Elder Robert D. Hales: Usa ka MADUNGGANON Kinabuhi
“Oh, kon ako adunay tingog ug trumpeta sa usa ka anghel nga makasulti ko sa tanang katawhan nga [si Jesukristo] nabanhaw ug nga buhi siya; nga siya ang Anak sa Dios, ang Bugtong Anak sa Amahan, ang gisaad nga Mesiyas, ang atong Manunubos ug Manluluwas; nga siya mianhi niini nga kalibutan sa pagtudlo sa ebanghelyo pinaagi sa ehemplo. Ang iyang balaan nga misyon gidirekta nganha kaninyo ug kanako sa pagduol kaniya ug siya mogiya nato ngadto sa kinabuhing dayon.”1
Hapin: gilitratohan ni Stuart Johnson, Deseret News
Sa dihang si Elder Robert D. Hales nagserbsiyo isip usa ka jet fighter pilot sa U.S. Air Force atol sa 1950’s, ang mga sakop sa iyang squadron migamit og motto sa pagdasig kanila sa ilang mga katungdanan.
“Ang among unit motto—gibutang diha sa kilid sa among eroplano—mao ang ‘Mopauli nga Madungganon,’” si Elder Hales misulti sa mga tighupot sa priesthood niadtong 1990 samtang nagserbisyo isip Presiding Bishop. “Kini nga motto mao ang nagpahinumdom namo kanunay sa among determinasyon sa pagpauli ngadto sa among panimalay nga madungganon human gihimo namo ang tanang paningkamot nga malampuson namong makompleto ang matag aspeto sa among misyon.”2
Si Elder Hales, kinsa namulong kanunay nga mopauli nga madungganon, nagtuo nga ang tanang mga anak sa Langitnong Amahan matabangan sa ilang mahangturong dalan pinaagi sa paggamit niini nga motto sa ilang mga kinabuhi. Tungod kay ang matag adlaw sa kinabuhi usa ka misyon, mitudlo siya, “Kinahanglan nga atong hinumduman kinsa kita ug ang atong mahangturong tumong nga ‘Mopauli nga Madungganon,’ uban sa atong mga pamilya, ngadto sa presensya sa atong Langitnong Amahan.”3
Sa iyang mga katungdanan isip bana ug amahan, business executive, ug General Authority sa Ang Simbahan ni Jesukristo sa mga Santos sa Ulahing mga Adlaw kapin sa 40 ka tuig, nahinumdom si Elder Hales kinsa siya ug milihok sa saktong paagi. Ug pinaagi sa iyang pagkamatinud-anon, pagkamasulundon, pagkamakugihon, ug pagserbisyo, iyang gigamit ang motto sa iyang squadron sa iyang tibuok mortal nga kinabuhi.
Usa ka Suod nga Pamilya
Si Robert Dean Hales natawo sa Siyudad sa New York, USA, niadtong Agosto 24, 1932, ang ikatulo sa tulo ka anak nga natawo ngadto nila ni J. Rulon Hales ug Vera Marie Holbrook Hales. Nagdako si Robert sa duol nga Long Island sa usa ka panimalay nga nagsunod sa ebanghelyo. Ang iyang mga ginikanan nagserbisyo sa lain-laing mga calling sa Simbahan, lakip na isip stake missionaries, ug matag Dominggo ang pamilya mobiyahe og 20 ka milya (32 km) sa pagtambong sa Queens Ward.
“Suod kami nga pamilya,” nahinumdom si Elder Hales. Gitawag niya ang iyang panimalay sa pagkabata nga “usa ka matahum nga dapit samtang magdako” ug ang iyang pamilya “usa ka tinubdan sa kalig-on.”4
Ang maayong mga ehemplo nga gipakita sa iyang mga ginikanan nahimong handuman nga naggiya sa iyang kinabuhi.5 “Nagsunod sila sa ebanghelyo, nagtuon sa mga kasulatan, ug nagpamatuod sa Dios nga Amahan ug sa iyang Anak nga si Jesukristo,” miingon si Elder Hales. “Nagpamatuod usab sila ni Propeta Joseph Smith.”6
Sa bata pa nakat-on siya nga “ang yawe sa paglig-on sa atong mga pamilya mao ang pagbaton sa Espiritu sa Ginoo diha sa atong mga panimalay.”7
Ang iyang inahan, kinsa nagserbisyo labaw sa 30 ka tuig sa Relief Society, gitudloan si Robert og gugma ug serbisyo samtang dad-on niya siya sa pagserbisyo sa kabus ug timawa.8 Ang iyang amahan, usa ka professional artist sa Siyudad sa New York City, mitudlo ni Robert og malungtarong mga leksyon bahin sa priesthood ug sa Pagpahiuli. Sa usa ka okasyon, iyang gidala si Robert ngadto sa Susquehanna River, diin nadawat nila ni Joseph Smith ug Oliver Cowdery ang Aaronic Priesthood gikan ni Juan Bautista. Sa laing okasyon, iyang gidala si Robert ngadto sa Sagrado nga Kakahoyan.
