Elder Robert D. Hales: O Se Olaga Faamamaluina
“E, pe ana ia te a’u le leo ma le pu a se agelu e mafai ona ou fai atu i tagata uma ua toetu [Iesu Keriso] ma o loo soifua o ia; o ia o le Alo o le Atua, le Alo e Toatasi na Fanaua a le Tama, le Mesia folafolaina, lo tatou Togiola ma le Faaola; na afio mai o ia i lenei lalolagi e aoao mai le talalelei e ala i faataitaiga. O lana misiona paia ua tuusao mai ia te oe ma a’u ia o mai ia te ia ma o le a ia taitai atu i tatou i le ola e faavavau.”1
Faavaa: ata na pueina e Stuart Johnson, Deseret News
A o tautua ai Elder Robert D. Hales o se pailate o le fuavaalele tau i le Ea Fosi a le I.S. i le vaitau o le 1950, sa fai ai e sui o lana vaega se anavatau e uunaia ai i latou i o latou tiute.
“O le matou anavatau o le iunite—na tusia i autafa o a matou vaalele—o le “Toefoi Mai ma le Mamalu,’” sa ta’u atu ai e Elder Hales i le au perisitua i le 1990 a o auauna ai o le Epikopo Pulefaamalumalu. “O lenei anavatau o se faamanatu faifai pea ia i matou i lo matou naunautaiga e toefoi mai i lo matou nofoaga tutotonu ma le mamalu pe a mavae ai ona faia o a matou taumafaiga uma e faamaea ai ma le manuia vaega uma o la matou misiona.”2
O Elder Hales, o le na saunoa soo lava i le toefoi mai ma le mamalu, sa talitonu e mafai e fanau uma a le Tama Faalelagi ona maua se fesoasoani i lo latou ala e faavavau e ala i le faaaogaina o lenei anavatau i o latou olaga. Ona o aso taitasi o le olaga o se misiona, sa ia aoao mai ai, “E manaomia ona tatou manatua po o ai i tatou ma la tatou sini e faavavau e “Toefoi atu ma le Mamalu,’ e faatasi ma o tatou aiga, i le afioaga o lo tatou Tama Faalelagi.”3
I ona tiute o se tane ma se tama, se pule o pisinisi, ma se Pulega Aoao o Le Ekalesia e Iesu Keriso o le Au Paia o Aso e Gata Ai mo le silia ma le 40 tausaga, sa manatua e Elder Hales po o ai o ia ma sa galue e pei ona tatau ai. Ma sa auala atu i lona faatuatua, usiusitai, filiga, ma le auauna atu, sa ia faataitaia ai le anavatau a lana vaega i lona olaga atoa.
O Se Aiga Vavalalata
Sa soifua mai Robert Dean Hales i le Aai o Niu Ioka, ISA, i le aso 24 o Aokuso, 1932, o le lona tolu o le fanau e toatolu a J. Rulon Hales ma Vera Marie Holbrook Hales. Sa tuputupu ae Robert e latalata i Long Island i se aiga e faatotonugalemu i le talalelei. Sa auauna atu ona matua i le tele o valaauga o le Ekalesia, e aofia ai faifeautalai o le siteki, ma o Aso Sa uma e faimalaga ai lava le aiga i le 20 maila (32 km) e auai i le Uarota a Queens.
“O i matou o se aiga vavalalata,” sa faamatala ai e Elder Hales. Sa ia ta’ua lona aiga a o tamaitiiti, “o se nofoaga matagofie e ola ai” ma lona aiga “o se punavai o le malosiaga.”4
O faataitaiga lelei na faia e ona matua na avea ma manatuaga ia na taialaina ai lona olaga.5 “Sa la ola i le talalelei, sa suesue i tusitusiga paia, ma sa tuu atu molimau e uiga i le Atua le Tama ma Lona Alo o Iesu Keriso,” sa saunoa ai Elder Hales. “Sa la molimau atu foi e uiga i le Perofeta o Iosefa Samita.”6
A o talavou lava sa ia aoao ai e faapea “o le ki i le faamalosia o o tatou aiga o le i ai lea o le Agaga o le Alii e oo mai i totonu o tatou aiga.”7
O lona tina, sa auauna atu i le silia ma le 30 tausaga i le Aualofa, sa aoaoina Robert i le alofa ma le auauna atu a o ia aveina o ia e auauna atu i tagata matitiva ma le le tagolima.8 O lona tama, o se tusiata faapolofesa i le Aai o Niu Ioka, sa aoaoina Robert i lesona tumau e uiga i le perisitua ma le Toefuataiga. I se tasi taimi, sa ia aveina ai Robert i le Vaitafe o Susikuana, le nofoaga na maua ai e Iosefa Samita ma Oliva Kaotui le Perisitua Arona mai ia Ioane le Papatiso. I se isi taimi, sa ia aveina Robert i le Vao Paia.
