Ennaan eo an Būreejtōnji eo Kein Kajuon, Nobōm̧ba 2017
Jab Mijak n̄an Kōm̧m̧an Em̧m̧an
Irooj ej jiron̄ kōj bwe n̄e jej jutak kōn tōmak ioon An ejm̧aan, pere im mijak rej makunļo̧k; ikdeelel eo n̄an kōm̧m̧an em̧m̧an ej ļapļo̧k.
Ro jeiū im jatū, ij jar ilo ettā bwe Jetōb eo an Irooj enaaj pād ippād ilo aō kōnono rainin. Buruō ej obrak kōn kam̧m̧oolol n̄an Irooj, eo Kabun̄ in ej An, kōn im̧we eo jaar en̄jake ilo jar ko rekije, kwaļo̧k ko raar im̧we, im al ko peļļo̧kier āinwōt an enjeļ ro al ilo kweilo̧k in.
Eprōļ eo ļo̧k, Būreejtōn Thomas S. Monson eaar letok juon ennaan eo eaar kanooj jelet en̄jake ko an armej ro ilo aolepān laļ in, ekoba n̄a. Eaar kōnono kōn kajoor eo an Bok in Mormon. Eaar libjerjere kōj n̄an ekkatak, kōļmānļo̧kjeņ, im kōjerbal katak ko an. Eaar kallim̧ur bwe eļan̄n̄e jej kōjeno̧lo̧k iien ilo kajjojo raan n̄an ekkatak im kōļmānļo̧kjeņ im kōjparok kein ko rej pād ilo Bok in Mormon, enaaj wōr juon ad kam̧ool em̧m̧an kōn m̧ool eo ie, im kam̧ool eo jej bōk kōn Kraist eo emour enaaj jipan̄ kōjparok kōj ilo aenōm̧m̧an ilo iien ko renana. (Lale “Kajoor eo an Bok in Mormon eo,” Liahona, Māe 2017, 86–87.)
Āinwōt elōn̄ iaami, iaar ron̄ naan ko an rikanaan eo āinwōt ainikien Irooj n̄an eō. Im, barāinwōt āinwōt elōn̄ iaami, iaar kālet n̄an pokake naan ko. Kiiō, jān ke iaar juon ļadik jidikdik, iaar en̄jake kam̧ool eo ke Bok in Mormon ej naan an Anij, bwe Jemān im Nejin raar waļo̧k im kōnono ippān Josep Smith, im bwe Rijjilōk ro etto raar itok n̄an Rikanaan Josep n̄an kōjepļaaktok kii ko an priesthood eo n̄an Kabun̄ eo an Irooj.
Ippān kam̧ool in, iaar riiti Bok in Mormon aolep raan elōn̄ļo̧k jān 50 iiō ko. Innām bōlen em̧ōj aō kar ilo ejjeļo̧k pok kajjitōk ļōmņak bwe naan ko an Būreejtōn Monson rej n̄an bar jet. Merkata, āinwōt elōn̄ iaami, iaar en̄jake naan in rōjan̄ eo an rikanaan eo im kallim̧ur eo an ej kūr eō n̄an kōm̧m̧ane juon kijejeto eļapļo̧k. Elōn̄ iaami em̧ōj ami kōm̧m̧ani ta ko iaar kōm̧m̧ani: kar jar kōn eļapļo̧k kōttōpar, kōļmenļo̧kjeņ eļapļo̧k kōn jeje ko rekwojarjar, im buuļ kajjieon̄ n̄an jerbal n̄an Irooj im ro jet n̄an E.
Tōprak ekam̧ōņōņō n̄an eō, im n̄an elōn̄ iaami, ekar ta eo rikanaan eo eaar kallim̧ur kake. Kōj ro me raar bōk im̧we kapilōk ilo bōro ekar alikkarļo̧k aer ron̄ Jetōb eo. Jaar lo juon kajoor eļapļo̧k n̄an jum̧ae kapo im kar en̄jake eļāpļo̧k tōmak ilo Jisōs Kraist eo ekar jerkakpeje, ilo gospel eo An, im ilo Kabun̄ eo An emour.
