Naan in Katak an Kōrā ro, Nobōm̧ba 2017
Jilu Kōrā jemjāānjemjati
Jej bōk eddo in lo̧mo̧o̧r eo ad make, im ejjab bwe—eļan̄n̄e jabdewōt—n̄an kōm̧m̧an ilo wāween eo ro jet rej kōm̧m̧ane n̄an kōj.
Kōrā ro rejitōn bōro, ro m̧ōtta rejitōn bōro, n̄an jino kweilo̧k in eļap kōn juon m̧wen̄an an kōrā ro ipeļaakin laļ in eiaboojoj im kabwilōn̄lōn̄. Baj pijaiki m̧ōk, aolep leddik im kōrā ro jān aolep iiō ko, jekjek ko, laļ ko, im kajin ko rej kuk ippān doon ilo tōmak im iakwe Irooj Jisōs Kraist.
Ilo am kar raan kein ioon rikanaan eo ad ejitōn bōro, Būreejtōn Thomas S. Monson, ekar kwaļo̧k n̄an kōj ewi jon̄an an iakwe Irooj. Im ijeļā bwe Būreejtōn Monson ej kam̧m̧oolol kōn iakwe eo ami, jar ko ami, im ami kijejeto n̄an Irooj.
Etto im etto ilo juon āne ettoļo̧k ekar jokwe juon baam̧le ewōr jilu kōrā jemjāānjemjati.
Kōrā eo kein kajuon ekar būrom̧ōj. Aolep kain jān bo̧tin n̄an jibūnn̄iin im jān kilin n̄an jantin neen āinwōt rōkar jab lukkuun jejjet n̄an e. N̄e ej kōnono, naan ko an jet iien reidaabtōk, im armej rej kajjirere. N̄e juon armej ej kōnanaiki ak “meļo̧kļo̧k” n̄an karuwaineneiki n̄an juon men, enaaj kilbūrōrō, etal jān ijo, im pukōt juon jikin ettiņo ijo enaaj joļo̧k an illu ie im kōļmānļo̧kjeņ etke mour in ejaam̧ āinwōt enana im jab kam̧ōņōņō.
Kōrā eo kein karuo ekar illu. Ekar ļōmņak kōn e bwe emāletlet, ak aolep iien ebar wōr juon eo eutiej teej jikoor ko an ilo jikuuļ. Ej likūt e kōjak, ebwe, ekarbōb, im kalimomo. Ak aolep iien, ebar wōr juon eo eļapļo̧k an kōjaklep, karbabļo̧k, etōrjabjabļo̧k, ak kalimomoļo̧k.
Ejjan̄in kar pād ilo nōm̧ba juon ilo jabdewōt men, im menin ekar jab maron̄ kijenmeje. Mour en kar jab āindein!
Jet iien ej kadiwōjļo̧k n̄an ro jet, im āinwōt bwe aolep iien epojak kadede in inepata kōn juon men ak ippān juon armej.
Aaet em̧ool, menin ekar jab kōm̧m̧an menin an armej kōņaan e ak bun̄bun̄. Jet iien ej kij dekāin n̄iin, nukwij adiin pein, im ļōmņak, “Mour in eļap an ālikinjepjep!”
Innām kōrā eo kein kajilu. Ejjab āinwōt kōrā eo ebūrom̧ōj im illu, liin eaar—jokane, m̧ōņōņō Im ekar jab kōnke ekar māletletļo̧k ak deeoļo̧k ak kapeel jān kōrā ro jein. Jaab, armej jet iien rej kōjekdo̧o̧ne ak dike barāinwōt. Jet iien rej kōm̧m̧an kōjak kake kōn nuknuk ko ej kōņaki ak men ko ej ba. Jet iien rej ba men ko rejjab em̧m̧an kake. Ak ekar jab kōtļo̧k an men kein aolep kainepataiki.
Kōrā in em̧m̧an al ippān. Ekar jab em̧m̧an ainikien, im armej rej kajirere kake, ak menin ekar jab kabōjrake. Enaaj kar ba, “Iban kōtļo̧k an armej ro jet im meļeļe ko aer kabōjrak aō al!”
Lukkuun m̧ool eo bwe ej wōnm̧aanļo̧k im al ekōm̧m̧an an lio jein kein kajuon būrom̧ōj im lio jein kein karuo illu.
Elōn̄ iiō rekar m̧ootļo̧k, im kajjojo jemjati rein rekar tōpar jem̧ļo̧kin iien mour ko aer ioon laļ in.