“Sa ma tatalo faatasi i le vao paia ma faailoa atu o ma manaoga ina ia faamaoni ma faatuatua i le perisitua o loo ma umiaina,” sa ia saunoa ai. “Mulimuli ane sa valiina e tama se ata o le nofoaga sa ma tatalo ai ma tuu mai ia te a’u e fai ma faamanatu o a ma folafolaga na faia faatasi i lena aso. O loo tautau i lo’u ofisa i le asō ma o loo avea ma se faamanatu i aso taitasi o lo’u aafiaga paia ma folafolaga na faia ma lo’u tama faalelalolagi faapea ai foi ma lo’u Tama Faalelagi.”9
O se tagata taalo pesipolo a o talavou, mulimuli ane sa taalo ai Robert i le aoga maualuga ma le kolisi, ma i le 2007 sa ia togiina ai le polo muamua lava e tatala aloaia ai se taaloga faapolofesa.
Ata na pueina e Sonja Eddings Brown
A o avea ma alii talavou, sa fiafia Robert e taalo pesipolo, mulimuli ane sa taalo mo le Iunivesite o Iuta. I luga o le pasi a o toefoi atu i le fale mai lana taaloga muamua lava na faia i fafo atu o lona taulaga faatasi ma le au o le aoga maualuga, sa inoino ai le tamaitiiti vasega iva i nisi o amioga ma gagana a tama o lana au. Ina ia faamalosia Robert, sa tusi ai e lona tama se ata o se atamaioalii (knight).
“A o ia tusia ma faitau mai tusitusiga paia, sa ou aoao i le auala e avea ai ma se tagata faamaoni e umia le perisitua—e puipuia ma tu atu mo le malo o le Atua. Sa avea upu a le Aposetolo o Paulo ma o’u taiala” (tagai Efeso 6:13–17).
I le mafaufau ai i lena lesona i ni tausaga mulimuli ane, sa aoao mai ai Elder Hales, “Afai tatou te faamaoni i le perisitua, o le a tuuina mai ia i tatou lenei ofutau o se meaalofa mai le Atua. Tatou te manaomiaina lenei ofutau!”10
Sa aoaoina e Elder Hales se isi uiga taua mai le faataitaiga a lona tama.
“Sa ou aoaoina le faaaloalo mo tulaga faatamaitai mai le tausiga agamalu a lo’u tama mo lo’u tina, lo’u tuafafine, ma tuafāfine o lo’u tama,” sa ia saunoa ai. Ina ua mavae le mafatia ai o le tina o Elder Hales i le stroke, o le “tausiga alofa a lona tama mo lana soa faapelepele” i tausaga e lua na totoe o lona olaga na avea ma se faataitaiga sa lei galo lava ia [Elder Hales]. “Sa ia ta’u mai ia te a’u o sina totogi itiiti lea mo le silia ma le limasefulu tausaga o le tuuto atu ma le alofa o lo’u tina ia te ia.”11
O Lana Aseta Aupito Silisili
A o i ai i le fale [i se malologa] mai le kolisi i le 1952, sa feiloai ai Robert ma se tamaitai talavou e suafa ia Mary Crandall, o lona aiga faatoa masii atu lava mai Carolina i Niu Ioka. Sa vave lava ona fiafia le toalua lea i le tasi ma le isi.
“Ina ua ou feiloai ia te ia, ou te lei toe faamasani lava i se isi [tamaitai],” sa saunoa ai Elder Hales.12
Ina ua uma le taumafanafana, sa toe foi atu uma i laua i Iuta mo le aoga. Sa auai Robert i le Iunivesite o Iuta ae malaga Mary i le Iunivesite o Polika Iaga, ae la te le’i faatagaina le vavamamao e la te valavala ai. Sa le’i pine ina ua maea le tausaga aoga, sa la faaipoipo ai i le Malumalu o Sate Leki, i le aso 10 o Iuni, 1953. I le aluga o le isi lima tausaga na sosoo ai sa faamanuiaina ai i laua i ni atalii se toalua, o Stephen ma David.
