Saafiafiga mai le Falelauasiga o Elder Robert D. Hales

6 Oketopa, 2017, Tapeneko i Sate Leki

Elder M. Russell Ballard o le Korama a Aposetolo e Toasefululua

“O le a ou misia lava la’u uo pele o Robert D. Hales. Na ma auauna atu faatasi mo le silia ma le 40 tausaga i tofiga ma komiti eseese o ni Pulega Aoao o le Ekalesia. I nai tausaga ua mavae atu, sa ma saofafai ai i talaane o le tasi ma le isi i le Korama a le Toasefululua. O le vave o le mafaufau o Elder Hales ma o nisi taimi o ana saunoaga malie tele, o le a misia. O ana fautuaga atamai ma lona malamalamaaga loloto … o le a misia tele foi e i tatou uma. …

“Ia Aokuso 1991, sa mafatia ai Bob i lona ma’i oso muamua lava o le fatu. …

“Mai lena lava taimi, sa oo mai ai lea faafitauli ma lea faafitauli faalesoifua maloloina. A o matou saofafai faatasi ai i le aluga o le tele o tausaga, sa ou molimauina ai lava le lototele naua ma le tuuto atoa o Robert D. Hales. E tele taimi na ou aapa atu ai, pa’i atu i lona aao, ma u’u lona aao ma, i se ala faatauvaa, sa ou lagonaina ai le tiga ma le faigata o loo ia lagonaina. …

“Sa avea pea la’u uo pele ma se toa ia te a’u, ma ou te iloa ua maua nei lona toomaga ma o loo filemu faatasi ma ona matua peleina, … ma isi tagata o le aiga, ae o le mea sili lava o mea uma o lona toefoi atu e faatasi ma ona Matua Faalelagi ma lona Faaola pele, le Alii o Iesu Keriso, o le na ia tuu atu i ai ana mea uma a o avea ai ma se tasi o Ana Aposetolo filifilia.”

Peresitene Russell M. Nelson, Peresitene o le Korama a Aposetolo e Toasefululua

“O Elder Hales o se uso taua tele o le Korama a Aposetolo e Toasefululua mo le silia ma le 23 tausaga. O ana saofaga i le Ekalesia atoa ma i uso taitasi o le Korama e le lava upu e faamatala ai. Sa le vaivai o ia i lana auaunaga. I ona tausaga e 42 ma le afa o se Pulega Aoao, sa auai ai o ia i le toetoe o aufono ma komiti uma i le laumua o le Ekalesia. O lona atamai, malamalamaaga, ma faatosinaga na maua ai se aafiaga loloto i le taavale atu i luma o le malo o le Atua i le kelope atoa. …

“… O lona faanaunautaiga sili ona loloto o le faamemelo atu lea ma le tausiga o Mary i taimi uma, ia auauna atu i lona aiga pele ma tagata o le Ekalesia, ma avea ma se soo lototele o le Alii, o le na ia matua faaaloalo tele i ai.

“O le onosai o Bob i le luluti o luitau o le soifua maloloina e logologoā. Sa ia faaauau pea e ui i aafiaga ogaoga faataumaoi o luitau faifai pea o lona soifua maloloina. O i tatou sa vaavaai atu ia te ia ma tuufesilisili, na mafai faapefea ona ia faia? …

“… Faatasi ai ma le lototele o se pailate vaalele, le mausali o se afeleti siamupini, le lotomaualalo ma le tuuto o se soo o le Alii, ua faamaea ai e Elder Hales lana misiona o le olaga i se ala sili o faataitaiga. Ua pasi ana suega o le olaga faaletino ma ua toefoi atu i le aiga ma ni faamamaluga aupito sili ona maualuluga.”

Peresitene Henry B. Eyring, Fesoasoani Muamua i le Au Peresitene Sili

“Sa ou matauina Elder Hales, galulue faatasi ma ia, ma aoao mai ia te ia. Sa ma fefaasoaia ni aafiaga na faalauteleina ma faamalosia ai maua ma o nisi na tofotofoina ai i maua. I mea uma na tutupu na ou aoao mai ai ia te ia ma vaaia o ia o tuputupu ae i le mana faaleagaga.

“O se tasi o meaalofa faaleagaga e foliga mai o ia e ana i le umi talu ona ou iloaina o ia. O le meaalofa lea o le avea ma se uo faamaoni atoatoa. E te ono faamasinoa lena mea o se malosiaga itiiti. Ae sa faamamaluina e le Alii Lava Ia Ana Aposetolo i upu o faigauo. …

“… Ua faamanino mai e le Alii le mana o le a alu atu faatasi ma se uo faapena, o le e lafoaia le lalolagi mo le galuega a le Alii:

“‘Ma ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga’ (MF&F 84:88). …

“O lenei, o lo’u faamoemoega e mo suli uma o Elder Hales, ma i latou uma e alolofa ia te ia, ia faitau i lena fetalaiga a le Alii e pei ona faamatalaina ai Robert D. Hales, o se uo ma se soo faamaoni atoatoa. …

“… Sa avea a’u ma molimau ola i le auala na ia pasia ai tofotofoga o lona faamaoni i mea na ia iloaina sa finagalo i ai lana uo, o le Atua.”