Ilo iien an ļapļo̧k tarpok ilo laļ in, ro rej ļapļo̧k ilo naan in kam̧ool kar ubakeļo̧k pere im mijak im kar bōktok n̄an kōj en̄jake ko an aenōm̧m̧an. Ron̄jaki kapilōk ko an Būreejtōn Monson ebar wōr ruo men ko rem̧m̧an rejelet eō: Juon, Jetōb eo eaar kallim̧ur kake eaar kwaļo̧k kōļmenļo̧kjeņ in kōjatdikdik kōn ta ko repād im̧aan, men̄e lōkapokpok ko ilo laļ in rej āinwōt ļapļo̧k. Im, ruo, Irooj eaar letok n̄an eō—im kwe—juon en̄jake eļapļo̧k kōn iakwe eo An n̄an ro me rej pād ilo en̄taan. Jaar en̄jake juon ļapļo̧k ilo ikdeelel n̄an ilo̧k n̄an lo̧mo̧o̧ren ro jet. Ikdeelel in kwaļo̧k im katakin rekar baj pād wōt ilo buruōn Būreejtōn Monson.
Irooj eaar kallim̧ur kōn iakwe n̄an ro jet im kōketak n̄an Rikanaan Josep Smith im Oliver Cowdery ke jerbal ko im̧aer raar āinwōt tarjān jon̄āer. Irooj eaar ba bwe peran eo emenin aikuj enaaj itok jān tōmak eo aer ilo E āinwōt aer ejm̧aan.
“Jab mijak n̄an kōm̧m̧an em̧m̧an, ro nejū m̧aan, bwe jabdewōt kom̧ naaj jeore, men in kom̧ naaj barāinwōt m̧adm̧ōd; kōn menin, eļan̄n̄e kom̧ naaj jeor em̧m̧an kom̧ naaj barāinwōt m̧adm̧ōd em̧m̧an n̄an woņeām̧i.
“Kōn menin, jab mijak, jarlepju edik; kōm̧m̧an em̧m̧an; laļ im hell ren koba ņae kom̧, bwe eļan̄n̄e kom̧ij ekkal ioon Aō ejm̧aan, rej jāmin anjo̧.
“Lo, Iaar jab liakeļo̧k kom̧; ilo̧k im jab bar jerawiwi; kōm̧m̧ani jerbal ko Iaar kiene kom̧ n̄an jerbali.
“Reitok n̄an E ilo aolep ļōmņak; jab pere, jab mijak.
“Bwe lo, kinej kein rekar wākari ikatū, im barāinwōt jenkwan dila kā ilo peiū im neō; kom̧in kanooj tōmak, kōjparok kien ko Aō, im kom̧ naaj jolōte aelōn̄ in lan̄” (K&B 6:33–37).
Irooj eaar jiron̄ ritōl ro An kōn Jepļaaktok eo, im Ej jiron̄ kōj, bwe n̄e jej jutak ilo tōmak ioon An ejm̧aan, pere im mijak rej makunļo̧k; ikdeelel eo n̄an kōm̧m̧an em̧m̧an ej ļapļo̧k. Ilo ad bōk kūr eo an Būreejtōn Monson n̄an katōke ilo būruwōd juon naan in kam̧ool kōn Jisōs Kraist, jej bōk kajoor eo, ikdeelel, im peran eo n̄an ilo̧k n̄an lo̧mo̧o̧ren ro jet kōn ejjeļok n̄ūrbōktak kōn aikuj ko ad make.
Em̧ōj aō lo tōmak im peran in elōn̄ kōttan n̄e rittōmak Armej ro Rekwojarjar ilo Raan-Ko Āliktata raar jeļm̧ae mālijjon̄ ko reppen. N̄an juon waanjon̄ak, iaar pād ilo Idaho ke Tenton Dam eo eaar rup ilo Juun 5, 1976 eo. Juon dān eļap eaar wanlaļtak. Taujin raar ko jān im̧ōko im̧weer. Taujin m̧ōko im im̧ōn wia ko raar jorrāān. Ilo kabwilōn̄lōn̄, eietļo̧k jān 15 armej ro raar mej.
Ta eo iaar lo ijōņ, iaar lo jabdewōt iien Armej ro Rekwojarjar ilo Raan-ko Āliktata rej jutak dim ioon ejm̧aan in kam̧ool eo kōn Jisōs Kraist. Kōnke eaar ejjeļo̧k aer pere ilo An mije er, raar erom̧ jab mijak. Raar kowaan mālijjon̄ ko aer make n̄an ilo̧k im jipan̄ ro jet. Im raar kōm̧m̧an menin kōn iakwe n̄an Irooj, kajjitōk ejjeļo̧k kōļļā.
