sa Iya—ang Amay nagasabat. Ginapadala Niya ang Balaan nga Espiritu sa paggiya, pagpasulhay, kag pagpaisog sa aton. Bangod kay ang Espiritu pirme nagasaksi sa Manluluwas (tan-awa sa 3 Nefi 11:32, 36; 28:11; Eter 12:41), ang aton ikasarang sa pagpalangga sa Ginuo sa bug-os naton nga tagipusuon, hunahuna, kag ikasarang nagatubo (tan-awa sa Marcos 12:30; Lucas 10:27; D&C 59:5).

Ang mga bugay sang pagdumdom sa karon kag sa adlaw-adlaw magaabot sing amat-amat kag tayuyon samtang nagaalagad kita sa Iya, nagapaayaw sa Iya pulong, kag nagapangamuyo nga may pagtuo sa Iya ngalan. Kag ang ining pagdumdom magamolde sa aton agud mangin matuod-tuod nga mga disipulo sang Ginuong Jesucristo sa Iya ginharian sa sini nga kalibutan—kag sa ulihi upod sa Iya Amay sa mahimayaon nga kalibutan nga magaabot.

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang First Presidency Message, October 2017 Hiligaynon. 97930 861

Pagtudlo gikan sa Sining Mensahe

Si Pangulong Eyring nagalaygay sa aton nga panumdumon pirme ang Manluluwas paagi sa paghimo sang adlaw-adlaw nga mga pagpili agud mangin mas malapit sa Iya. Upod sa inyo mga ginatudloan, mahimo ninyo basahon ang pang-sakramento nga mga pangamuyo, nga nagaplastar sang pangako nga panumdumon Sia pirme (tan-awa sa Moroni 4:3; 5:2; D&C 20:77, 79). Pamensara ang pag-agda sang inyo ginatudloan nga maglista sang mga butang nga sarang nila himuon tagsa ka adlaw agud panumdumon ang Manluluwas. Mahimo man ninyo pamensaron nga agdahon sila sa pagpangamuyo sa Amay nga Langitnon para sa kadalag-an kag kaayuhan sang kada isa. Pamensara ang magpangamuyo para sa ila sa amo man nga paagi.

• Ang Pagdumdom sa Ginuo Adlaw-adlaw

  Samantha Linton

• Dako Kaayo nga Pagpalangga