President a Odzi Kan na n’Apamfo Amandzɛɛbɔ, Ɔberɛfɛw 2017
Mma hom Nsuro dɛ hom Bɛyɛ Papa
Ewuradze se hɛn dɛ sɛ yɛdze gyedzi gyina No botan no do a, ekyingye na suro kɔ famu; na hɛn pɛ a yɛdze bɛyɛ papa no tu mpon.
Mo nuanom na nkyɛrɛbaa, mobɔ mpaa ahobrɛadze mu dɛ Ewuradze no Sunsum bɛkã hɛnho ber a merekasa ndɛ da yi. Enyisɔ ahyɛ m’akoma mu mã ma Ewuradze a, Asɔr yi yɛ Nedze no, wɔ nkenyan a yɛatse wɔ enyiber mpaabɔ mu, nkenyan nsɛmpa, nye abɔfo ndze a wɔdze atow ndwom wɔ ehyiadzi yi ase no.
Ndaansa Ebɔbira mu no, President Thomas S. Monson maa hɛn asɛm a okenyaan akoma pii wɔ wiadze nyina mu a, mara medze kã ho. Ɔkasae faa Mormon Nwoma no tum no ho. Ɔhyɛɛ hɛn dɛ yɛnkenkan, yɛndwendwen ho na yɛmfa ne nkyerɛkyerɛ no mbɔ bra. Ɔbɔɔ hɛn anohoba dɛ sɛ yebotu mber esi hɔ dabiara dze esũa, adwendwen ho na yesie mbrasɛm no a ɔwɔ Mormon Nwoma no mu a, yebenya no nokwar ho dasegye tsitsir, na Christ ɔtseasefo ho dasegye a obefi mu aba no, bɔkora hɛn do dwudwoodwo wɔ esian mber mu. (Hwɛ “The Power of the Book of Mormon,” Liahona, Esusow Aketseaba 2017, 86–87.)
Tse dɛ hom mu dodow so no, metsee nkɔnhyɛnyi n’asɛm dɛ Ewuradze ne ndze a ɔaba mo hɔ. Na, tse dɛ hom mu dodow no, meyɛɛ m’adwen dɛ mibedzi dɛm nsɛm no do. Na, fitsi ber a meyɛ banyimba no, menya Mormon Nwoma ho dase dɛ ɔyɛ Nyame n’asɛm, na Egya na Ɔba no puei Joseph Smith do na Wɔnye no kasae, na tsetse Asomafo no baa Nkɔnhyɛnyi Joseph Smith hɔ a wɔdze Ewuradze N’Asɔr mu asɔfodzi nsaafee no resan ananmu aba.
Medze dɛm dasegye no akenkan Mormon Nwoma dabiara mfe 50 na no mboree. Ntsi nkyɛ monnfom dɛ mubotum adwen dɛ President Monson n’asɛm no ɔdze rema binom. Naaso, tse dɛ hom mu dodow no, metsee nkã dɛ nkɔnhyɛnyi no no nkuranhyɛ na anohoba no roto nsa afrɛ me ma mabɔ mbɔdzen ayɛ bi akã ho. Hom mu dodow ara ayɛ dza meyɛe no; dze botae pa abɔ mpaa, agye enyim adwendwen kyerɛwsɛm no ho na wɔabɔ mbɔdzen dɛ wɔbɔsom Ewuradze na binom ama No.
No nsunsuando pa a me nye hom mu dodow enya no, nye dza nkɔnhyɛnyi no bɔɔ ho anohoba no. Hɛn a yɛgyee nkenyan afotu no too mu no atse Sunsum no ndze yie. Yeenya tum kɛse a yɛdze tsia nsɔhwɛ na yenya gyedzi kɛse wɔ Jesus Christ a Ɔasoɛr no mu, wɔ N’asɛmpa na N’Asɔr a ɔtse ase no mu.