N̄an waanjon̄ak, ke Tenton Dame eo eaar rup, ruo Armej ro Rekwojarjar ripālele raar ito-itak, elōn̄ m̧aeļ ettoļo̧k jān m̧weo im̧weer. Ilo iien eo wōt ke raar ron̄ kōn ennaan eo ilo retio, raar ekkairir in bar ro̧o̧l n̄an Rexburg. Ijjelo̧kin aer etal n̄an m̧weo im̧weer make n̄an lale eļan̄n̄e eaar rup, raar ilo̧k in pukōt Bisop aer. Eaar pād ilo juon em̧ me kar kōjerbale āinwōt jikin jerbal in kōjparok. Eaar jipan̄ kōtōbalbal taujin rijjipan̄ ro me raar jikrōkļo̧k ilo baj in jikuuļ iaļo ko.
Ripālele rein raar jibadōkļo̧k Bisop eo im ba, “Kōmij kab ro̧o̧l tok. Bisop, ia eo kōm maron̄ etal in jipan̄ ie?” Eaar leļo̧k n̄an er āt ko etan juon baam̧ļe. Ripālele rein raar kōm̧akūt pedkat im dān jān elōn̄ m̧ōko. Raar jerbal jān joraanļo̧k n̄an marok elōn̄ raan ko. Āliktata raar kakkije n̄an etal n̄an lale jekjek eo an m̧weo im̧weer make. Ekar rup ilo ibwijleplep eo, likūt ejjeļo̧k jabdewōt n̄an karreo. Kōn menin eaar m̧ōkaj aerro oktak im bar ro̧o̧l n̄an ippān bisop eo aer. Raar kajjitōk, “Bisop, ewōr ke jet kōmin jipan̄ er?”
Kabwilōn̄lōn̄ jab in an aenōm̧m̧an im peran im iakwe em̧ool—iakwe eo erreo an Kraist—em̧ōj ālji im bar ālji ium̧win iiō ko im aolepān laļ in. Eaar waļo̧k ilo raan ko renana an kaen̄taanan ko im mālijjon̄ ko ilo tōre eo an Rikanaan Josep Smith ilo Missouri. Eaar waļo̧k ke Brigham Young eaar tōl riwōjļo̧k eo jān Nauvoo innām kūr n̄an ro Rekwojarjar n̄an ilo̧k n̄an jikin ko ejjan̄in wōr armej rekar pād ie ilo Turilik in United States, n̄an jipan̄ doon ejaake Zaion n̄an Irooj.
Eļan̄n̄e kom̧ naaj riiti ļo̧o̧k ko an bainier ro, kom̧ij lo kabwilōn̄lōn̄ an tōmak kadiwōjļo̧k pere im mijak. Im kom̧ij riiti kōn Armej ro Rekwojarjar rekar likūt kōņaan ko aer make n̄an jipan̄ bar juon n̄an Irooj, m̧okta jān aer bar etal im lale jiip ko aer make ak n̄an meļaaj ko aer rejjan̄in totaki.
Iaar lo ejja kabwilōn̄lōn̄ in wōt jet raan rekkadu remootļo̧k ilo ālkin jem̧ļo̧k eo an Hurricane Irma ilo Puerto Rico, Saint Thomas, im Florida, ijo Armej ro Rekwojarjar ilo Raan-ko Āliktata raar koba ippān kabun̄ ko jet, kumi ko ilo jukjukin pād eo ijo jokwe ie, im national doulul ko n̄an jino jerbal in karreo ko.
Āinwōt ro m̧ōtta ilo Rexburg, juon ripālele eo ejjab membōr ilo Florida raar m̧ad ilo jipan̄ jukjukin pād eo ijello̧kin jerbal ilo men ko m̧wier make. Ke ro jet riturier Armej ro Rekwojajar ilo Raan-ko Āliktata raar leļo̧k jipan̄ kōn ruo wōjke eļļap raar pinej iaļ eo aer, ripālele rein raar kōmeļeļeik bwe eaar ļo̧kjeņ aer im lukkuun ilo̧k n̄an jipan̄ ro jet, wōr tōmak Irooj enaaj kar leļo̧k jipan̄ eo raar aikuji ilo m̧weo im̧wer make. Innām ļeo pālele eaar kwaļo̧k bwe m̧okta jān an membōr ro ilo Kabun̄ eo am kar jikrōktok n̄an leļo̧k jipan̄, ripālele ro raar jar. Raar bōk juon uwaak bwe jipan̄ enaaj itok. Eaar itok ilowaan wōt awa ko ke jaar jar.
