Visiting Teaching Amandzɛɛbɔ, Ɔberɛfɛw 2017
Nkyerɛbaa Baasa
Hɛn osuanyiyɛ ho asodzi da hɛnankasa hɛn do, na ɔmmfa ho—sɛ biribi mpo a—dza nkorɔfo dze bɛyɛ hɛn ho.
Nkyerɛbaa adɔfo, anyɛnkofo adɔfo, dɛ yɛdze wiadze nyina mu mbaa nhyiamu hyɛ wiadze mfɛndzanan ehyiadzi ase no yɛ adze tsitsir na nwanwa. Susu ho dɛ: mbaa a wogu mfe ahorow, gyinabew, amanaman, na kasahorow dze gyedzi na Ewuradze Jesus Christ ho dɔ abɔmu.
Yehyiaa hɛn nkɔnhyɛnyi dɔfo, President Thomas S. Monson no, ɔnnkyɛree, ɔkãa mbrɛ osi dɔ Ewuradze kyerɛɛ hɛn. Na minyim dɛ President Monson. n’enyi sɔ hom dɔ, hom mpaabɔ, na som a hom dze som Ewuradze.
Mber pii a wɔabasen kɔ no nkyerɛbaa baasa bi tsenaa ase wɔ asaase bi a ɔwɔ ekyirekyir do.
Akyerɛbaa odzi kan no nye awerɛhow. Fitsi no hwen dze ba n’adadaw na ofi no wer dze kesi n’anansɔba no, biribiara nnyɛ dza oye ma no. Sɛ ɔrekasa a, ɔtɔfabi a ne nsɛm no hue bi na bi, ma nkorɔfo serɛw no. Sɛ obi kã n’enyim asɛm anaa wɔreyɛ biriba ma hɔn “werɛ fir” ma wɔannto nsa afrɛ no a, n’enyim tow, na ogya hɔn hɔ kɔhwehwɛ sumabea bi dzi awerɛhow na ɔayɛ no nwanwa siantsir a abrabɔ ayɛ pasaa dɛm yi.
Akyerɛbaa a otsĩa ebien no nye ebufuw. Ɔdwen noho dɛ onyim adze, naaso daa obi dzi no kan wɔ skuul nsɔhwɛ mu. Osusu dɛ noho yɛ enyikã, noho yɛ fɛw, ɔhyehyɛ noho yie, na noho yɛ enyigye. Naaso daa, ɔyɛ dɛ ma obi wɔ hɔ a, noho yɛ enyikã, noho yɛ fɛw, ɔhyehyɛ noho, anaa noho yɛ enyigye kyɛn no.
Oenndzi kan wɔ biribiara mu da, na iyi na oenntum annsɔw no. Nnyɛ dɛm na nkyɛ ɔwɔ dɛ abrabɔ yɛ!
Ɔtɔfabi a ɔkasa dzendzen kyerɛ binom, na daa nkyɛ biribi anaa obi reyɛ ahyɛ no ebufuw.
Nyew, iyi amma nkorɔfo ammpɛ n’asɛm anaa ɔammbɛyɛ atsenkã. Ɔtɔfabi a ɔkã ne sẽ si do dzendzenndzen, osũa kutuku, na ɔdwen ho dɛ “Abrabɔ yɛ nsisi.”
Nkyii na akyerɛbaa a otsĩa ebiasa wɔ hɔ. Nna ɔnntse dɛ ne nkyerɛbaa awerɛhow na ebufuw no; nna—ɔwɔ ahomka. Na nnyɛ dɛ onyim adze anaa noho yɛ fɛw anaa otum adze yɛ kyɛn ne nkyerɛbaa no. Oho, ɔtɔfabi a nkorɔfo yi no akwa anaa wɔnnkasa no so ho. Ɔtɔfabi a wosi n’afadze anaa nsɛm a ɔrekã no ho atwetwe. Ɔtɔfabi a wɔkã nsɛm bɔn pii fa noho. Mbom ɔamma no mu biara annhaw no kɛse.
Akyerɛbaa yi pɛ ndwontow. Nna onnyi ndze biara, na nkorɔfo serew no wɔ ho, naaso oennsanka no. Ɔkã dɛ, “Mennkɛma binom na hɔn adwenkyerɛ ama megyaa ndwontow!”
Nokwar ara dɛ ɔkɔɔr do toow ndwom no maa n’akyerɛbaa a odzi kan no dzii awerɛhow na n’akyerɛbaa a otsĩa ebien no nyaa ebufuw.