“Nag-ampo mi didto sa kakahoyan ug mipadayag sa among tinguha nga magmatinuoron ug magmatinud-anon sa priesthood nga among gihuptan,” nahinumduman niya. “Unya si Papa mipintal og litrato sa lugar diin siya nag-ampo ug mihatag niini kanako isip pahinumdom sa among mga saad nga gihimo nianang adlawa. Nagbitay kini sa akong opisina karon ug nagsilbi nga pahinumdom matag adlaw sa akong sagrado nga kasinatian ug mga saad nga gihimo uban sa akong yutan-ong amahan ingon man usab sa akong Langitnong Amahan.”9
Usa ka baseball player sa batan-on pa siya, si Robert dayon midula sa high school ug college, ug niadtong 2007 siya ang milabay sa ceremonial first pitch sa usa ka propesyunal nga dula.
Gilitratohan ni Sonja Eddings Brown
Isip usa ka batan-on, ganahan si Robert modula og baseball, og sa katapusan nakadula gyud alang sa University of Utah. Sa nagsakay na sila og bus pauli human sa iyang unang dula sa laing lungsod uban sa high school varsity team, ang ninth-grader gikulbaan sa kinaiya ug pinulongan sa iyang mga kauban sa team. Sa paglig-on ni Robert, ang iyang amahan nagdrowing og litrato sa usa ka knight.
“Samtang nagdrowing ug nagbasa siya sa kasulatan, nasayran nako kon unsaon nga mahimong matinud-anong naghupot sa priesthood—sa pagpanalipod sa gingharian sa Dios. Ang mga pulong ni Apostol Pablo mao ang akong giya” (tan-awa sa Mga Taga-Efeso 6:13–17).
Naghunahuna niana nga leksyon paglabay sa mga katuigan, mitudlo si Elder Hales, “Kon matinud-anon kita sa priesthood, kining hinagiban ihatag kanato isip gasa sa Dios. Nagkinahanglan kita niini nga hinagiban!”10
Nakakat-on og laing importante nga hiyas si Elder Hales gikan sa ehemplo sa iyang amahan.
“Nakat-on ko sa pagtahud sa pagkababaye gikan sa malumong pag-atiman sa akong amahan sa akong inahan, sa akong igsoong babaye, ug sa iyang igsoong mga babaye,” miingon siya. Human na-stroke ang mama ni Elder Hales, ang “mahigugmaong pag-amuma sa iyang amahan alang sa iyang minahal nga kompanyon” sa katapusang duha ka tuig sa iyang kinabuhi nahimong ehemplo nga dili gayud niya makalimtan. “Giingnan ko niya nga gamay ra kaayo kini nga bayad sa sobra sa singkwenta ka tuig sa mahigugmaong debosyon sa akong inahan ngadto kaniya.”11
Ang Iyang Pinakabahandi
Samtang didto sa ila gikan sa kolehiyo niadtong 1952, nahimamat ni Robert ang usa ka batan-ong babaye nga ginganlan og Mary Crandall, kansang pamilya bag-o lang mibalhin ngadto sa New York gikan sa California. Ang duha nagkagustuhay dayon.
“Human nako siya mahimamat, wala na ko makig-date og lain,” nahinumdom si Elder Hales.12
Pagkahuman sa summer, ang duha mibalik ngadto sa Utah aron moeskwela. Si Robert mieskwela sa University of Utah samtang si Mary mieskwela sa Brigham Young University, apan wala nila tuguti ang gilay-on mobulag kanila. Pagkahuman sa school year, naminyo sila sa Salt Lake Temple niadtong Hunyo 10, 1953. Sa misunod nga lima ka tuig napanalanginan sila og duha ka mga anak nga lalaki, sila si Stephen ug David.