Ina ua faauu mai Robert i le 1954 ma se faailoga i mea tau fesootaiga ma pisinisi, sa ia malaga ai i tiute fitoitonu i le ea fosi, sa tautua ai o se pailate o le fuavaalele tau. Ina ua maea lana tautua i le toetoe atoa le fa tausaga mulimuli ane, sa latou masii atu ma lona aiga mai Florida i Massachusetts e saili lona faailoga o le matuaofaiva i mea tau pulega o pisinisi. A o faloina ai lona gafatia i le Harvard Business School, sa valaauina o ia e avea ma peresitene o le korama a toeaina. Na o le pau lea o le taimi i lona olaga na ia tuufesili ai pe tatau ona ia taliaina se valaauga o le Ekalesia.
“E i ai se avanoa o le le pasi i la’u aoga pe a oo ina avea a’u ma se peresitene o le korama a toeaina,” sa ia ta’u atu ai ia Mary.
Sa tali atu Mary i ni upu sa fesoasoani ia te ia i le vaega atoa na totoe o lona olaga: “Bob, e sili atu ia te a’u le maua o se alii e umia ma le agavaa le perisitua nai lo o se alii e umia se faailoga o le matuaofaiva mai le Harvard. Ona ia faauouo mai lea ia te ia ma faaopoopo atu, “o le a ta faia faatasia.”13
Ma sa la faia.
O le aso na sosoo ai sa puipui ai e Mary se vaega o le falealalo e le’i maea o le la fale mautotogi ina ia mafai ai e Robert ona maua se avanoa e fai ai ana meaaoga e aunoa ma le faalavelaveina.
“Sa ou tuu atu a’u lava ia i aao o le Alii ina ua ou faia lena faaiuga” e talia le valaauga, sa saunoa ai Elder Hales i le 30 tausaga mulimuli ane. “Sa sili atu ona faigata ona fai lena faaiuga nai lo le taimi i ni tausaga mulimuli ane, na ou taliaina ai le valaauga e auauna atu o se Lagolago i le Toasefululua ma tuua ai la’u matata faapisinisi.”14
I ni tausaga mulimuli ane, i le faamautuina ai o le malupuipuia o mea tautupe a lona aiga, sa fuafua ai Elder Hales e faatau se pulupulu taugata mo Mary. Ina ua ia fesiligia Mary po o le a sona manatu i lana faatau ua fuafuaina, sa fesili mai o ia, “O e faatauina lenei ofu mo a’u pe mo oe?”
Sa ta’ua e Elder Hales lana fesili “o se lesona le mafaagaloina.” Sa ia matauina: “I se isi faaupuga, sa ia fesili mai, ‘Pe o le faamoemoega o lenei meaalofa o le faaalia ai o lou alofa mo a’u, pe ia faaali mai ia te a’u o oe o se tagata lelei e tausia a’u, pe ina ia faamaonia atu ai se mea i le lalolagi?’ Sa ou mafaufau loloto i lana fesili ma iloa ai sa itiiti lo’u mafaufau e uiga ia te ia ma lo ma aiga ae faasilisili ia te a’u.”15
Sa faamamaluina e Elder Hales lona faletua o lana aseta aupito silisili lea.16 “Semanu e le avea a’u ma tagata o i ai nei pe a na le seanoa ma ia,” sa ia saunoa ai. “Ou te alofa faapelepele ia te ia. O loo ia te ia ni meaalofa a le Agaga. Ma te suesue faatasi i tusitusiga paia, ma o le tele o mataupu ou te aoao atua e oo mai ona o a ma suesuega ma tatalo faalesoa. O le mafuaaga lena o le tagata ua ou avea ai.”17
E faamamaluina e Elder Hales le tele o mea na la ausiaina faatasi ma Mary i le olaga ona o le la mafutaga faalesoa. “Sa avea pea i ma’ua ma se vaega ma o le a avea pea ma se vaega. Ou te manatu o le faalogo i lo’u toalua, e sosoo ma le faalogo i le Agaga Paia, o le faatosinaga aupito sili lea ona taua i lo’u olaga.”18
“O Le A Tele Ni Au Misiona”
Ina ua faauu mai Robert ma lana MBA i le 1960, sa vave lava ona oo mai ni avanoa faalegaluega ia te ia. I le 15 tausaga na sosoo ai sa ia auauna ai o se pule sinia mo ni kamupani lauiloa i le Iunaite Setete. O lana matata tulaga ese faapisinisi na feaveaia o ia ma lona aiga i ni aai i Amerika faapea ai ma Egelani, Siamani, ma Sepania. O na feoaiga na oo mai ai ni valaauga faaleautaitai i le Ekalesia, ia na taliaina ma le loto i ai e Robert.