Jemjati eo kein kajuon, eo ekar loe im bar loe bwe ejjelok ellotaan ko ilo mour in, wōnm̧aanļo̧k wōt im mej ilo an būrom̧ōj
Jemjati eo kein karuo, eo aolep raan ej loe juon men ekāāl im dike, ekar mej ilo an illu.
Im jemjati eo kein kajilu, eo ekar joļo̧k mour eo an al kaki al ko an kōn aolepān an maron̄ im juon ettōn̄dikdik iturin mejān, ekar mej ilo an m̧ōņōņō
Aaet, mour ejjan̄in kar lukkuun pidodo, im armej rejjan̄in kar ļam̧waan im ukoktak āinwōt jemjati rein jilu ilo bwebwenato in. Ak bōlen kain waanjon̄ak ko reļļap remaron̄ katakin kōj juon men kake kōj. N̄e kwōj āinwōt elōn̄ iaad, komaron̄ kile jimettanūm̧ ilo juon, ruo ak bōlen ilo aolep jem̧jati rein jilu. Jen kanooj kalimjek kajjojo iaer.
Eo Ko̧kkure
Jem̧jati eo kein kajuon ekar loe e make āinwōt juon eo kar ko̧kkure—āinwōt juon eo kipele n̄an kōm̧m̧ane.1 Āinwōt juon men ej itok ālikin bar juon men ejjab bōjrak an waļo̧k n̄ane me ekōm̧m̧an an nana an mour. Kōn loļo̧kjeņ n̄an mour, jem̧jati in ekar leļo̧k ioon ro jet kajoor ioon wāween an en̄jaake im m̧akūtkūt. N̄e jej kōm̧m̧ane menin, jej m̧akūtkūt kōn jadewōt kūtwōn ļōmņak—im ilo rainin epād social media, meļeļe kein remaron̄ lukkuun bun̄bun̄ im kajoor aer dābdep.
Kōrā ro rejitōn bōro, etke kom̧ij aikuj wijlepļo̧k m̧ōņōņō eo ami n̄an bar juon, ak juon kurub in bar jet, eo ejjab lukkuun kea kōn kom̧ ak ami m̧ōņōņō?
N̄e kwōj loe eok make ilo am̧ inepata kōn ta eo ro jet rej ba kōn eok, imaron̄ ke kwaļo̧k waj men in: keememej wōn kwe. Keememej bwe kwe kwōj jān m̧ōn irooj eo ilo aelōn̄ in kiin̄ eo an Anij, nejin ro Jinōm̧ im jem̧ōm̧ ilan̄, ro rej irooj in aolepān lan̄ im laļ.
Ewōr ippam̧ jetōb in DNA an Anij. Ewōr ippam̧ menin letok ko rāinjuon me rekar ijjino ilo kar jetbōn kōm̧anm̧an eo am̧ im bwe ekar ejaak ilo tōre eo eaitok ilo mour eo am̧ m̧okta. Kwoj juon ajri nejin eo eļap an tiriam̧o im ejjeļo̧k jem̧ļo̧kin Jemād ilo Lan̄, Irooj in karuwainene, Eo ekar kōm̧anm̧an lan̄ im laļ, kajedeede iju ko rej erolool ipeļaakin mejatoto eo ekilep, im ej likūt būļānōt ko ilo iaļ in ito itak eo aer.
Kom̧ij pād ilo Pein.
Pā ko relukkuun em̧m̧an.
Pā ko eļap iakwe ie.
Pā ko eļap aer kea.
Im ejjeļo̧k juon men jabdewōt emaron̄ ba kōn eok emaron̄ ukōt menin. Naan kein ejjeļo̧k tokjāer keidi n̄an ta eo Anij ekar ba kōn eok.
Kom̧ij ajri ro Nejin raorōk.
Ej iakwe kom̧.
Mekarta kwōj wōtlo̧k, mekarta kwōj oktakļo̧k jān E, Anij ej iakwe eok. Eļan̄n̄e kwōj en̄jake am̧ jōbwābwe, jojoļāār, ak meļo̧kļo̧k—jab mijak. Shephard eo Em̧m̧an enaaj kappukot eok. Enaaj kotak eok ioon Aeran. Im Enaaj bōk eok n̄an kapijuknen.2
Kōrā ro aō jitōn bōro, jouj kōm̧m̧an bwe m̧ool kein rekwojarjar ren kanooj tōļon̄e būruwōm̧i. Im kom̧ naaj loe bwe elōn̄ un ko bwe kom̧in jab būrom̧ōj, bwe ewōr ippām̧i mejān kajjik eo ejjeļo̧k jem̧ļo̧kin n̄an kakūrm̧ool.