Ber yi a begyabegya rodɔɔsõ wɔ wiadze mu no, dasegye ntowdo yinom no apam ekyingye na suro na ɔdze asomdwee atsenkã abrɛ hɛn. Metsie President Monson n’afotu no do enya nhyɛdo nwanwa ebien binom so wɔ mo do: Odzi Kan, Sunsum no a ɔbɔɔ ho anohoba no ama menya enyidado wɔ dza ɔbɛba ndaamba, mpo dɛ ɔyɛ dɛ ma basabasyɛ rodɔɔsõ wɔ wiadze mu no. Na, otsĩa ebien, Ewuradze ama emi—nye hom—No dɔ ho atsenkã kɛse ma hɔn a wɔwɔ ahokyer mu. Yenya pɛ kɛse dɛ yɛnkɔ nkɛgye binom. Dɛm pɛ no ayɛ President Monson no somdwuma na nkyerɛkyerɛ ne fapem.
Ewuradze bɔɔ Nkɔnhyɛnyi Joseph Smith na Oliver Cowdery anohoba dɛ wobenya dɔ na akokodur ama nkaafo ber a nna dwumadzi a ɔda hɔn enyim no yɛ dɛ ma ɔbor hɔn do no. Ewuradze see dɛ akokodur wohia no befi hɔn gyedzi wɔ No mu dɛ Ɔyɛ hɔn botan mu aba.
“Mma hom nnsuro dɛ hom bɛyɛ papa, me mbabanyin, osiandɛ dza hom bodua no, ɔnoara so na hom bobu; dɛm ntsi, sɛ hom dua papa a hom bobu papa so ayɛ hom akatua.
Dɛm ntsi, mma hom nnsuro, nguambaakuw; hom nyɛ papa; ma asaase nye hɛl nyina mbɔmu ntsia hom, na sɛ hom si wɔ mo botan do a, wonnkotum edzi hom do konyim.
Hwɛ, mummbu hom fɔ; hom nkɔ hom kwan na mma hom nnyɛ bɔn bio; hom mfa ahobrɛadze nyɛ hom edwuma a mahyɛ hom no.
Hom nhwɛ me wɔ hom adwendwen biribiara mu; mma hom nngye kyim, mma hom nnsuro.
Hom nhwɛ me mfẽ mu epirakur, nye mprɛgow ananmu wɔ me nsa nye m’anan mu; hom ndzi nokwar, hom ndzi me mbrasɛm do, na hom benya ɔsor ahenman no edzi.(N&A 6:33–37).
Ewuradze see Ne Nsanananmu baanodzifo no, na Ɔse hɛn dɛ sɛ yɛdze gyedzi gyina No botan no do a, ekyingye na suro kɔ famu; na hɛn pɛ a yɛdze bɛyɛ papa no tu mpon. Sɛ yɛgye President Monson ne nsato dɛ yendua Jesus Christ ho dasegye wɔ hɛn akoma mu to mu a, yenya tum, ɔpɛ no, na akokodur dɛ yɛbɛgye binom a yɛnndwen hɛnankasa hɛn ehiadze ho.
Mehu dɛm gyedzi na akokodur no mpɛn pii wɔ Latter-day Saintfo a wɔgye dzi no mu, ber a woehyia nsɔhwɛ a ɔyɛ hu. Mfatoho kor, Nna mowɔ Idaho ber a Teton Nsu mu Ban no bubui wɔ Obiradzi 5, 1976 no. Nsu fadum bi baa famu. Mpempem guanee gyaa hɔn efiefi. Efiefi na edwumadzi mpempem sɛe. Anwanwadze mu ara, nyimpa dodow a wɔhwer hɔn nkwa nndu 15.
Dza muhun no hɔ no, meehu no wɔ bea biara a Latter-day Saintfo egyina pintsinn wɔ Jesus Christ ne dasegye botan no do. Osiandɛ dɛ wɔnngye ho kyim dɛ Ɔhwɛ hɔn do no ntsi, wonnyi suro biara. Wogyaa hɔnara hɔn haw to nkyɛn na wɔkɔ kɔboa binom. Na wɔdze Ewuradze ho dɔ yɛ a, wommbisa ho akatua.