Mfe pii twaa mu, na ewiei no nkyerɛbaa no mu kor biara duur ne mber wɔ asaase do no n’ewiei.
Akyerɛbaa a odzi kan no, hun no mpɛn pii dɛ abagura mmpa wɔ abrabɔ mu, ekyir no ɔdze awerɛhow owui.
Nyia otsĩa ebien no, ɔno a daa onyaa biribi a ɔmmpɛ no, dze ebufuw wui.
Na akyerɛbaa a otsĩa ebiasa no, ɔno a n’abrabɔ nyina mu ɔdze n’ahoɔdzen nyina na awerɛhyɛmu tsew n’enyim yɛrɛw n’ano no, dze enyigye wui.
Nokwar, abrabɔ nnyɛ mberɛw dabiarada, na nkorɔfo so mmfa suban kor ara mmbɔ bra dɛ nkyerɛbaa baasa yinom no. Naaso mfatoho ɔnntɔkã tse dɛ iyinom no botum aboa hɛn ma yesũa biribi afa hɛnho. Sɛ itse dɛ hɛn mu dodow a, bia na ehu wo ho wɔ nkyerɛbaa yi mu kor, ebien anaa annhwɛ a baasa no nyina mu. Hom mma yɛnhwɛ kor biara yie.
Otsĩafo no
Akyerɛbaa a odzi kan no hun noho dɛ ɔwɔ etsĩafo—dɛ obi a wɔyɛ adze tsĩa no.1 Ɔyɛ dɛ mbrɛ ndzɛmba wɔwdo ba no do a ɔma odzi awerɛhow. Dɛm abrabɔ su yi, ɔma ɔdze noho hyɛ binom hɔn nhyɛ ase wɔ n’atsenkã na ne ndzeyɛɛ ho. Sɛ yɛyɛ dɛm a, adwenkyerɛ biara bohuw hɛn akɔ—na ndɛ mber yi a social media si do daa yi, dɛm mframa no ne dzen bɔ dɛ ekyin-ehyia mframa.
Nkyerɛbaa adɔfo, dɛn ntsi na ɔwɔ dɛ hom gyaa hom enyigye ma obi, anaa binom hɔn kuw, a nkorɔfo a hom anaa hom enyigye mmfa hɔn ho?
Sɛ ihu dɛ dza nkorɔfo kã fa woho no haw wo a, munsusu n’ano edur nkyerɛ hom: hom nkaa hom nyimpa ban. Hom nkaa dɛ hom yɛ adehye wɔ Nyankopɔn ahenman mu, Ɔsor Awofo, a wodzi hen wɔ wiadze nyina mu no mbabaa nye hom.
Hom wɔ Nyankopɔn no sunsum mu DNA. Hom wɔ akyɛdze soronko a ofi hom sunsum mu mbɔe ho, na hom dze mfe petsepee wɔ hom abrabɔ a ansaana nyimpa reba asaase do no dze tuu ho mpon. Eyɛ hɛn mbɔbɔrhufo na daapem Egya a ɔwɔ Sor, Ɔsorsor Ewuradze a ɔbɔɔ sor, Ɔtserɛɛw nworaba guu sor petee mu, na Ɔdze wiadze horow totoo hɔn bea a wokyin no, Ne ba.
Hom wɔ Ne nsamu.
Nsa pa ara yie.
Ɔdɔ nsamu
Nsa a ɔwɔ tsema.
Na biribiara nnyi hɔ a obi botum akã afa woho ma wɔasesã iyi. Hɔn nsɛm nnkyerɛ hwee sɛ edze to dza Nyame akã afa wo ho a.
Eyɛ Ne ba a esom bo.
Ɔdɔ wo.
Sɛ efintsiw mpo, sɛ edan fi Ne nkyɛn mpo a, Nyame dɔ wo. Sɛ inya atsenkã dɛ ayew, woegya wo hɔ, anaa hɔn werɛ efir wo a—mma nnsuro. Oguanhwɛfo Pa no bɔhwehwɛ wo. Ɔdze wo bɔto Ne batsir do. Na Ɔbɔsoa wo akɔ fie.2
Me nkyerɛbaa adɔfo, meserɛ hom mma nokwar yinom no ndɔ hom akoma no bun mu. Na hom bohu dɛ siantsir pii wɔ hɔ a onnyi dɛ hom werɛ how, osiandɛ hom wɔ onnyiewiei nkrabea ho dwuma dzi.