Eo ejitōn bōro Rilo̧mo̧o̧ren laļ ekar wujlepe mour eo An bwe kom̧in maron̄ kālet n̄an kōm̧m̧an bwe mejān kajjik in en juon men eo em̧ool. Em̧ōj ami bōk ioomi Etan; kom̧ij rikaļoor ro An. Im kōn E, kom̧ maron̄ kanuknuk kom̧ make kōn nuknuk ko an aiboojoj indeeo.
Rikōjdat Eo
Jem̧jati eo kein karuo ekar illu ippān laļ in. Āinwōt leddik eo jein ebūrom̧ōj, ekar en̄jake bwe jorrāān ko ilo mour eo an rōkar waļo̧k jān bar juon. Ekar ņaruwōn baam̧le eo an, ro m̧ōttan, bo̧o̧j eo im rijerbal ro an, būlijmāāņ, ro riturin, ritōl ro an Kabun̄, ukoktak in an tōrejab, kōļļabļab, im lukkuun jerata nana. Im kar tariņaeik aolepāer.
Ekar jab ļōmņak bwe e ekar āinwōt juon armej elāj. Oktak eo, ekar en̄jake bwe ekar wōt jojom̧are kake e make. Aolep armej ro jet, ilo tōmak eo an, kar im̧we er kōn arōk, jab aorōk, im matōrtōr. Liin, bar ilo juon wāween, ekar im̧we kōn kōņaan ko rem̧m̧an—jim̧we, m̧ool, im iakwe.
Ilo m̧ool, jem̧jati eo ekar illulu ilo wāween an ļōmņak ej aolep juon wōt kain. Menin kar jeļā kake ilo juon ekkatak me ekar etale apilon̄lon̄ ko kōtaan kurub ko rej jum̧ae doon. Ejja m̧ōttan wōt ekkatak in, rūkkatak ro rekar etal ļōmņak ko an Ripalestinian ro im Riisrael ro ilo Middle East, im Ripublican ro im Ridemocrat ro ilo United States. Rōkar loe bwe “kajjojo kurub ko rōkar en̄jake kūrub eo aer make ke [ekar] im̧we kōn iakwe eļapļo̧k jān dike, ak ke armej rōkar kajitikin etke kūrub eo ej jum̧ae er [ekar] kobaļo̧k ilo appelon̄lon̄ in, [er] rōkar jitōn̄ļo̧k dike āinwōt [kūrub eo] juon ej uwaak in kōketak.”3
Ilo juon wāween, kajjojo kūrub ekar ļōmņak kōn er make āinwōt “armej ro rem̧m̧an”—jejjet, jouj, im m̧ool. Ilo keidi, rōkar loe rijum̧ae eo aer āinwōt “armej ro renana”—rejjab karon̄, rejjab m̧ool, aaet nana.
Ilo iiō eo ikar ļo̧tak, laļ in ekar rūm̧ļo̧k ilowaan juon tariņae enana me ekar kōm̧m̧an jan̄ im n̄ii ļaļļaļ im kōm̧m̧an eļap būrom̧ōj n̄an laļ. Tariņae in ekar jarjar jān laļ eo aō make—jān juon kurub in armej ro rekar kalikkar jet bar kūrub in armej āinwōt armej nana im rej rōjan̄ armej bwe ren dike er.
Rōkar kiil lo̧n̄iin ro rōkar dike er. Rōkar kajook im kattimomon er. Rōkar likūt er ro rinana—jon̄an rejjab armej. N̄e kwoj jab kautiej juon kūrub in armej, kwōj āinwōt kwaļo̧k naan in kamool im m̧akūtkūt ko renana ņae er.
Ij kajiboluul bōra n̄e ij ļōmņak kake ta eo ekar waļo̧k ilo 20th-epepen Germany.
N̄e juon ej jum̧ae ak jab errā ippād, ej kōm̧m̧an bwe jen ļōmņak bwe ewōr juon men ebōd ippāer. Im jān ijin ej juon bun̄tōn edik n̄an kobaiktok ikdeleel ko renana n̄an naan ko aer im m̧akūtkūt ko.
