Mga Pasidungog sa Lubong ni Elder Robert D. Hales
Oktubre 6, 2017, Salt Lake Tabernacle
Elder M. Russell Ballard sa Korum sa Napulog Duha ka mga Apostoles
“Mingawon ko sa akong minahal nga higala si Robert D. Hales. Dungan kaming nagserbisyo sobra sa 40 ka tuig sa lain-laing mga assignments ug mga committee isip mga General Authority sa Simbahan. Sa miaging pipila na ka tuig, nagtupad mi sa pagpanglingkod diha sa Korum sa Napulog Duha ka mga Apostoles. Mingawon mi sa kahait og salabutan ni Elder Hales ug usahay alegre nga mga komentaryo. Sa iyang maalamon nga tambag ug sa iyang lawom nga panabut … makamingaw usab namong tanan. …
“Niadtong Agosto 1991, si Bob nag-antus sa unang pag-ataki sa iyang kasingkasing …
“Sukad nianang panahona, mga isyu sa panglawas nagsunod-sunod na. Sa among pagtupad sa pagpanglingkod niining daghang mga tuig, nakasaksi ko sa dakong kaisug ug hingpit nga pagkamahalaron ni Robert D. Hales. Daghang mga higayon nga miduol ko, mihikap sa iyang bukton, ug migunit sa iyang kamot ug, sa gamay nga paagi, mibati sa kasakit ug kalisud nga iyang nasinati. …
“Ang akong minahal nga higala usa ka bayani kanako kanunay, ug nasayud ko nga nahupay na siya karon ug anaa sa kalinaw uban sa iyang minahal nga mga ginikanan, … sa ubang mga sakop sa pamilya, ug labaw sa tanan sa iyang pagbalik ngadto sa Iyang Langitnong mga Ginikanan ug sa iyang hinigugma nga Manluluwas, si Ginoong Jesukristo, nga maoy iyang gihatagan sa tanan isip usa sa Iyang pinili nga mga Apostoles.”
Presidente Russell M. Nelson, Presidente sa Korum sa Napulog Duha ka mga Apostoles
“Si Elder Hales usa ka bililhon nga sakop sa Korum sa Napulog Duha ka mga Apostoles sulod sa sobra sa 23 ka tuig. Ang iyang kontribusyon ngadto sa tibuok Simbahan ug ngadto sa matag sakop sa Korum dako kaayo. Wala siyay kakapoy sa iyang pangalagad. Sa iyang 42 ug tunga sa tuig isip General Authority, siya nakaapil sa hapit tanang konseho ug committee sa punoang buhatan sa Simbahan. Ang iyang kaalam, panabut, ug impluwensya adunay dakong epekto sa pagpadayon sa gingharian sa Dios sa tibuok kalibutan. …
“… Ang iyang labing dakong tinguha mao ang paghigugma ug pag-amuma ni Mary, sa pagserbisyo sa iyang bililhong pamilya ug sa mga miyembro sa Simbahan, ug mahimong maisugon nga tinun-an sa Ginoo nga iyang gitahud pag-ayo.
“Ang paglahutay ni Bob atubangan sa mga hagit sa panglawas kahibulongan. Nagpadayon siya bisan pa sa grabe nga makapaluya nga mga epekto sa walay hunong nga mga hagit sa iyang panglawas. Kami nga nagtan-aw kaniya natingala, giunsa man kini niya? …
“… Uban ang kaisug sa usa ka jet pilot, ang kalig-on sa usa ka tsampyon nga atleta, ang kamapainubsanon ug debosyon sa usa ka tinun-an sa Ginoo, si Elder Hales nakakompleto sa iyang misyon sa kinabuhi sa labing dalaygon nga paagi. Nakapasar siya sa mga pagsulay sa pagkamortal ug nakapauli uban ang labing taas nga mga pasidungog.”
Presidente Henry B. Eyring, Unang Magtatambag sa Unang Kapangulohan
“Nakaobserbar ko ni Elder Hales, nakatrabaho uban niya, ug nakakat-on gikan kaniya. Nagbinayloay kami og mga kasinatian nga nakapalugway ug nakapalig-on kanamo ug sa pipila nga misulay kanamo. Sa matag higayon ako nakat-on gikan kaniya ug nakakita kaniya nga milambo sa espirituhanong gahum.
“Usa sa espirituhanong gasa daw anaa kaniya sukad nga nakaila ko kaniya. Mao kini ang gasa nga usa ka hingpit nga maunungon nga higala. Mahimong ingnon ninyo nga gamay ra man na. Apan ang Ginoo Mismo mihatag og pasidungog ngadto sa Iyang mga Apostoles uban sa mga pulong sa pakighigala. …
“… Ang Ginoo miklaro unsa nga gahum ang maangkon sa maong higala, kinsa mibiya sa kalibutan aron sa pagserbisyo sa Ginoo:
“’Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo’ (D&P 84:88). …
“Karon, manghinaut ko nga ang mga kaliwat ni Elder Hales, ug ang tanan nga nagmahal kaniya, mobasa niadtong mga pulong sa Ginoo nga naghulagway ni Robert D. Hales, usa ka hingpit nga maunungon nga higala ug tinun-an. …
“… Saksi ako kon giunsa niya pagpasar sa mga pagsulay sa iyang pagkamaunungon ngadto sa unsay iyang nailhan nga gusto sa iyang higala nga Dios.”