Human mogradwar si Robert niadtong 1954 sa degree sa communications ug business, misulod siya sa active duty sa air force, isip usa ka jet fighter pilot. Sa dihang nahuman na ang iyang pagserbisyo dul-an sa upat ka tuig, gibalhin niya ang iyang pamilya gikan sa Florida ngadto sa Massachusetts aron padayunon ang master’s degree sa business administration. Samtang naningkamot sa iyang kapasidad sa Harvard Business School, gitawag siya nga presidente sa elders quorum. Mao ra kini ang panahon sa iyang kinabuhi nga naghunahuna kon modawat ba siya og calling sa Simbahan.
“Adunay kahigayunan nga mahagbong ko sa akong pag-eskwela kon mahimo kong presidente sa elders quorum,” gisultihan niya si Mary.
Mitubag si Mary uban sa mga pulong nga makatabang niya sa nahibilin sa iyang kinabuhi: “Bob, mas ganahan ko nga adunay aktibo nga tighupot sa priesthood kay sa usa ka tawo nga naghupot og master’s degree gikan sa Harvard.” Dayon iyang giagbayan siya ug midugang, “Buhaton nato kanang duha.”13
Ug ila kining gibuhat.
Pagkasunod adlaw gibong-bongan ni Mary ang bahin sa wala pa mahuman nga basement sa ilang apartment aron dunay lugar katun-an si Robert nga dili madisturbo.
“Akong gisalig sa mga kamot sa Ginoo sa dihang mihimo ko niana nga desisyon” sa pagdawat sa calling, sulti ni Elder Hales paglabay sa 30 ka tuig. “Kana nga desisyon mas lisud himoon kaniadto kay sa dihang, paglabay sa mga tuig, gidawat nako ang tawag nga moserbisyo isip Assistant ngadto sa Napulog Duha ug mibiya sa akong negosyo.”14
Paglabay sa katuigan, human nasiguro na ang pinansyal sa iyang pamilya, si Elder Hales nagplano nga palitan si Mary og mahalon nga coat. Sa dihang nangutana siya ni Mary unsay iyang hunahuna sa iyang giplano nga pagpalit, nangutana si Mary, “Paliton ba nimo kini alang kanako o alang kanimo?”
Gitawag ni Elder Hales ang iyang pangutana nga “usa ka dili makalimtan nga leksyon.” Nakaobserbar siya: “Sa laing pagkasulti, nangutana siya, ‘Ang tuyo ba niini nga gasa aron sa pagpakita sa imong gugma kanako o ipakita ngari kanako nga ikaw maayong tigsangkap o aron adunay ikapakita sa kalibutan?’ Akong gihunahuna ang iyang pangutana ug akong naamguhan nga wala diay kaayo ako maghunahuna alang kaniya ug sa among pamilya ug mas labaw nga naghunahuna alang kanako.”15
Nakahibalo si Elder Hales nga ang iyang asawa mao ang iyang pinakabahandi.16 “Dili unta ako ingon ani karon kon wala pa siya,” miingon siya. “Gimahal ko siya pag-ayo. Aduna siyay mga gasa sa Espiritu. Magdungan mi sa pagtuon sa mga kasulatan, ug daghan sa mga konsepto nga akong gitudlo miabut tungod kay magtuon ug mag-ampo mi isip kompanyon. Mao nga ako mao karon.”17
Gipahinungod ni Elder Hales unsay nakab-ot niya ug ni Mary sa kinabuhi ngadto sa ilang relasyon isip team. “Kanunay mi nga team ug magpabilin nga team. Sa akong hunahuna sa pagpaminaw sa akong asawa, sunod sa pagpaminaw sa Espiritu Santo, mao ang labing importanting impluwensya sa akong kinabuhi.”18
“Ikaw Adunay Daghang mga Misyon”
Human makagradwar si Robert sa iyang MBA niadtong 1960, propesyunal nga mga oportunidad daling miabut sa iyang kinabuhi. Sa misunod nga 15 ka tuig nagserbisyo siya isip usa ka senior executive sa daghang inila nga mga kompaniya sa Estados Unidos. Ang iyang nabantog nga business career midala kaniya ug sa iyang pamilya ngadto sa daghang mga siyudad sa Amerika ingon man usab ngadto sa England, Germany, ug Spain. Kadtong mga pagbalhin nakahatag og mga calling sa pagpangulo diha sa Simbahan, nga andam nga gidawat ni Robert.