Wiadze no n’Agyenkwa dɔfo no dze No nkwa mae ama hom eetum aasan mu eyi ma dɛm nkrabea no aba mu. Hom afa Ne dzin ato hom do; hom yɛ N’esuafo. Na osian Ɔno ntsi, hom botum dze onnyiewiei enyimyam ntar efura homho.
Ɔtanyi no
Akyerɛbaa a otsĩa ebien no nna no bo efuw wiadze. Tse dɛ n’akyerɛbaa awerɛhow no, ɔtsee nkã dɛ ɔnam binom do na n’abrabɔ mu nkõdzen bae. Ɔdze hyɛɛ n’ebusua, n’anyɛnkofo, n’edwuma mu panyin nye n’edwumafo, porisi, fipamfo, Asɔr banodzifo, dza wɔaba do, ewia ne hyew nye ne tsir a ɔnnyɛ no mpo. Na otwaa bɔɔ hɔn nyina.
Ɔanndween noho dɛ ɔyɛ obi a n’asɛm yɛ dzen. Mbom, nna dza onyim ara nye dɛ ɔrobɔ noho ban. Nkaafo no nyinara dze, nna ɔgye dzi dɛ wɔdween pɛsɛankonya mu, dza onnhia, na ɔtanhun na wodzii ekyir. Ɔno dze, nsusui pa—pɛrpɛrdzi, nokwardzi, na ɔdɔ na odzii ekyir.
Mbom, akyerɛbaa ebufuw n’adwendwen no dze obiara nyim. Wɔhyɛɛ iyi nsew yie wɔ adzesũa a ndaansa yi wɔyɛe nhwehwɛmu wɔ ekuwekuw akorafo a ɔkõ esi hɔn ntamu. Adzesũa n’afã bi no, nhwehwɛmufo no yɛɛ Palestinefo na Israelfo a wɔwɔ Middle East, na Republicanfo na Democratfo a wɔwɔ Amerika no kokoamu mpɛnsapɛnsamu. Wohun dɛ afã biara “nyaa adwen bi dɛ hɔn kuw no ɔdɔ na nnyɛ ɔtan na wodzi ekyir, mbom wobisaa hɔn dɛ dɛn ntsi na wɔnye hɔn akorafo no rokõ no a, wɔkyerɛɛ dɛ kuw [kor no] ɔtan na wodzi ekyir.”3
Sɛ yɛrekã a, kuw kor biara dween hɔnho dɛ wɔyɛ “nyimpa apapafo”—wodzi pɛrpɛr, wɔyɛ ehumbɔbɔr na wodzi nokwar. Naaso, wohun hɔn akorafo no dɛ wɔyɛ “nyimpa bɔnfo”—wɔnntse asɛm ase, atorfo, na ebusufo mpo.
Afe a wɔwoo me wɔ mu no, nna ɔkõ yerɛwyerɛw rokɔ do wɔ wiadze mu a ɔdze yaw wenwen nye awerɛhow hyɛɛ wiadze mu. Ɔkõ yi mara me man na wɔdze bae—nyimpa kuw bi a wohun kuw kor bi dɛ wɔyɛ abɔnfo na wɔhyɛɛ nkuran dɛ wɔntan hɔn.
Hɔn a wɔmmpɛ hɔn asɛm nyina wɔkãa hɔn hyɛɛ. Woguu hɔn enyim ase na wɔkãa bɔn guu hɔn do. Wosusu dɛ wɔnnsɛ bi—wɔnnyɛ nyimpa mpo. Sɛ ibu nkorɔfo kuw bi enyimtsia a, mbrɛ ɔbɛdan biara no, edze nsɛm na ndzeyɛɛ ewurkadze betsĩa hɔn.
Sɛ modwen dza osii wɔ mfe ɔha a otsĩa-20 wɔ German mu a, moho popo.
Sɛ obi nye hɛn dzi esi anaa ɔnnye hɛn nnyɛ adwen a, ɔyɛ mberɛw dɛ yɛbɔdwen dɛ biribi nnkɔ do yie wɔ hɔn ho. Na ofi hɔ no, ɔyɛ adze ketseaba dɛ yɛbɔdwen adwen afa hɔn nsɛm na ndzeyɛɛ ho.