Mfatoho, ber a Teton Nsu mu Ban bubui no, nna Latter-day Saintfo awarfo bi wɔ akwantu mu, akwansin pii fi hɔn fie. Wɔtsee dawurbɔ no wɔ radio do ara no, wɔdaan hɔnho na wɔyɛɛ no ntsɛm sanee baa Rexburg. Nkyɛ wɔbɔkɔ hɔnankasa hɔn fie akɔhwɛ dɛ sɛ ɔasɛɛ no, mbom wɔkɔhwehwɛɛ hɔn bishop. Nna ɔwɔ bea no a wɔdze ayɛ ɔgye bea asoɛe no. Nna ɔroboa ma wɔama etuhoakyɛfo mpempem a wɔdze skuul bɔɔs akwangua pii ebodur no akwankyerɛ.
Awarfo no nantsewee kɔr bishop no nkyɛn na wɔsee dɛ, “Mbrɛana yɛaba a. Bishop, henfa na yebotum akɔ akɔboa?” Ɔmaa hɔn ebusua bi edzin. Awarfo no tsĩtsĩi ndɛtse na wɔsesaaw nsu fii efiefi pii mu. Wɔyɛɛ edwuma fi ahanamakye kesi ewimbir nda pii mu. Ewiei no, wɔseraa kwan dɛ wɔrokɔhwɛ hɔnankasa hɔn fie. Nna nsuyirii no apra no kɔ a, woenngya hwee a wobesiesie. Ntsi wɔsanee ntsɛmara kɔɔr hɔn bishop hɔ. Wobisaa dɛ, “Bishop, ana ewɔ obi a yɛbɔboa no a?”
Dɛm kommyɛ akokodur na ayamuyie—Christ no dɔ no—yɛ anwanwadze a woesi do ayɛ no mfe pii mu wɔ wiadze nyina mu. Ɔkɔr do wɔ nda nwenwen atseetsee na nsɔhwɛ wɔ Nkɔnhyɛnyi Joseph Smith n’aber do wɔ Missouri. Osii ber a Brigham Young dzii tukɔrfo enyim fi Nauvoo na nkyii wɔfrɛɛ Ahotseweefo no kɔr mbea a ɔyɛ sar do wɔ America anee afamu nyina, dɛ wɔnkɔboa hɔnho ma wɔnkyekyer Zion mma Ewuradze.
Sɛ ekenkan dɛm edzikamfo no hɔn journal a, ihu gyedzi awanwadze a otu ekyingye na suro. Na ekenkan Ahotseweefo a wogyaa hɔnara hɔn ehiadze ekyir dze kɔ kɔboa obi fofor ma Ewuradze, ana wɔasan ekyir abɔhwɛ hɔn ara hɔn nguan anaa hɔn haban a wɔndɔɔw do.
Ehum kɛse Irma twuwii faa Puerto Rico, Saint Thomas, nye Florida n’ekyir nda kakra no, muhun dɛm anwanwadze noara bi, wɔ bea a Latter-day Saintfo nye asɔrasɔr binom, sɔn mu ekuwekuw, na ɔman no mu ekuw horow bɔɔmu hyɛɛ nsiesie mbɔdzembɔ no ase.
Tse dɛ m’anyɛnkofo a wɔwɔ Rexburg no, awarfo bi a wɔnnyɛ asɔrmba boaa wɔ sɔn mu dwumadzi no kyɛn dɛ wɔbɛyɛ edwuma wɔ hɔnankasa hɔn egyapadze do. Ber a Latter-day Saintfo fipamfo kãa dɛ wɔbɔboa ma woeyi ndua akɛse ebien no a woesiw hɔn fie kwan no no, awarfo no kyerɛkyerɛɛ mu dɛ nna abor hɔn do ntsi na wɔdan hɔn enyi kɔboaa binom no, a nna wɔwɔ gyedzi dɛ Ewuradze dze mboa a wohia wɔ hɔnankasa hɔn fie no bɛba. Nkyii kun no kãa dɛ ansaana hɛn Asɔrmba no dze hɔn mboa robɔto hɔn enyim no, nna awarfo no robɔ mpaa. Nna woenya mbuae dɛ mboa no bɛba. Ɔbae so wɔ dɔnhwer kakra ara a wonyaa dɛm taduasi no.
