Mulwol ni Ngan Fil ni Ngan Nang, October 2017
Kani ‘ing ko Tu’ufeg e pi cha’ ni kar Palog Gad
Meybil nge bi’eg fapi babyor mag pir’eg e tin ngam mog. Urogon ni ngan nang fan e Relief Society me ayuweg pi fak Got nib ppin ko fapi tawa’ath ni fan ko yafos ni manemus?
Mich Tabinaew Ayuw
“Ma bin nib riyul’ e dariy rebe tabinaew ni ba fel’ … ,” ni yoeg President Dieter F. Uchtdorf, Second Counselor ko Bin Som’on e Presidency. “Demutrug ko mang e magawon e be buch u tabinaew rom, demutrug rogon ni ngan ngongoliyed nge aw e gapas, re tabolngin nge fare tungun e puf riy e tu’ufeg, fare tu’ufeg rok Kristus nib machalbog.”1
Ma pi cha’ ni gathi ri yad be ngongoliy kanawo’en e gospel, Linda K. Burton, former General President ko Relief Society, e ga’ar: “Chitamangiy ni bay u Tharmiy e ba tu’uf gubin pi fak rok. … Ni demutrug e gin ni yad bay riy—u daken fa wuru’ e kanawo’—ma ba’adag ni yad ra sul nga tabinaew.”2
“Demutrug e gin nib sor [pi fakam] ngay, … ma nap’an ni gara noen ngorad, ma dabmu noen u fithik e domomuw, dabmu noen u fithik e mangach, mu noen u fithik e sumunguy ko kan,” ni fil President Joseph F. Smith (1838–1918). “Mu non ngorad u fithik e munguy.”3
Elder Brent H. Nielson ko fare Medlupi Ragag e weliy e n’en ni yoeg fare Tabiyul ngak fapi cha’ ni bay 10 yang i silver me yan reb nga biyang: “Mu gay nge mada’ ko ngiyal ni kam pir’eg. Susun ni binem ni ke yan nga biyang e fakam ni pumoon fa ppin, walagem ni pumoon fa ppin, … ma kemus ni n’en ni ngad rin’ed e, nge tu’uf rodad e cha’nem u polo’ i gumircha’dad. …
“Day gi yaag ngom nge gaag fare yi’iy ni ngan nang rogon ni ngani noen ngak e pi cha’ ni kar oloboch gad nge, ngiyal’ nib tu’uf, ni nge gaa’ e guman’ nge tu’ufeg rok e Chitamangidad ni bay u Tharmiy nge Fak, Yesus Kristus, u nap’an ni gadad ra adag, yaliy, nge soen nag be’ ni nge rin’ rebe mang’ang.”4
President Henry B. Eyring, Bin Som’on e Counselor ko Bin Som’on e Presidency, e ga’ar: “Kugu meybil u fithik e l’agan’ ni fan ngak bee’ ni rib tu’uf rog ni nge gay me thamiy gelngin fare Atonement. Kugu meybil u fithik e l’agan’ ni fapi engel ni gidii’ e yad ra yib ra ayuw gad, nge mu’ marbad.
“Got e bay rogon ni ke fal’eg ni nge thapeg gubin e pi fak.”5
Boech e Scriptures nge Tin ni ngan Nangfan
© 2017 rok Intellectual Reserve, Inc. Bay mot’won ni gubin. Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg ni thin ko Visiting Teaching Message, October 2017. Yapese. 97930 905