Cov Mus Saib Xyuas Tom Tsev tsab Xov, Kaum Hli Ntuj 2017
Muab Kev Hlub rau cov uas Mus Yuam Kev
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas Vajtswv cov ntxhais to taub lub hom phiaj ntawm lub Koom Haum Niam Tsev yuav npaj lawv li cas kom txais tau cov koob hmoov ntawm txoj sia nyob mus ib txhis?
Kev Ntseeg Tsev Neeg Kev Pab
Thawj Tswj Hwm Dieter F. Uchtdorf, tus Pab Cuam thib Ob hauv Thawj Pawg Thawj Tswj Hwm hais tias, “Qhov tseeb yog tsis muaj tsev neeg zoo tag nrho. Txawm nej tsev neeg muaj teeb meem dab tsi, txawm nej yuav tsum ua li cas kom kho tau, qhov tseem ceeb tshaj plaws yog kev siab hlub, Khetos txoj kev hlub dawb paug.”1
Hais txog cov uas tsis tshua muab siab rau ntseeg txoj moo zoo, Linda K. Burton, tus Tuam Thawj Tswj Hwm ntawm lub Koom Haum Niam Tsev dhau los, hais tias: “Leej Txiv Saum Ntuj Ceeb Tsheej hlub tag nrho Nws cov me nyuam. … Txawm lawv nyob qhov twg los—taug txoj kev los yog tawm txoj kev los—Nws xav kom lawv rov qab los tsev.”2
Thawj Tswj Hwm Joseph F. Smith (1838–1918) hais tias, “Txawm [koj cov me nyuam] yuav mus ua loj leeb npaum li cas los, … thaum koj hais lus rau lawv, cia li tsis txhob npau taws, tsis txhob ua nruj, los yog raug txim rau lawv. Cia li hais lus zoo rau lawv.”3
Txwj Laug Brent H. Nielson ntawm Pawg Xya Caum hais txog tej uas tus Cawm Seej piav rau cov uas muaj 10 lub nyiaj thiab poob ib lub: “Nrhiav mus txog thaum yus nrhiav tau. Thaum tus uas tau ploj lawm yog nej tus tub los sis tus ntxhais, nej tus kwv tij los sis nej tus muam, … tom qab peb ua txhua yam peb ua tau, peb yuav tsum hlub tus neeg ntawd kawg siab kawg ntsws. …
“Thov kom peb yuav txais kev tshwm sim kom peb paub zoo tias peb yuav ua li cas rau cov neeg uas poob thiab thaum yuav tsum ua, ua siab ntev thiab muaj kev hlub zoo li peb Leej Txiv Saum Ntuj Ceeb Tsheej thiab Nws Leej Tub, Yexus Khetos, thaum peb hlub, saib thiab tos ntsoov tus tub ua txhaum.”4
Thawj Tswj Hwm Henry B. Eyring, tus Pab Cuam thib Ib hauv Thawj Pawg Thawj Tswj Hwm, hais tias: “Kuv tau muaj siab rau ntseeg thov Vajtswv kom ib tug neeg uas kuv hlub yuav nrhiav thiab hnov lub hwj chim ntawm txoj Kev Theej Txhoj. Kuv tau muaj siab rau ntseeg thov Vajtswv kom tib neeg uas yog tim tswv yuav los pab lawv, thiab lawv yeej tau los.
“Vajtswv ntaus tswv yim los pab cawm Nws txhua tus me nyuam kom dim.”5
Vaj Lug Kub thiab tej Ntaub Ntawv Xov Xwm Ntxiv
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/17. Pub txhais ua lus Hmoob: 6/17. Kev txhais Visiting Teaching Message, October 2017. Hmong. 97930 295