Sa ia auauna atu i au peresitene o paranesi i Sepania, Siamani ma i le Iunaite Setete i Georgia ma Massachusetts. Sa ia auauna atu o se epikopo i Frankfurt, Siamani, ma i Massachusetts ma Ilinoi, ISA. Sa ia auauna atu o se fautua maualuga i Lonetona, Egelani, ma Boston, Massachusetts, lea foi na ia auauna ai i le au peresitene o le siteki. I Minesota ma Lusiana, ISA, sa ia auauna atu ai o se sui risone.
I le 1975, a o auai i se fonotaga a se fono faatonu o pisinisi, sa maua ai e Robert se feau o Peresitene Marion G. Romney (1897–1988), o le taimi lena o loo avea ma Fesoasoani Lua i le Au Peresitene Sili, o loo i luga o le telefoni. Ina ua tali e Robert le telefoni, sa valaauina o ia e Peresitene Romney e auauna atu o se peresitene o se misiona. Sa talia e Robert le valaauga, ae a o le’i amatalia ona tiute i se taimi mulimuli ane o lena tausaga o le peresitene o le Misiona a Lonetona Egelani, sa ia maua se isi valaau mai le Aai o Sate Leki, o le taimi la lea sa mai ia Peresitene Spencer W. Kimball (1895–1985).
“E i ai se afaina pe a matou talosagaina oe e auauna atu mo se taimi umi atu nai lo le tolu tausaga?” Sa fesili ai Peresitene Kimball. Ina ua tali atu Robert e le afaina ia te ia, sa valaauina loa o ia e Peresitene Kimball e avea ma se lagolago i le Korama a Aposetolo e Toasefululua.
“Sa ta’u mai e Peresitene Kimball ia te a’u sa ia iloaina lava lo’u le fiafia ona sa ou manao ou te alu atu i fafo o se peresitene o se misiona,” sa saunoa ai Elder Hales. Ae sa toe faamautinoa atu e Peresitene Kimball ia te ia, “Aua e te popole fua; o le a tele ni au misiona.”19
I se tausaga mulimuli ane, sa valaauina ai Elder Hales i le Korama Muamua a Fitugafulu. I lena tulaga i le tolu tausaga mulimuli ane, sa toe valaauina foi o ia e avea ma peresitene o le Misiona a Lonetona Egelani ona sosoo ai lea ma se supavaisa o le eria i Europa, sa galulue faatasi ai ma Elder Thomas S. Monson e atiae le talalelei i malo sa le taliaina le Ekalesia ma faagasolo le fausiaina o se malumalu i Siamani i Sasae.20
“O se tasi o olioliga sili o la’u auaunaga i le Ekalesia na oo mai i le uluai tolu tausaga o se Pulega Aoao a o ou fesoasoani e fuafua ni konafesi faaleeria se luasefulufitu,” sa saunoa ai Elder Hales. “Sa ou fiafia lava e femalagaa’i ma uso o le Au Peresitene Sili, o Aposetolo, Pulega Aoao, ma isi taitai ma faamasani ma i latou ma o latou faletua. O le vaavaai atu i perofeta, tagatavaai, ma talifaaaliga o molimau atu i le moni o le talalelei i Au Paia i lea atunuu ma lea atunuu, sa ofoofogia lava.”21
I le 1985, sa valaauina ai Elder Hales o le Epikopo Pulefaamalumalu o le Ekalesia. O lona potomasani faalematata, o le faaaloalo o lana sitaili faalepulega ma feutagaiga, atoa ma lona alofa mo tagata sa matua talafeagai lelei ai o ia ma le valaauga.