Nagserbisyo siya sa mga kapangulohan sa branch sa Spain, Germany, ug sa Estados Unidos sa Georgia ug Massachusetts. Nagserbisyo siya isip bishop sa Frankfurt, Germany, ug sa Massachusetts ug Illinois, USA. Nagserbisyo siya isip high councilor sa London, England, ug Boston, Massachusetts, diin nagserbisyo usab siya sa kapangulohan sa stake. Sa Minnesota ug Louisiana, USA, nagserbisyo siya isip usa ka regional representative.
Niadtong 1975, samtang nagtambong og business board meeting, nakadawat si Robert og pahibalo nga si Presidente Marion G. Romney (1897–1988), Ikaduhang Magtatambag sa Unang Kapangulohan kaniadto, anaa sa telepono. Sa dihang gitubag ni Robert ang telepono, si Presidente Romney mitawag kaniya nga moserbisyo isip presidente sa misyon. Gidawat ni Robert ang tawag, apan sa wala pa siya makasugod sa iyang mga katungdanan sa ulahing bahin nianang tuiga isip presidente sa England London Mission, nakadawat siya og laing tawag gikan sa Siyudad sa Salt Lake, niining higayuna gikan ni Presidente Spencer W. Kimball (1895–1985).
“Mahimo bang moserbisyo ka og mas taas kay sa tulo ka tuig?” Nangutana si Presidente Kimball. Human makasulti si Robert nga mahimo ra, si Presidente Kimball mitawag kaniya isip usa ka assistant ngadto sa Korum sa Napulog Duha ka mga Apostoles.
Si “Presidente Kimball misulti nako nasayud siya nga ako nahigawad tungod kay gusto ko nga mosebisyo isip presidente sa misyon,” miingon si Elder Hales. Apan si Presidente Kimball mihatag niya og kasiguroan, “Ayaw kabalaka bahin niana; ikaw adunay daghang mga misyon.”19
Paglabay sa usa ka tuig, si Elder Hales gitawag ngadto sa Unang Korum sa Seventy. Niana nga kapasidad paglabay sa tulo ka tuig, gitawag siya pag-usab nga moserbisyo isip presidente sa England London Mission ug dayon isip area supervisor sa Europe, nagtrabaho uban ni Elder Thomas S. Monson sa pag-establisar sa ebanghelyo sa mga nasud nga nasira ngadto sa Simbahan ug sa pagpadayon sa pagtukod sa templo sa East Germany.20
“Usa sa akong dakong kalipay sa akong pagserbisyo sa Simbahan miabut panahon sa unang tulo ka tuig isip General Authority samtang mitabang ko pagplano og baynte siete ka mga area conference,” miingon si Elder Hales. “Ganahan ko nga mobiyahe uban sa mga sakop sa Unang Kapangulohan, sa mga Apostoles, sa mga General Authority, ug sa ubang mga lider ug makaila nila ug sa ilang mga asawa. Magtan-aw sa mga propeta, mga manalagna, ug mga tigpadayag nga mosaksi sa katinuod sa ebanghelyo ngadto sa mga Santos sa lain-laing mga nasud talagsaon kaayo.”21
Niiadtong 1985, si Elder Hales gitawag isip Presiding Bishop sa Simbahan. Ang iyang propesyunal nga kasinatian, ang iyang matinahurong pagdumala ug estilo sa pagpakigsabut, ug ang iyang gugma sa mga tawo nakapahimo niya nga angayan sa calling.
Presiding Bishop Hales mitabang sa pag-andam alang sa templo sa East Germany. Siya ug si Mary Hales (tunga) miapil (wala ngadto sa tuo) ni architect Emil Fetzer, Elisa Wirthlin, Elder Joseph B. Wirthlin, Frances Monson, ug Elder Thomas S. Monson pagpahinungod sa templo niadtong 1985.