Iaar ron̄ juon riboot bwe jet raar jino kūr Armej ro Rekwojarjar ilo Raan-ko Āliktata ro rej kōņak iaļo Jiin̄lij Pein Jipan̄, “Enjeļ Iaļo ro.” Juon armej in Armej ro Rekwojarjar ilo Raan-ko Āliktata eaar bōkļo̧k wa eo waan bwe ren kojerbale, im em̧m̧aan eo eaar jipan̄e eaar kōmeļeļeik juon “en̄jake ilo jetōb” eaar ioone ke armej ro ilo jiin̄lij iaļo ko raar kōm̧akūt wōjke ko jān meļan eo an innām, eaar ba, raar “al juon al n̄an eō kōn āinwōt juon nejin Anij.”
Bar juon armej in Florida—barāinwōt jab jān kabun̄ in ad—eaar kwaļo̧k bwe Armej ro Rekwojarjar ilo Raan-ko Āliktata raar itok n̄an m̧weo im̧ōn ke eaar jerbal ilo meļan eo an ejorrāān im en̄jake ļo̧kjenan, laudin̄din̄, im baj dānnin komjaalal. Baļantier ro raar ejaake, ilo naan ko an, “juon kabwilōn̄lōn̄ erreo.” Raar jerbal ejjab wōt kōn tiljek ak kōn ettōn̄ im meidikdik, jab bōk jabdewōt jān jerbal ko aer.
Iaar lo tiljek jab in im ron̄ bwe ettōn̄ ke, joteenļo̧k juon Jādede, iaar loļo̧k juon kumi in Armej ro Rekwojarjar ilo Raan-ko Āliktata ilo Florida. Balantier ro ebwe an aetok aer kar jerbal raar bōjrak jān aer karreo n̄an kōtļo̧k bwe in idik jet pā ko. Raar ba bwe 60 membōr ro an stake eo aer ilo Georgia raar ejaake juon ļōmņak n̄an koba ilo jerbal in jipan̄ eo ilo Florida bon̄ōn eo m̧okta jān aer kar em̧m̧akūt.
Raar emmakūt jān Florida ilo 4:00 awa jimmarok, kar ettōr kōn elōn̄ awa ko, jerbal n̄an n̄e ebon̄, im bar jerbal raan eo tok juon.
Raar kōmeļeļeiki n̄an eō kōn meidikdik im kōjak em̧m̧an. Abnōnō eo deeo iaar arromeļo̧k eaar bwe raar kōņaan kabōjrak kam̧m̧oolol er bwe ren maron̄ bar jepļaak in jerbal. Stake būreejtōn eo eaar bar kōjo̧ jidpen eo an im kar jerbale juon wōjke eaar okjak im bisop eo eaar kōm̧akūt raan wōjke ko ke kōm kar iuweļo̧k ilo wa ko waam n̄an etal ippān tiim in lo̧mo̧o̧r eo juon.
Jibbon̄ōn ļo̧k raan jab eo, ke kōm kar ilo̧k jān jikin jab eo, juon em̧m̧aan eaar itok n̄an wa eo, utūk at eo an, im kam̧oolol kōm kōn am balantier. Eaar ba, “Ijjab juon membōr in m̧ōn jar eo ami. Ijjab tōmak ta eo kom̧ kar kōm̧m̧ane n̄an kōm. Anij en kōjeraam̧m̧an kom̧.” LDS balantier eo ej jutak iturin ilo ialo jōōt ekar ettōn̄dikdik im kōm̧akūtkūt aeran āinwōt n̄e eaar jab kōņaan nōbar.
Ilo an baļantier ro jān Georgia kar itok n̄an jipan̄ em̧m̧aan in eo me ekar jab tōmak, bukwi, bukwi Armej ro Rekwojarjar ilo Raan-ko Āliktata jān m̧ōttan jab in ekanooj jorrāān an Florida raar ilo̧k buki m̧aiļ ko n̄an bar juon jikin ilo Florida me raar ron̄ ke eļap kar aer ļaanwōtwōt.