Sa fesoasoani le Epikopo Pulefaamalumalu o Hales e saunia mo se malumalu i Siamani i Sasae. O i la’ua ma Mary Hales (ogatotonu) sa auai ma le (agavale i le taumatau) tusiata o Emil Fetzer, Elisa Wirthlin, Elder Joseph B. Wirthlin, Frances Monson, ma Elder Thomas S. Monson i le faapaiaga o le malumalu i le 1985.
Sa auauna atu Peresitene Henry B. Eyring, Fesoasoani Muamua i le Au Peresitene Sili, i le Au Epikopo Pulefaamalumalu faatasi ma Elder Hales. Sa ia ta’ua Elder Hales o se tagata faipisinisi atamai, amiosolia, ma faamaoni o le sa nofouta i tagata ma silafia le auala e faataunuu ai ni mea. “Sa ia aumaia na uiga auaumama lava e tasi i le taitaiga a le Au Epikopo Pulefaamalumalu,” sa saunoa ai Peresitene Eyring.22
“E matua leai lava sona pona,” sa saunoa ai lona faletua, o Mary. “E i ai sona loto mama ma e na o le fia manao lava e fai le mea sa’o.”23
Faatasi ai ma isi aoaoga faavae sa faamamafa ai e Elder Hales i le avea ai ma se Epikopo Pulefaamalumalu ia mataupu faavae o le uelefea. “Sii a’u i luga, ona ou sii lea o oe i luga, ma o le a ta o a’e faatasi ai i luga,” e tele na ia saunoa ai, ma sii mai se tasi o faataoto e sili ona ia fiafia i ai.24
Sa ia tatalo mo le Au Paia “ina ia iloaina ua ia i tatou le mana ma le tiutetauave e fesoasoani ai i e mafatia, e avea o ni agelu fesoasoani mo le Alii o Iesu Keriso, ona o le a alofagiaina i tatou ona tatou te alolofa atu, o le a faamafanafanaina ona tatou te agaalofa, o le a faamagaloina ona tatou te faailoa atu le gafatia e faamagalo atu ai.”25
Aoaoga ma le Molimau
Ina ua lagolagoina Elder Hales i le Korama a Aposetolo e Toasefululua i le iva tausaga mulimuli ane, i le aso 2 o Aperila, 1994, sa matua mamafatu lona valaauga fou ia te ia.
“Ua ono sefulu tasi nei o’u tausaga ma ua ou toe tamaitiiti foi,” sa ia saunoa ai i le taimi o lana uluai lauga i le konafesi aoao o se Aposetolo. “O loo i ai tamalii o loo alala atu i luga o lenei tulaga ua avea ma Aposetolo ma i le Au Peresitene Sili mo le afa o o’u tausaga.
Sa ia saunoa o le avea ma se Aposetolo a Iesu Keriso o se faagasologa—”o se faagasologa o le salamo ma le lotomaualalo, ia tagai ai i totonu e pei ona faatonuina ai i tatou ma ōle atu mo se faamagaloga ma le malosi e avea ai ma tagata e tatau ona ou avea ai.” Sa ia talosagaina tatalo a le Au Paia ina ia mafai ona ia “faamalosia le malosiaga faaleagaga o loo manaomia e ulufia ai e lo’u leo ma la’u molimau o le Alii o Iesu Keriso ia loto o i latou o le a faalogo i ai.”26
Mo le silia ma le 20 tausaga, sa ulufia ai e le molimau faaaposetolo a Elder Hales e uiga i le Faaola ma lana molimau o le talalelei toefuataiina ia loto o le Au Paia o Aso e Gata Ai i le lalolagi atoa. Sa aofia i ana lauga ia autu e pei o le aiga ma le faatuatua, tofotofoga ma le molimau, alofa ma le loa ona talitiga, auaunaga ma le usiusitai, amiosa’o ma le faitalia.
I le aoao atu e uiga i le faaaogaina ma le atamai o le faitalia, sa faasoa mai ai e Elder Hales se tala e uiga i se uo sa la tautua faatasi i le ea fosi.