Si Presidente Henry B. Eyring, Unang Magtatambag sa Unang Kapangulohan, nagserbisyo sa Presiding Bishopric uban ni Elder Hales. Gitawag niya si Elder Hales nga maalamon, ligdong, maunungon nga negosyante kinsa sensitibo sa mga tawo ug nasayud unsaon nga mahimo ang mga butang. “Gidala niya ang maong mga hiyas ngadto sa pagpangulo sa Presiding Bishopric,” miingon si Presidente Eyring.22
“Wala siyay pagpanglimbong,” miingon ang iyang asawa, si Mary. “Putli ang iyang kasingkasing ug gusto lang mobuhat sa matarung nga butang.”23
Lakip sa mga doktrina nga gihatagan og gibug-aton ni Elder Hales isip Presiding Bishop mao ang mga baruganan sa welfare. “Gialsa ko nimo, ug alsahon ko ikaw, ug magdungan ta sa pagsaka,” kanunay niyang isulti, nagkutlo sa usa sa iyang paborito nga mga panultihon.24
Nag-ampo siya nga ang mga Santos “makaamgo nga kita adunay gahum ug responsibilidad sa pagtabang niadtong nanginahanglan, isip mga tigpangalagad nga mga anghel alang ni Ginoong Jesukristo, nga kita higugmaon tungod kay kita naghigugma, hupayon tungod kay kita maloloy-on, pasayloon tungod kay kita nagpakita og kapasidad sa pagpasaylo.”25
Mga Pagtulun-an ug Pagpamatuod
Sa dihang si Elder Hales gipaluyohan ngadto sa Korum sa Napulog Duha ka mga Apostoles paglabay sa siyam ka tuig, niadtong Abril 2, 1994, ang iyang bag-ong calling nakahatag og kabug-at kaniya.
“Saysenta-y uno anyos na ko ug sa makausa nahimo kong bata pag-usab,” miingon siya atol sa iyang unang pakigpulong sa kinatibuk-ang komperensya isip usa ka Apostol. “Adunay mga lalaki nga naglingkod dinhi sa atubangan kinsa mga Apostoles na ug diha na sa Unang Kapangulohan nga katunga na sa akong edad.”
Miingon siya nga ang pagka-Apostol ni Jesukristo usa ka proseso—“usa ka proseso sa paghinulsol ug pagpaubos, sa pagtan-aw sa kaugalingon sumala sa gisugo kanato ug mangayo og kapasayloan ug kalig-on aron mahimo kon unsay angay nako.” Mihangyo siya sa pag-ampo sa mga Santos aron iyang “makuha ang espirituhanong kalig-on nga gikinahanglan aron ang akong tingog ug ang akong pagpamatuod ni Ginoong Jesukristo motuhop ngadto sa mga kasingkasing niadtong kinsa maminaw.”26
Sulod sa labaw na sa 20 ka tuig, ang apostolikanhong pagsaksi ni Elder Hales sa Manluluwas ug sa iyang pagpamatuod sa gipahiuli nga ebanghelyo mituhop ngadto sa mga kasingkasing sa mga Santos sa Ulahing mga Adlaw sa tibuok kalibutan. Ang iyang mga wali naglakip sa mga tema sama sa pamilya ug hugot nga pagtuo, mga pagsulay ug pagpamatuod, gugma ug pagkamainantuson, pagserbisyo ug pagkamasulundon, kaligdong ug kabubut-on.
Sa pagtudlo bahin sa maalamong paggamit sa kabubut-on, si Elder Hales mipakigbahin og istorya bahin sa usa ka higala kinsa nagserbisyo uban kaniya sa air force.