Maatse nkaabɔ dɛ binom ahyɛ ase refrɛ Latter-day Saintfo no a wɔhyehyɛ Helping Hands T-shirts goon no “Abɔfo Gonn no.” Latter-day Saintnyi bi dze ne kaar kɔr dɛ wonsiesie, na banyin no ɔroboa no kãa no “sunsum mu sũahu” a onyae ber a nkorɔfo a wɔhyehyɛ sor ntar goon no beyiyii ndua fii ne paado ho asɛm na nkyii, ɔsɔɔw do dɛ, “wɔtoow ndwom bi kyerɛɛ me a ɔfa dɛ meyɛ Nyame ne ba ho.”
Florida tseman-munyi bi—a ɔno so nnye hɛn nnsom—kãa mbrɛ Latter-day Saintfo baa ne fie ber a ɔreyɛ edwuma wɔ ne paado a hɔ asɛɛ ma ɔabor no do, ma hyew dze no ma ɔkã no kakra ma oesũ no. Ɔnoara n’anomu asɛm nye yi, “etuhoakyɛfo no yɛɛ anwanwadze ankasa.” Wɔammfa enyimia nnko annsom, mbom wɔdze, serew, na anoyerɛwee so, na wowie a wɔanngye hɔn hwee.
Muhun enyimia no na metsee dɛm serew no ber a, Memenda ewimbir bi, mekɛseraa Latter-day Saintfo kuw bi wɔ Florida. Etuhoakyɛfo no gyaa hɔn nsiesie edwuma no bekyia me nsa mu na wɔkɔtoaa hɔn edwumayɛ do. Wɔkãa dɛ hɔn stake a ɔwɔ Geogia mu mba 90 yɛɛ nhyehyɛɛ dɛ wɔbɛba abɛkã Florida ngyee no ho ndeda anafua ara.
Wofii Georgia ahanamakye 4:00, tsenaa hɛn mu dɔnhwer pii, yɛɛ edwuma da no nyina mu kesii anafua, na wɔahyehyɛ dɛ n’adzekyee no wɔbɛsan so ayɛ edwuma bio.
Wɔdze anoyerɛwee na enyigye kyerɛkyerɛɛ mu kyerɛɛ me. Dza metsee a ɔyɛ dɛ ma ɔhaw hɔn nye dɛ wɔpɛ dɛ wogyaa dɛ wɔbɛda hɔn ase ama woetum asan akɛyɛ edwuma. Ber a yɛrekɛtsena hɛn kaar mu akɔ ngyee kuw a odzi do no, nna stake president no ahyɛ ase dze ne chain saw rutwutwa dua no a oebu no na bishop no riyiyi ndua no nkorbata no.
Ansaana no, ber a yerifi bea a worisiesie kor so no, banyin bi anantsew aba kaar noho, oetu ne kyew, na ɔada hɛn ase wɔ etuhoakyɛfo no ntsi. Ɔkãa dɛ, “Minnyɛ hɔn asɔrba. Dza hom ayɛ ama hɛn yi, munntum nngye nndzi. Nyame nhyira hom.” LDS etuhoakyɛfo mu ɔbaako a ogyina ne nkyɛn no a ɔhyɛ no so atar gonn no yerɛww n’ano na ɔmaa n’abatsir do, tse dɛ ma ɔmmfata ayɛyi.
Ber a etuhoakyɛfo a wofi Georgia aba robɔboa banyin yi a ɔnngye nndzi no, nna Latter-day Saintfo ɔha ɔha a wofi Florida hɔ noara a wɔasɛɛ no, akɔ bea fofor a ɔyɛ akwansin aha pii a, ɔwɔ Florida anafo bea bi a wɔtsee dɛ nkorɔfo no edzi emia kɛse kyɛn hɔn no.