“A o a’oga ai e avea ma se pailate o vaalele tau, … sa ou faataitaia le faia o se faaiuga po o le a le taimi e lele ese ai mai le vaalele pe a mumu mai le moli lapatai o le afi ma sa amata ona ou gatete ma lē puleaina,” sa ia saunoa ai. “Ou te manatua se tasi uo pele sa le’i faia nei sauniuniga. Na te maua lava se auala e alo ai mai le aoaoga faamasani ae alu e tapolo pe taele le sami. Na te le’i aoaoina lava ana faagasologa mo faalavelave faafuasei! I ni nai masina mulimuli ane, sa sasao se afi i totonu o lana vaalele, ma taavilivili atu ai i le eleele ua mu. I le matauina ai e lana soa talavou o le moli lapatai o le afi, ona sa atiaeina se tali atu i tulaga le maalofia, sa ia iloa ai le taimi e lele ese ai mai le vaalele ma alu atu ai i le parasuti i le saogalemu. Ae o la’u uo sa le’i saunia e faia lena faaiuga sa nofo pea i totonu o le vaalele ma maliu ai i le [taimi na pa ai].”
O le iloaina o le auala e faatino ai ma le taimi e faatino ai pe a oo ina tulai mai se filifiliga taua e mafai ona i ai ni taunuuga e faavavau, sa faaopoopo mai ai Elder Hales.27
“I le avea ai ma se tamaitiiti Niu Ioka, sa ou ola ae o se tasi o le na o le toalua pe toatolu tagata o le Ekalesia i se aoga maualuga e faitau afe. I se faatasiga talu ai nei o le 50 tausaga, sa manatua ai e tamaiti sa matou aooga le auala sa ou ola ai e tusa ma o’u tulaga faatauaina ma talitonuga. Sa ou iloaina i lena taimi o le soliga e tasi o le Upu o le Poto po o se solitulafono o tulaga faatauaina o le amio mama o lona uiga e le mafai ona ou faia atu, ‘O le mea lea ou te talitonu i ai’ ma faatuatuaina e a’u uo.
“Ua na ona mafai ona tatou faasoaina atu le talalelei i le auala tatou te ola ai.”28
I tausaga faai’ui’u o le auaunaga a Elder Hales, sa ia uunaia le Au Paia ia ola agavaa mo “le meaalofa ofoofogia o le Agaga Paia.”29 Sa ia uunaia foi tagata o le Ekalesia ia faaleleia lo latou avea ai ma soo e ala i le avea ma ni Kerisiano lelei atu, mauaina o le lototele FaaKerisiano, ma le tutu malolosi i nofoaga paia.
“O le valaau lenei a Keriso i Kerisiano uma i ona po nei: “Fafaga a’u tamai mamoe. … Fafaga a’u mamoe’—faasoa atu la’u talalelei i tagata talavou ma matutua, ia sii a’e, faamanuia, faamafanafana, faamalosiau, ma atiae i latou, aemaise i latou o e e eseese o latou manatu ma talitonuga nai lo tatou,” sa ia aoao mai ai.30
Ata na pueina e Jeffrey D. Allred, Deseret News
E faatatau ia i latou e “mananao tatou te o mai i lalo mai le tulaga maualuga ma lopala ma i latou i se sikalamu o manatu faafilosofia,” sa fautua mai ai Elder Hales i le Au Paia o Aso e Gata Ai ia tali atu i a latou molimau ma ia tutu faatasi ma le Faaola.
“Tatou te faaali atu Lona alofa, lea ua na o le pau lena o le mana e taofia ai le fili ma tali atu i e agaleaga mai, e aunoa ma le toe agaleaga atu ia i latou. E le o se vaivaiga lena mea.. O lena mea o le lototele FaaKerisiano.”31
E pei lava ona “inosia ma tuulafoaiina [le Faaola] e tagata” (Isaia 53:3; Mosaea 14:3), e oo foi le Au Paia o Aso e Gata Ai i le malamalamasese i ai, faitioina, ma tuuaiga sese. “O se avanoa paia lo tatou tutu faatasi ma Ia!” Sa saunoa ai Elder Hales.32
Faatalitali i le Alii
Ina ua saunoa Elder Hales e uiga i le faatalitali i le Alii, sa ia silafia lelei lana mataupu. O faafitauli o le fatu, o taotoga tetele, ma le luitau o le soifua maloloina faafouina ia na taofia o ia mai le lauga ai i le konafesi aoao o Aperila 2011 na mou atu ai le malosi faaletino ae ia maua ai malamalamaaga faaleagaga.