Nokwar, otwar dɛ daa yegyina ma dza ɔtsen, na mber bi wɔ hɔ a otwar dɛ yɛma hɛn ndze do wɔ dɛm asɛm no ho. Naaso, sɛ yɛdze ebufuw anaa ɔtan a ɔwɔ hɛn akoma mu yɛ a—sɛ yɛkasa tsĩa dze haw binom, gu hɔn enyim ase, anaa yɛkã hɔn hyɛ a—nna bɛyɛ dɛ yɛrennyɛ no tseneneeyɛ mu.
Ebɛnadze na Agyenkwa no kyerɛkyerɛɛ?
“Mese hom dɛ, hom ndodɔ hom atamfo, hom nhyira hɔn a wɔkã hom ndom, hom nyɛ papa mma hɔn a wɔtan hom, na hom nsɔr mma hɔn a wobu hom enyimtsia na wɔtseetsee hom;
“Ama hom aayɛ hom Egya a ɔwɔ sor no ne mba.”4
Iyi nye Agyenkwa no kwan. Ɔyɛ anamɔn a odzi kan a yɛdze bubu dza ɔdze ebufuw, ɔtan, mpaapaamu, na ewurkadze ba wiadze yi mu no.
Bia ebɛkã dɛ, “Nyew, mebɛpɛ dɛ mobɔdɔ m’atamfo—sɛ hɔn so bɛpɛ dɛ wɔbɛyɛ dɛmara a.”
Naaso ɔno mfa ho, ɔfa ho a? Hɛn osuanyiyɛ ho asodzi da hɛnankasa hɛn do, na ɔmmfa ho—sɛ biribi mpo a—dza nkorɔfo dze bɛyɛ hɛn ho. Ampara dɛ yɛwɔ enyidado dɛ wobenya ntseasee na ayamuyie ama hɛn, naaso dɔ a yɛdze dɔ hɔn no mmfa hɔn nkã-tse a wɔwɔ ma hɛn no.
Bia na hɛn mbɔdzembɔ dɛ yɛbɔdɔ hɛn atamfo no bɔgow hɔn akoma na oenya nhyɛdo pa wɔ hɔn do. Bia na ɔrennyɛ dɛm. Naaso ɔno nsesã hɛn pisi dɛ yebedzi Jesus Christ ekyir.
Ntsi, yɛyɛ Jesus Christ n’Asɔrmba yi, yɛbɔdɔ hɛn atamfo.
Yebedzi ebufuw na ɔtan do konyim.
Yɛdze Nyankopɔn mba nyina ho dɔ bɛhyɛ hɛn akoma mu mã.
Yɛbɛtsen akɔboa binom na yɛasom hɔn—hɔn mpo a bia wobu [hɛn] enyimtsia na wɔtseetsee [hɛn] no.”5
Osuanyi Nokwafo
Akyerɛbaa a otsĩa ebiasa no gyina hɔ ma Jesus Christ osuanyi nokwafo. Ɔyɛɛ adze bi a ɔyɛ dzen papaapa dɛ yɛbɛyɛ: ɔdze no werɛ tweer Nyankopɔn ber mpo a orihyia atwetwesi na nkõdzen no. Otumii siei ne gyedzi na enyidado ber a hɔn a wɔbɔ no ho aprow no rekasa tsĩa no na wɔnngye no nndzi no. Ɔtsenaa ase ahomka mu, a nna nnyɛ ne gyinabew mu na ɔyɛ enyigye na mbom osiandɛ ɔno ara ɔwɔ ahomka.
Hɛn mu biara nntwa ɔbra sar yi do a oennya otsĩafo. Etumfo pii robɔ mbɔdzen atwe hɛn ekyir yi, yebesi dɛn dze hɛn enyi etsim enyigye enyimnyam no a wɔdze abɔ anokwafo anohoba no?
Megye dzi dɛ yebotum enya nyiano no wɔ adaasõ bi a nkɔnhyɛnyi bi sõo mfe mpempem a wɔabɛsen no mu. Nkɔnhyɛnyi no ne dzin dze Lehi, na n’adaasõ no wɔakyerɛw no wɔ Mormon Nwoma no a ɔsombo na ɔyɛ nwanwa no mu.
N’adaasõ mu no Lehi hun sar petee bi, a dua nwanwa a ɔyɛ fɛw mbordo bi si mu. Ohun nkorɔfo dɔm pii a woesi kwan do rokɔ dua no ho. Nna wɔpɛ dɛ wobedzi n’enyimnyam eduaba no bi. Wɔtsee na wɔgyee dzii dɛ ɔno bɛma woenya enyigye kɛse na asomdwee a ɔtahye.