Raan eo iaar keememej im ļapļo̧k aō meļeļe naan in kanaan ko an Rikanaan Josep Smith: “Juon armej ekar obrak kōn iokwe eo an Anij, ejjab bun̄ būruwōn kōn kōjeram̧m̧an baam̧le eo wōt an, ak kajeeded ilo aolepān laļ in, laudin̄din̄ eo n̄an kōjeram̧m̧an aolep armej” (Katak ko an Būreejtōn ro an Kabun̄ eo: Joseph Smith [2007], 426).
Jej lo kain iokwe rot in ilo mour ko an Armej ro Rekwojarjar ilo Raan-ko Āliktata aolep jikin. Kajjojo iien ej ewōr juon jorrāān eļap jabdewōt jikin ilo laļ in, Armej ro Rekwojarjar ilo Raan-ko Āliktata rej jipan̄ļo̧k baļantier ro n̄an jerbal in jipan̄ ko an Kabun̄ eo. Juon kōnaan ejeja aikuji. Ilo m̧ool, ilo jet iien ko, jej aikuj naaj kajjitōk ippān baļantier ro n̄an kōttar n̄an ilo̧k n̄an jikin jipan̄ eo m̧ae iien eo ro rej bōk eddo in jerbal eo repojak n̄an būki.
Kōņaan eo n̄an kōjeraam̧m̧an ej leen an armej bōk juon naan in kam̧ool kōn Jisōs Kraist, gospel eo An, jepļaaktok in Kabun̄ eo An, im rikanaan eo An. En̄in ej unin an armej ro doon Irooj jab pere im jab mijak. En̄in ej unin an mijenede ro baļantier n̄an jerbal in jipan̄ ilo aolep m̧ōttan ko an laļ. En̄in ej unin m̧am̧a im baba ro jar ippān ajri ro nejier kōn ro jet. En̄in ej unin an ritōl ro mālijjon̄e jodikdik ro aer n̄an uwaake kajjitōk eo an Būreejtōn Monson n̄an ekkatak kōn Bok in Mormon ilo būrueer. Leen eo ejjab itok wōt jān libjōrjōr jān ritōl ro ak jān an jodikdik ro im membōr ro em̧m̧akūt kōn tōmak. Tōmak in, likūt ilo jerbal, ej aikuji kaarmejete eo ejjab ļōmņak kōn e make, ej bōktok oktak in bōro eo me ej kōtļo̧k bwe ren en̄jake iakwe eo an Anij.
Būruwōd, ijowōt ke, pād wōt ilo an jab oktak toon wōt ad wōnm̧aanļo̧k wōt im ļoor kapilōk eo an rikanaan eo. Eļan̄n̄e jej bōjrak jān kajjieon̄ ālkin juon wōt alen kajjeon̄ eo, oktak eo enaaj makunļo̧k.
Armej ro Rekwojarjar ilo Raan-ko Āliktata retiljek kar kōļapļo̧k aet tōmak ilo Irooj Jisōs Kraist, ilo Bok in Mormon eo āinwōt naan an Anij, im ilo jepļaaktok eo an kii ko an priesthood eo ilo Kabun̄ eo An em̧ool. Bwe menin ej kōļapļo̧k naan in kam̧ool eo me kar letok n̄an kōj eļapļo̧k peran im ļōmņak kōn ro jet nejin Anij. Bōtaab idajon̄jon̄ ko im iien ko rem̧m̧an im̧aan renaaj aikuji em̧ool naaj ļapļo̧k.
Jejjab maron̄ kajidedeik tipdik in, bōtaab jejeļā ta eo enaaj waļo̧k ilju im jekļaj. Jejeļā bwe ilo raan ko āliktata, laļ in enaaj pād ilo tarpok. Jejeļā bwe ibwilijin ta jorrāān eo ej itok, Irooj enaaj tōl Armej ro Rekwojarjar ilo Raan-ko Āliktata n̄an bōk gospel eo an Jisōs Kraist n̄an aolepān lal, bwij ko, lo ko, im armej ro. Im jejeļā bwe rikaļoor ro rem̧ool an Irooj renaaj erreo im pojak n̄an bōk E n̄e E ej bar itok. Jaikuj in jab mijak.