I le mavae ai ona toe malosi mai i taotoga tetele e tolu i le 2000, na ia ta’u atu i le Au Paia: “I tausaga e lua ua alu, sa ou faatalitali i le Alii mo lesona faaletino ina ia aoaoina ai a’u e ala i vaitau o tiga faaletino, tiga faalemafaufau, ma le mafaufau loloto. Sa ou aoaoina ai o le tiga o’oo’o faifai pea, o se faamama faapaiaina sili lea e faalotomaualaloina ai i tatou ma faalatalata atili atu ai i le Agaga o le Atua.”33
E le manaomia ona tatou feagai ma luitau na o i tatou ona e mafai ona tatou aioi atu i le “tagata silisili e tausi mai,” sa aoao mai ai Elder Hales.34 “Mai lea taimi i lea taimi, ina ua finagalo ai le Alii, sa faamafanafanaina ai a’u i asiasiga a au o le lagi lea na aumaia le mafanafana ma le faamautinoaga faalelagi i taimi sa ou pagatia ai.”35
E ui tatou te le iloa po o le a le taimi ae pe faapefea foi ona taliina a tatou tatalo, sa molimau ai Elder Hales, ae o le a oo mai tali i le ala a le Alii lava Ia ma e tusa ma Lana lava taimi. “Mo nisi o tali atonu tatou te faatalitali ai seia oo i le olaga a sau. … Ia aua ne’i o tatou fiu i le Alii. O Ana faamanuiaga e faavavau, ae le mo na o sina taimi.”36
“Ua faamanuiaina lava a’u e galulue faatasi ma le Usoga lelei tele ua mafai ona maua e lenei lalolagi.” O upu na tautalagia ina ua faamaloloina o ia o se Epikopo Pulefaamalumalu sa faamaonia ai foi le moni i le avea ai ma se Aposetolo.
Ata pue mai faaaloaloga a le Deseret News Archive
Ata na pueina e Stuart Johnson, Deseret News
O Se Soo Faamaoni
A o avea ma se Epikopo Pulefaamalumalu, sa tuu mai ai e Elder Hales se molimau e talitutusa ma le [molimau a] Alema le Itiiti. Sa ia tautino mai: “E, pe ana i ai so’u leo ma le pu a se agelu e mafai ona ou fai atu i tagata uma ua toetu mai [Iesu Keriso] ma o loo soifua o ia; o ia o le Alo o le Atua, le Alo e Toatasi na Fanaua a le Tama, le Mesia folafolaina, lo tatou Togiola ma le Faaola; na afio mai o ia i lenei lalolagi e aoao mai le talalelei e ala i faataitaiga. O lana misiona paia ua tuusao mai ia te oe ma a’u ia o mai ia te ia ma o le a ia taitai atu i tatou i le ola e faavavau.”37
I lana uluai lauga muamua o le koanfesi aoao ina ua valaauina i le Korama a Aposetolo e Toasefululua, sa ia sii maia le upu a Mamona, ma faia le molimau a le perofeta anamua ma ana lava molimau: “Faauta, o a’u o se soo o Iesu Keriso, le Alo o le Atua. Ua ia valaauina au e talai atu lana afioga i totonu o ona tagata, ina ia mafai ona latou maua le ola tumau-faavavau” (3 Nifae 5:13).38
Mo le fasefulu tausaga o se Pulega Aoao, sa tala’i atu ai e Elder Robert D. Hales ma le lototoa ma le mamana afioga a le Faaola e ala i ana lauga ma le olaga o faataitaiga. Ma sa ia manatuaina lana lava ia fautuaga i lona olaga patino, faalematata, ma faale-ekalesia: “E ala i le usiusitai faamaoni ma le tumau e oo i le iuga, e mafai ai i se aso ona tatou toefoi atu ma le mamalu i le afioaga o lo tatou Tama Faalelagi ma lona alo o Iesu Keriso.”39
Mo le Au Paia o Aso e Gata Ai e tutusa [lo latou faatuatua] ma lona faatuatua i le Faaola, e le o toesea lava Elder Hales. Ae, ua toefoi atu o ia i le aiga—ma ua ia foi atu ma le mamalu.