Nna kwan kakraba bi na ɔdze kɔ dua no ho na dadze poma bi wɔ nkyɛn a ɔboa hɔn ma wɔfa kwan no do. Naaso nna sum kebii wɔ hɔ a osiw hɔn ma wonnhu kwan no na dua no. Na bia na dza ɔyɛɛ esian kɛse nye serew dede na atwetwesi a ofi dan kɛse pontonn no a ɔbɛn hɔ no mu bae no. Ɔyɛ ahobow dɛ, atwetwesi no maa nkorɔfo binom a woedu dua no ho na woedzi n’eduaba nwanwa no ma wɔhyɛɛ ase fɛree na wɔfaa beebi.6
Bia na wɔhyɛɛ ase gyee kyim dɛ dua no nnyɛ fɛw dɛ mbrɛ ahyɛse no wɔdwenee no. Bia na wɔhyɛɛ ase bisaa nsɛmbisa wɔ dza woedua mu no ho nokwar ho.
Bia na wɔdween dɛ sɛ wɔdan fi dua no ho a, abrabɔ bɛyɛ mberɛw ama hɔn. Bia na worinnsi hɔn atwetwe anaa wɔrennserew hɔn bio.
Nokwar, nna nkorɔfo a worisi hɔn atwetwe no yɛ dɛ nkorɔfo a woenya ahomka na wɔregye hɔn enyi ara yie. Ntsi sɛ wogyaa dua no hɔ a, wɔbɛyɛ hɔn akwaaba aba dan kɛse pontonn mboanofo no mu na wɔabɔ hɔn abaw do wɔ hɔn atsɛn pa, nyansaa na enyi a woebuei ho.
Hom mfa Anamɔn Kwan no do
Nkyerɛbaa adɔfo, anyɛnkofo adɔfo, sɛ hom hu dɛ wɔayɛ dzen dɛ hom bosuo dadze poma no mu dzendzenndzen na hom anantsew akɔ nkwagye mu a; sɛ binom a ɔyɛ dɛ ma wosi pi hɔn aseserew na atwetwesi ma ihihim a; sɛ nsɛmbisa a nnyaa ho nyiano haw wo a; sɛ awerɛhow hyɛ wo osian abagura ntsi a, mehyɛ hom dɛ hom nkaa Lehi adaasõ no.
Hom mfa anamɔn kwan no do.
Mma hom nngyaa dadze poma no—Nyame N’asɛm no mu dabiarada.
Na sɛ obiara bɔ mbɔdzen dɛ hom enya Nyame no dɔ mu kyɛfa no ɔbɛhyɛ hom fɛr a, mma hom nnhwɛ hɔn.
Mma wo werɛ mfir dabiarada dɛ eyɛ Nyame ne ba, Nhyira wɔ hɔ ma [wo]; sɛ [e]sũa dɛ [e]bɛyɛ Ne pɛ a, [yɛ]nye No bɛtsena bio!7
Wiadze ayɛyi na ngyetomu ho anohoba no nnyɛ dza wɔtwer, ɔnnyɛ nokwar na ɔmmee. Nyame n’anohoba sipi, ɔyɛ nokwar na enyigyesɛm—sesei na daapem.
Moto nsa frɛ hom dɛ hom nsusu nyamesom na gyedzi wɔ nhumu a ɔkrɔn do. Biribiara nnyi dza dan kɛse pontonn wɔ dze ma a ɔbɔto Jesus Christ asɛmpa n’abrabɔ mu eduaba no.
Nokwar “Enyiwa nnhunii na aso nntsee, na ɔnnhɛn nyimpa akoma mu, ndzɛmba a Nyankopɔn esiesie ama hɔn a wɔdɔ no.”8
Mehu ama moho dɛ osuanyiyɛ anamɔn kwan no a ɔwɔ Jesus Christ asɛmpa no mu no nye kwan no a wɔdze kɔ enyigye mu. Ɔyɛ asomdwee na ahotɔ kwan. Ɔyɛ nokwar kwan.
Megye dase dɛ ɔnam Sunsum Krɔnkrɔn no tum na akyɛdze do no, hom botum ehu ama homho.