Kōn menin, jon̄an eo wōt emōj ad de kar kalōk tōmak im peran ilo būruwōd, Irooj ej kōtmene eļapļo̧k jān kōj—im jān epepen ko ālkiid. Renaaj aikuj in kajoorļo̧k im peranļo̧k kōnke renaaj kōm̧m̧ane eļapļo̧k im men ko reppenļo̧k jān ko jaar kōm̧m̧ani. Im renaaj jelm̧ae eļapļo̧k jum̧ae jān rikōjerat eo an jetōb ko ad.
Wāween eo n̄an laudin̄din̄ ilo ad bun̄ m̧aanļo̧k kar letok jān Irooj: “Reitok n̄an Eō ilo ļōmņak otemjeļo̧k; jab pere, jab mijak” (K&B ko 6:36). Būreejtōn Monson eaar jiron̄ kōj wāween kōm̧m̧ane menin. Jej aikuj in kōļmenļo̧kjeņ im kōjerbal Bok in Mormon im naan ko an rikanaan ro. Jar iien otemjej. Tōmak wōt. Jerbal n̄an Irooj kōn aolepān būruwōd, maron̄, ļōmņak, im kajoor. Jej aikuj jar kōn aolepān ad kajoor an būruwōd kōn menin letok eo an iakwe em̧ool, iakwe eo erreo an Kraist (lale Moronai 7:47–48). Im ilōn̄ aolep men, jej aikuj jokkun wōt juon im kijin̄en̄e ilo ļoor kapilōk an rikanaan eo.
N̄e iaļ eo ej pen, jemaron̄ pedped ioon kallim̧ur eo an Irooj—kallim̧ur eo Būreejtōn Monson eaar kakeememej kōj kake ilo an kar emakijkij an kōnono jān naan kein an Rilo̧mo̧o̧r eo: “Im jabdewōt eo ej bōk kom̧, Inaaj pād ijo barāinwōt, bwe Inaaj etal im̧aanļo̧k in mājāmi. Inaaj pād ijo barāinwōt, bwe Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧” (K&B ko 84:88).
Ij kam̧ool bwe Irooj ej etal im̧aan mejamiļo̧k jabdewōt iien kom̧ij pād ilo jerbal eo An. Jet iien kom̧ naaj enjeļ eo Irooj ej jilkinļo̧k n̄an kotak ro jet. Jet iien naaj jepooļe kom̧ jān enjel ro rej kotak kom̧. Bōtaab iien otemjej kom̧ naaj bōk jetōb eo An bwe en pād ilo buruuōmi, āinwōt kar kallim̧uri kom̧ ilo aolep kweilo̧k in kwojkwoj ko. Men eo de eo kom̧ij aikuj kōm̧m̧ane ej kōjparok kien ko An.
Raan ko rem̧m̧an tata rej pād im̧aan n̄an aelōn̄ in Anij ioon laļ in. Jum̧ae enaaj kōkajoorļo̧k ad tōmak ilo Jisōs Kraist, āinwōt kar jān wōt raan ko an Rikanaan Josep Smith. Tōmak iien otemjej ej anjo̧ ioon mijak. Jutak ippān doon ej kwaļo̧k ippān doon. Im jar ko ami n̄an ro rej pād ilo aikuj rej ron̄jaki im uwaaki jān juon Anij in iakwe. E jāmin mejki ak E jāmin kiki.
Ij kwaļo̧k aō kam̧ool bwe Anij Jemān ej mour im ekōņaan bwe kom̧in jeplaak n̄an E. En̄in ej Kabun̄ eo em̧ool an Irooj Jisōs Kraist. Ejeļā wōn kom, Ej iakwe kom̧, im Ej mije kom̧. Eaar pinmuur kōn jerawiwi ko ami im aō im jerawiwi ko an aolep ajri ro nejin Jemādwōj Ilan̄. Ļoor E ilo mour eo ami im ilo jerbal in jipan̄ eo ami n̄an ro jet ej iaļ eo dein n̄an mour indeeo.
Āindein ij kam̧ool im likūt ippāmi aō kōjeraam̧m̧an im aō iakwe. Ilo ekkwojarjar in etan Jisōs Kraist, amen.
© 2017 jān Intellectual Reserve, Inc. Aolep jim̧we ko rej pād ippān. Kar jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an First Presidency Message, November 2017. Marshallese. 97931 874