Thawj Pawg Thawj Tswj Hwm tsab Xov, Kaum Hli Ntuj 2017
Hloov Los Ua cov Thwj Tim Tiag
Los ntawm Thawj Tswj Hwm Henry B. Eyring
Tus Pab Cuam thib Ib hauv Thawj Pawg Thawj Tswj Hwm
Nyob hauv txhua txoj kev sib ntsib txais lub cim nco txog, peb muaj cib fim cog lus rau Leej Txiv Saum Ntuj Ceeb Tsheej hais tias peb yeej yuav nco ntsoov tus Cawm Seej thiab ua raws li Nws tej lus txib peb thiaj yuav muaj Nws tus Ntsuj Plig nrog peb nyob (saib Maulaunais 4:3; 5:2; Q&K 20:77, 79). Yuav yooj yim rau peb nco ntsoov nws thaum peb ris Nws lub npe. Muaj ntau yam peb ua tau kom ris Nws lub npe tiam sis qhov tseem ceeb yog thaum peb ris Nws lub npe pab lwm tus, nyeem Nws tej lus dawb huv, thiab thov kom paub tias Nws xav kom peb ua li cas.
Twb muaj li no rau kuv thaum kuv muab ib tug tub hluas ua kev cai raus dej. Kuv paub tias tus Cawm Seej cov tub qhe uas Nws tau tsa tau hu kuv ua ib tug tub txib kom qhia Nws txoj moo zoo thiab ua tim khawv txog Nws thiab Nws lub Koom Txoos tseeb. Kuv tus khub wb tau cog lus rau tus tub hluas no hais tias yuav muab nws ntxuav kom huv dhau los ntawm lub hwj chim ntawm Yexus Khetos txoj Kev Theej Txhoj thaum tus tub hluas hloov siab lees txim nrog kev ntseeg tus Cawm Seej thiab cia Nws ib tug tub qhe uas Nws tso cai rau muab tus tub hluas ua kev cai raus dej.
Thaum kuv tsa tus tub hluas tawm cov dej ntawm lub dab ua kev cai raus dej, nws ntxhi lus hauv kuv pob ntseg hais tias, “Kuv huv lawm, kuv huv lawm.” Thaum tib lub sij hawm ntawd, kuv nco txog thaum Yauhas tau muab tus Cawm Seej ua kev cai raus dej nyob hauv tus Dej Yauladees. Tsis tas li ntawd xwb, kuv nco qab tias kuv twb ua txoj hauj lwm cawm tib neeg uas yog tus Cawm Seej uas tau sawv rov los thiab muaj txoj sia txoj hauj lwm—nrog rau tus Vaj Ntsuj Plig Dawb Huv, ib yam li Yauhas.
Rau kuv thiab rau peb txhua tus, peb ua tau ntxiv kom nco txog tus Cawm Seej tshaj qhov uas peb xav txog peb txoj kev txawj ntse thiab kev paub txog Nws xwb. Peb xaiv tau ua tej yam txhua hnub uas ua rau peb los nyob ze Nws niaj hnub nim no.
Tej zaum qhov yooj yim tshaj yog kev nyeem vaj lug kub. Thaum peb ua li ntawd, peb yuav hnov Nws nyob ze peb. Rau kuv mas, ua rau kuv nyob ze ntau tshaj thaum kuv nyeem Phau Ntawv Maumoos. Nyob hauv thawj ob peb feeb uas kuv nyeem tej tshooj ntawm 2 Nifais, ua rau kuv hnov Nifais thiab Lihais lub suab hauv kuv lub hlwb piav txog tus Cawm Seej zoo li nkawd paub Nws nkawd tus kheej. Ua rau kuv xav tias kuv nyob ze Nws.
Rau nej mas, tej zaus lwm nqe vaj lug kub ua rau nej los nyob ze Nws. Tiam sis thaum twg thiab qhov twg nej nyeem Vajtswv txoj lus, nrog kev txo hwj chim thiab kev xav nco txog tus Cawm Seej tiag tiag, nej yuav haj yam xav ris Nws lub npe hauv nej lub neej txhua hnub.
Qhov uas nej xav li ntawd yuav hloov nej txoj kev ua hauj lwm hauv tus Tswv lub Koom Txoos. Nej yuav thov Leej Txiv Saum Ntuj Ceeb Tsheej kom pab nej rau siab ua ib txoj hauj lwm txawm zoo nkaus li yog ib txoj hauj lwm me me xwb los. Kev pab uas nej thov yog kev pab nej tsis xav txog nej tus kheej thiab tsom ntsoov rau tej yam uas tus Cawm Seej xav ua rau cov uas Nws hu nej pab.
Kuv twb hnov tau Nws txhais tes pab thiab Nws txoj kev nyob ze thaum kuv ua hauj lwm pab wb cov me nyuam thaum kuv tau thov Vajtswv kom paub pab lawv nrhiav kev kaj siab lug uas los ntawm txoj moo zoo xwb. Thaum tej lub sij hawm zoo li no, ua rau kuv tsis xav txog qhov uas lwm tus saib kuv yog leej txiv zoo li cas, tiam sis kuv yeej xav kom kuv cov me nyuam tau zoo thiab vam meej.
Qhov uas peb xav pub tej yam uas tus Cawm Seej yuav pub rau lawv ua rau peb thov Vajtswv uas yeej yog kev taij thov Leej Txiv Saum Ntuj Ceeb Tsheej, los ntawm Yexus Khetos lub npe tiag tiag. Thaum peb thov li ntawd—los ntawm tus Cawm Seej lub npe, nrog kev ntseeg Nws—Leej Txiv yeej yuav teb. Nws xa tus Vaj Ntsuj Plig Dawb Huv los coj peb, nplij peb lub siab, thiab yaum peb. Vim tus Ntsuj Plig yeej ua tim khawv txog tus Cawm Seej (saib 3 Nifais 11:32, 36; 28:11; Ethaws 12:41), ua rau peb txoj kev txawj hlub tus Tswv kawg siab kawg ntsws, kawg dag kawg zog (saib Malakaus 12:30; Lukas 10:27; Q&K 59:5).
Cov koob hmoov ntawm kev nco txog Nws tam sim no thiab txhua hnub yuav maj mam los zuj zus thaum peb ua hauj lwm rau Nws, mloog ntsoov Khetos tej lus, thiab muaj kev ntseeg thov Vajtswv los ntawm Nws lub npe. Thiab txoj kev nco ntsoov no yuav ua rau peb hloov los ua cov thwj tim tseeb ntawm tus Tswv Yexus Khetos nyob hauv Nws lub nceeg vaj hauv lub ntiaj teb no—thiab nrog Nws Leej Txiv nyob hauv lub ntuj tom ntej uas muaj yeeb koob.
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/17. Pub txhais ua lus Hmoob: 6/17. Kev txhais First Presidency Message, October 2017. Hmong. 97930 295