“Samtang nagbansay nga mahimong usa ka jet fighter nga piloto, … nagpraktis ako sa pagdesisyon kon kanus-a molukso gikan sa eroplano kon mosiga na ang pasidaan nga dunay sunog ug ang eroplano nagtuyok-tuyok na ug dili na nako kini makontrolar,” nahinumdom siya. “Nakahinumdom ako og usa ka higala nga wala maghimo niini nga pagpangandam. Mangita siya og paagi nga makalikay sa pagbansay sa simulator ug dayon molakaw aron magdula og golf o mag-swimming. Wala gayud siya makakat-on sa iyang mga paagi sa emerhensya! Pipila ka bulan ang milabay, nahitabo ang sunog sa iyang eroplano, ug nagtuyok-tuyok kini paingon sa yuta nga nagkayo. Nakabantay sa pagsiga sa pasidaan nga dunay sunog, ang iyang batan-on nga kauban, kay nakat-on pag-ayo og tubag sa signal nahibalo kon kanus-a molukso gikan sa eroplano ug luwas nga nagparakyut. Apan ang akong higala nga wala mangandam sa paghimo niana nga desisyon nagpabilin diha sa eroplano ug namatay sa pagkabangga.”
Ang pagkahibalo unsay buhaton ug kanus-a buhaton kon ang usa ka importante nga pagpili moabut na kini adunay mahangturong mga sangputanan, dugang pa ni Elder Hales.27
“Isip usa ka batan-on sa New York, ako nagtubo sa duha o tulo lamang ka buok miyembro sa Simbahan sa usa ka sekondarya nga tulunghaan nga may pipila ka libo. Sa bag-o pa lang nga 50-ka tuig nga panagtigum pag-usab [reunion], ang akong kanhi nga mga classmates nakahinumdom kon giunsa nako ang pagsunod sumala sa akong mga hiyas ug mga pagtuo. Akong naamgohan nga ang usa ka paglapas sa Pulong sa Kaalam o kalapasan sa mga hiyas sa moralidad nagpasabut nga dili na gayud ako makaingon, ‘Mao kini ang akong gituohan’ ug kasaligan sa akong mga higala.
“Mapaambit nato ang ebanghelyo sa panahon nga ato kining gisunod.”28
Atol sa hinapos nga mga tuig sa pangalagad ni Elder Hales, giawhag niya ang mga Santos nga magpuyo nga takus “sa talagsaong gasa sa Espiritu Santo.”29 Giawhag usab niya ang mga miyembro sa Simbahan sa pagpalambo sa ilang pagkatinun-an pinaagi sa pagkahimong maayong mga Kristiyano, pagbaton og Kristohanong kaisug, ug pagbarug nga lig-on sa balaan nga mga dapit.
“Kini mao ang tawag ni Kristo sa tanang Kristiyano karon: ‘Pakan-a ang akong mga nating karnero. … Pakan-a ang akong mga karnero’—ipaambit ang akong ebanghelyo sa batan-on ug sa tigulang, nagdasig, nagpanalangin, naghupay, nag-awhag, ug naglig-on kanila, ilabi na niadtong lahi ang hunahuna ug gituohan kay kanato,” mitudlo siya.30
Gilitratohan Jeffrey D. Allred, Deseret News
Kabahin niadtong kinsa “gusto nga kita mokanaog gikan sa taas nga nahimutangan ug moapil sa ilang dili maayong relihiyosong pundok,” gitambagan ni Elder Hales ang mga Santos sa Ulahing mga Adlaw sa pagtubag pinaagi sa ilang mga pagpamatuod ug sa pagbarug uban sa Manluluwas.
“Atong gipakita ang Iyang gugma, nga mao lamang ang bugtong gahum nga makabuntog sa kaaway ug motubag sa mga tig-akusar kanato sa walay pagbalus og akusar kanila. Dili kana kahuyang. Kana mao ang Kristohanong kaisug.”31
Sama nga ang Manluluwas “gitamay ug gisalikway siya sa mga tawo” (Isaias 53:3; Mosiah 14:3), ang mga Santos sa Ulahing mga Adlaw tingali makasinati usab nga nasaypan, pagsaway, ug bakak nga mga akusasyon. “Sagrado natong pribilehiyo nga mobarug uban Kaniya!” Miingon si Elder Hales.32
Naghulat Sa Ginoo
Sa dihang namulong si Elder Hales bahin sa paghulat sa Ginoo, nakahibalo kaayo siya sa iyang hilisgutan. Mga problema sa kasingkasing, dagkong mga operasyon, ug bag-ong mga problema sa panglawas nga nakapugong niya sa pagpamulong atol sa kinatibuk-ang komperensya sa Abril 2011 nga mikuha sa pisikal nga kahimsog apan nakahatag niya og espirituhanong panabut.