Dɛm da no mekaa na metsee Nkɔnhyɛnyi Joseph Smith no nkɔnhyɛsɛm no dɛ: “Nyimpa a Nyame ho dɔ ahyɛ no mã no, nnyɛ n’ebusua nko na ɔsɔ n’enyi dɛ ɔboa hɔn, mbom okyin wiadze mu nyina, dze ahoɔhar kɔboa adasamba nyina” no ase yie. (Teachings of Presidents of the Church: Joseph Smith [2007], 426)
Yehu dɛm dɔ yi wɔ Latter-day Saintfo a wɔwɔ beebiara mu. Ber biara a esian bi si wɔ wiadze mu beebira mu no, Latter-day Saintfo kɛkyɛ adze na wotu hɔnho ma Asɔr no ne nyimpa ho mboa mbɔdzembɔ no. Ɔnntaa nnhia dɛ wɔbɔtotɔ aserɛ hɔn. Nokwar, ber bi mu no, yɛaserɛ hɔn a wɔrebɛyɛ etuhoakyɛ no dɛ mma wonnsi mu mmba bea a worisiesie hɔ no kɛpeem dɛ edwuma n’akwankyerɛfo no ayɛ krado dɛ wɔbɛgye hɔn.
Dɛm pɛ no a wɔdze boa no, yɛ nkorɔfo a woenya Jesus Christ, N’asɛmpa, N’Asɔr a wɔdze asanananmu aba, na No nkɔnhyɛnyi ho dasegye no n’eduaba no. Dɛm ntsi na Ewuradze no nkorɔfo nngye kyim na wɔnnsuro no. Dɛm ntsi na asɛmpasomafo tu hɔnho dze som wɔ wiadze n’ano n’ano biara no. Dɛm ntsi na awofo nye hɔn mba bɔ mpaa ma binom no. Dɛm ntsi na baanodzifo to hɔn mbabun taferbanyin-mbɔmu dɛ wɔmfa hɔn akoma nhyɛ Mormon Nwoma no mu dɛ mbrɛ President Monson n’ebisadze tse no. Nnyɛ baanodzifo no hɔn nhyɛ do na eduaba no ba, mbom ber a mbabun na asɔrmba dze gyedzi dzi dwuma no. Dɛm gyedzi no, wɔdze ridzi dwuma a, ohia etuhoakyɛ som, ɔdze akoma sesã ba a ɔma kwan ma wɔtse Nyame no dɔ.
Naaso, hɛn akoma, kɔ do nya nsesã, susuampara dɛ yɛkɔ do dzi nkɔnhyɛnyi n’afotu do. Sɛ yɛbɔ mbɔdzen mpofirmu kor ara na yegyae a, nsesã no bɔkɔ famu.
Nda a Odzi Ekyir Ahotseweefo ato hɔn gyedzi wɔ Ewuradze Jesus Christ mu, dɛ Mormon Nwoma no ɔyɛ Nyame n’asɛm, na dɛ asɔfodzi nsaafee a wɔdze asan aba No nokwar Asɔr mu no. Dɛm dasegye ntomu no ama hɛn akokodur kɛse na tsema ma Nyankopɔn ne mba nkaafo no. Mbom ɔhaw na akwanya no a ɔwɔ kan no behia gyedzi mbordo mpo.
Yennkotum ehu no nkorkor, naaso yenyim n’ewiei. Yenyim dɛ nda a odzi ewiei no, asaase do bɛyɛ begyabegya. Yenyim dɛ ɔhaw biara a ɔbɛba no, Ewuradze bedzi Nda a Odzi Ekyir Ahotseweefo no enyim ma wɔdze Jesus Christ asɛmpa akɔ ɔman biara, ebusuafo, kasa horow na nyimpa nyinara hɔ. Na yenyim dɛ Ewuradze n’esuafo nokwafo no bɛfata na wɔayɛ ahosie agye No ber a Ɔbɛba bio no. Onnyi dɛ yesuro.
Ntsi, susuampara dɛ yenya gyedzi na akokodur wɔ hɛn akoma mu no, Ewuradze rohwehwɛ dodow efi hɛn hɔ—na efi ebusuasantsen a wodzi hɛn do no. Wobehia dɛ wobenya ahoɔdzen na akokodur akyɛn hɛn osiandɛ wɔrebɛyɛ ndzɛmba akɛse a ɔyɛ dzen kyɛn dza yɛayɛ no. Na wobehyia dza otsia hɔn no ara yie efi hɛn akra ne tamfo no hɔ.