Sesei dze, sɛ kwan no do yɛ dzen a, mowɔ enyidado dɛ hom benya guandɔbea na ahoɔdzen wɔ hɛn ekuwekuw nwanwa no a ɔwɔ Asɔr no mu: Primary, Young Women, nye Relief Society. Wɔtse dɛ ahomgye mbea wɔ kwan no do, mbea a hom botum asakyer hom awerɛhyɛmu na gyedzi fofor wɔ akwantu a ɔda enyim no. Wɔyɛ fie dwudwoodwo, mbea a hom botum atse dɛ hom wɔ mu kyɛfa na hom agye nkuranhyɛ efi hom nkyerɛbaa nye esũafo mfɛfo hɔ.
Ndzɛmba a hom sũa no Primary no boa ma hom nya nokwar binom kã ho ber a hom sũa adze dɛ nkataasia no. Osuanyiyɛ anamɔn kwan no dze hom bodua Young Women adzesũadze mu egya hom akɔ Relief Society nkyerɛbaayɛ na fɛkuw mu. Anamɔn kor biara a ɔwɔ kwan no do no, ma hom kwan binom so dɛ hom bodua gyedzi, tsema, ayamuyie, ɔbra pa na som ndzeyɛɛ do dze kyerɛ hom dɔ ma nkaafo.
Eresan mu eyi osũanyiyɛ kwan yi begya wo akɔ enyigye mbordo na wo nyamesu ho mãhyɛ mu.
Ɔrennyɛ mberɛw. Obehia wo mbɔdzembɔ a ɔkrɔn ara yie—wo nyansaa, edwindze, gyedzi, nokwardzi, ahoɔdzen, enyimpi, na ɔdɔ nyina. Naaso da kor ebɔhwɛ ekyir ahwɛ wo mbɔdzembɔ, na o, mbrɛ ɔbɛyɛ wo enyisɔ dɛ egyina pintsinn, dɛ egyee dzii, na dɛ emmfi anamɔn kwan no do.
Per Kɔ Kan
Ndzɛmba pii bɔwɔ abrabɔ yi mu a hom nnyi tum wɔ do. Naaso ewiei no, hom wɔ tum dɛ hom san mu yi hom ndaamba na akwantu no do sũahu. Nnyɛ hom mbɔdzembɔ dodow na mbom nsanmuyi a hom yɛ no na ɔdze nsonsonee ba abrabɔ mu.9
Hom nnkotum ama kwan ma hom gyinabew no ahyɛ hom awerɛhow.
Hom nnkotum ama kwan ma wɔahyɛ hom ebufuw.
Ibotum edzi dɛw dɛ eyɛ Nyame Ne babaa. Ibotum enya egyigye na ahomkã wɔ Nyankopɔn n’adom nye Jesus Christ dɔ no mu.
Ibotum enya enyigye.
Mehyɛ hom dɛ hom mfa Nyankopɔn Ne papayɛ mbordo a onnyi kabea no ho enyisɔ nhyɛ hom akoma mu. Me nkyerɛbaa adɔfo, hom botum ayɛ iyi! Medze dɔ a ɔwɔ me kra mu nyina bɔ mpaa ma hom dɛ hom bɛsan mu eyi dɛ hom bɛper akɔ nkwadua no ho. Mobɔ mpaa dɛ hom bɛsan mu eyi dze epegya hom ndze na hom abrabɔ atow enyimnyam ayɛyi ndwom, a hom ridzi dɛw wɔ dza Nyame no dɔ, N’Asɔr no ho nwanwa, na Jesus Christ asɛmpa no botum dze abrɛ wiadzemba no ho.
Osũanyi nokwafo no ndwom no bia ɔrennyɛ dɛw anaa ɔbɛyɛ dede ama binom mpo. Dɛmara na ɔtse fitsi mber ahyɛse no.
Mbom hɛn Ɔsor Egya na hɔn a wɔ dɔ No na wodzi no nyi no, ɔyɛ ndwom dɛɛdɛw a ɔsom bo—ɔpon ho ɔdɔ ndwom na Nyamesom nye hɛn mfɛfo som yɛ adze krɔnkrɔn a ɔtsew ho ara yie.10
Megya hom nhyira dɛ Ewuradze no ɔsomafo dɛ hom benya ahoɔdzen na akokodur dze etsim enyigye mu dɛ Nyankopɔn ne babaa ber a dabiara hom nantsew osuanyiyɛ anamɔn kwan no do enyigye mu no. Wɔ Jesus Christ ne dzin krɔnkrɔn no mu, amen.
© 2017 by Intellectual Reserve, Inc. Wɔakora do tumdzi nyina. USA na Wotsintimii. English approval: 6/17. Translation approval: 6/17 Visiting Teaching Message, November 2017. ne nkyerɛasee. Fante 97931 502