Human maayo gikan sa tulo ka dagkong mga operasyon niadtong 2000, iyang giingnan ang mga Santos sa Ulahing mga Adlaw: “Sa miaging duha ka tuig, naghulat ko sa Ginoo sa mortal nga mga leksyon nga itudlo kanako sa mga panahon sa pisikal nga mga kasakit, mental nga kasubo, ug pagpamalandong. Nakat-on ko nga ang makanunayon, tumang kasakit mao ang usa ka talagsaon nga mapahinunguron nga tigpalunsay nga makapahimo natong mapaubsanon ug mahiduol ngadto sa Espiritu sa Dios.”33
Dili kinahanglan nga atubangon nato ang mga hagit nga mag-inusara tungod kay makahangyo kita “sa katapusang tig-atiman,” mitudlo si Elder Hales.34 “Usahay, kon pagbuot sa Ginoo, ako pagahupayon sa mga pagbisita sa langitnong mga panon nga naghatag og kahupayan ug mahangturong mga pagpasalig diha sa panahon sa akong panginahanglan.”35
Bisan og wala kita makahibalo kanus-a o sa unsang paagi nga ang atong mga pag-ampo matubag, mipamatuod si Elder Hales, ang mga tubag moabut sa kaugalingong pamaagi sa Ginoo ug sumala sa Iyang panahon. “Ang ubang tubag tingali kinahanglan natong hulaton hangtud sa sunod nga kinabuhi. … Dili kita mohunong sa pagsalig sa Ginoo. Ang Iyang mga panalangin mahangturon, dili temporaryo.”36
“Duna koy pribilehiyo nga makatrabaho uban sa labing buotan nga Kaigsoonan niini nga yuta.” Ang mga pulong nga gipamulong sa dihang gi-release isip Presiding Bishop nagmatuod usab nga matinud-anon isip usa ka Apostol.
Litrato sa maayong kabubut-on sa Deseret News Archive
Gilitratohan ni Stuart Johnson, Deseret News
Usa ka Matinud-anon nga Tinun-an
Isip Presiding Bishop, si Elder Hales nagpamatuod sa paghinumdom ni Alma ang Batan-on. Mipahayag siya: “Oh, kon aduna pa unta akoy tingog ug trumpeta sa usa ka anghel aron akong masultihan ang tanang mga tawo nga si [Jesukristo] nabanhaw ug nga siya buhi; nga siya Anak sa Dios, ang Bugtong Anak sa Amahan, ang gisaad nga Mesiyas, ang atong Manunubos ug Manluluwas; nga mianhi siya sa kalibutan aron sa pagtudlo sa ebanghelyo pinaagi sa ehemplo. Ang iyang balaan nga misyon gidirekta kaninyo ug kanako sa pagduol ngadto kaniya ug siya mogiya nato ngadto sa kinabuhing dayon.”37
Sa iyang unang pakigpulong sa kinatibuk-ang komperensya human matawag ngadto sa Korum sa Napulog Duha ka mga Apostoles, iyang gikutlo si Mormon, gihimo ang pagpamatuod sa karaang propeta nga iyaha: “Tan-awa ako usa ka tinun-an ni Jesukristo, ang Anak sa Dios. Ako tinawag kaniya aron sa pagpahayag sa iyang pulong diha sa iyang mga katawhan, aron sila unta makabaton og kinabuhi nga walay katapusan” (3 Nephi 5:13).38
Sa upat ka dekada isip General Authority, si Elder Robert D. Hales maisugon ug gamhanang mipahayag sa mga pulong sa Manluluwas pinaagi sa iyang mga pakigpulong ug ehemplo sa kinabuhi. Ug siya nakahinumdom sa iyang kaugalingong tambag sa iyang personal, propesyunal, ug eklesiastikanhong kinabuhi: “Pinaagi sa matinud-anong pagkamasulundon ug paglahutay hangtud sa katapusan, kita sa umaabut nga adlaw mopauli nga madungganon ngadto sa presensya sa atong Langitnong Amahan ug sa iyang anak nga si Jesukristo.”39
Alang sa mga Santos sa Ulahing mga Adlaw kinsa nakig-ambit sa iyang hugot nga pagtuo sa Manluluwas, si Elder Hales wala mawala. Hinoon, nakapauli na siya—ug nahimo niya kini nga madungganon.