Ewuradze na Ɔkyerɛɛ kwan a wɔdze enyidado bɔkɔ kan: “Hom nhwɛ me wɔ hom adwendwen biribiara mu, mma hom nngye kyim, mma hom nnsuro” (N&A 6:36). President Monson kãa mbrɛ yebesi bɛyɛ dɛm no kyerɛɛ hɛn. Mormon Nwoma na nkɔnhyɛfo hɔn nsɛm no ɔwɔ dɛ yɛdwendwen ho na yɛdze dzi dwuma. Yɛbɔ mpaa daa. Yɛgye dzi. Yɛdze hɛn akoma nyina, ahom, adwen, nye ahoɔdzen som Ewuradze. Ɔwɔ dɛ yɛdze hɛn akoma mu ahoɔdzen nyina bɔ mpaa hwehwɛ ayamuyie, Christ no dɔ mapã no (hwɛ Moroni 7:47–48). Ne nyina ekyir no, ɔwɔ dɛ yɛwɔw do dzi nkɔnhyɛ afotu do nokwar mu.
Ber a kwan no mu ayɛ dzen no, yebotum atwer Ewuradze n’anohoba no—anohoba no a President Monson akaa hɛn ber a ɔtaa sera kã Agyenkwa ne nsɛm yinom no: “Na obiara a ɔbɛgye hom no, hɔ na mo so mebɛba, osiandɛ mibedzi hom enyim. Mibedzi hom nyimfa na hom bankum, na mo sunsum bɛhɛn hom akoma mu, na m’abɔfoe etwa hom ho ehyia, na wɔasoa hom” (N&A 84:88).
Megye dase dɛ Ewuradze dzi hɛn enyim kan ber a yɛwɔ No soma do no. Ɔtɔfabi a ɔwo na ibɛyɛ ɔbɔfo no a Ewuradze bɔsoma no ma ɔakɔsoa binom no. Ɔtɔfabi a ɔwo na ibɛyɛ nyia abɔfo a wɔsoa wo no botwa woho ehyia no. Naaso daa hom benya No Sunsum wɔ hom akoma mu, dɛ mbrɛ wɔdze abɔ hom anohoba wɔ sacrament som biara mu no. Ne mbrasɛm noara na ɔwɔ dɛ hom sie.
Nda pɔn no wɔ kan ma Nyankopɔn n’Ahenman wɔ asaase do no. Otsiafo no bɛhyɛ hɛn gyedzi wɔ Jesus Christ mu no dzen, tse dɛ mbrɛ wɔayɛ fitsi Nkɔnhyɛnyi Joseph Smith ne mber do no. Gyedzi dzi suro do konyim daa. Yɛbɔmu gyina a na ogya koryɛ. Na Nyame dɔfo no tse na Obua hom mpaabɔ no a hom bɔ ma hɔn a wɔwɔ ahohia mu no. Ɔronntɔ nkom eso ɔrennda.
Megye dase dɛ Nyame Egya no tse ase na Ɔpɛ dɛ hom ba Ne nkyɛn wɔ fie. Iyi nye Ewuradze Jesus Christ No nokwar Asɔr no. Onyim wo, Ɔdɔ wo, Ɔhwɛ wo do. Ɔbɔɔ werdam maa wo bɔn na medze na Ɔsor Egya ne mba nyina hɔn bɔn. Iridzi N’ekyir wɔ w’abrabɔ mu na wo som a edze som binom nye kwan kor ara a wɔdze kɔ onnyiewiei nkwa mu.
Megye ho dase na medze me nhyira na mo dɔ gya hom. Wɔ Jesus Christ ne dzin krɔnkrɔn no mu, amen.
© 2017 by Intellectual Reserve, Inc. Wɔakora do tumdzi nyina. USA na Wotsintimii. English approval: 6/17. Translation approval: 6/17. First Presidency Message, November 2017 ne nkyerɛasee. Fante 97931 502