Aaet, jej aikuj iien otemjej jutak kōn ta eo ejim̧we, im ewōr iien jej aikuj kotak ainikied kōn un eo. Ijoke, n̄e jenej kōm̧m̧ane ilo illu ak dike ilo būruwōd—n̄e jenaaj kadiwōjļo̧k n̄an kōmetak ro jet, kajook er, ak kaikōn̄ er—kajjeon̄ ko rej bwe jejjab kōm̧m̧ani ilo jimwe.
Ta eo Rilo̧mo̧o̧r eo ekar katakin?
“A lo Ij ba n̄an kom̧, kom̧in iakwe ro rikōjdāte kom̧, jouj n̄an ro rej kanejnej e kom̧, im jar kōn ro rej iukkure kake kom̧ im matōrtōre kom̧;
“Bwe kom̧in maron̄ erom ro nejin Jemāmi eo ej pād ilan̄.”4
En̄in ej wāween eo an Rilo̧mo̧o̧r. En̄in ej bun̄tōn eo kein kajuon n̄an rube nana ko me rej kōm̧m̧an eļap kōjdat, dike, jepel, im kōmmetak ilo laļ in.
“Aaet,” komaron̄ ba, “Inaaj m̧ōņōņō in iakwe rikōjdat ro aō—eļan̄n̄e renaaj m̧ōņōņō in kōm̧m̧ane ejja wāween in wōt.
Ak ejjab lukkuun wōr tokjān, ej ke? Jej bōk eddo in lo̧mo̧o̧r eo ad make, im ejjab bwe—eļan̄n̄e jabdewōt—n̄an kōm̧m̧an ilo wāween eo ro jet rej kōm̧m̧ane n̄an kōj. Jej kōjatdikdik bwe renaaj meļeļe im jouj im ukōt tok, ak ad iakwe n̄an er ejenolo̧k jān en̄jake ko aer n̄an kōj.
Bōlen kijejeto eo ad n̄an iakwe ro ad rikōjdat enaaj kapidodoikļo̧k būruweer im kareel er n̄an em̧m̧an. Bōlen ejjāmin naaj. Ak menin ejjab ukōt kallim̧ur eo ad n̄an ļoor Jisōs Kraist.
Kōn menin, āinwōt ro uwaan Kabun̄ eo an Jisōs Kraist, jenaaj iakwe ro ad rikōjdat.
Jenaaj anjo ioon illu ak kōjdat.
Jenaaj kobrak būruwōd kōn iakwe n̄an aolep ajri ro nejin Anij.
Jenaaj pukōtļo̧k ro jet im kōjeraam̧m̧an er im katakin er—men̄e ro remaron̄ “kōjdate [kōj] im matōrtōr [kōj].”5
Eo Mantin Rikaļoor
Jemjati eo kein kajilu ej bōk mantin rikaloor an Jisōs Kraist. Ekar kōm̧m̧ane juon men eo emaron̄ lukkuun pen n̄an kōm̧m̧ane: ekar lōke Anij men̄e ilo iien jelm̧ae kōm̧m̧an ko renana im pen. Mekarta ekar kōjparok an tōmak im kōjatdikdik, men̄e kajirere im kōnana rej jeepoļe. Ekar m̧ōņōņō an mour, ejjab kōnke jekjek ko ippān rōkar lan̄lōn̄ ak kōnke liin eaar lan̄lōn̄.
Ejjeļo̧k iaad ej tōprak iaļen mour eo an ilo an ejjeļo̧k jum̧ae. Kōn elōn̄ kapo ko rej kajjeon̄ kūnōōrļo̧k kōj, ewi wāween ad dāpij jibadbad eo ad ioon lem̧ōņōņō eo eaiboojoj kar kallim̧ur kake n̄an ro rittōmak?
Ij tōmak uwaak eo maron̄ loe ilo juon ettōņak an juon rikanaan taujin iiō ko remootļo̧k. Etan rikanaan eo ej Liai, im ettōņak eo ekar jeje ilo Bok in Mormon eo eaiboojoj im kabwilōn̄lōn̄.
Ilo ettōņak eo an, Liai ekar loe juon melaaj eļap, im ilo meļaaj in ekar juon wōjke ekabwilōn̄lōn̄, ekar aiboojoj ilōn̄in jabdewōt men. Ekar barāinwōt loe juon kūrub in armej rej etal jibadōkļo̧k wōjke in. Rōkar kōņaan nemak leen wōjke in eaiboojoj. Rōkar en̄jake im lōke bwe enaaj leļo̧k n̄an er m̧ōņōņō eo eļap im aenōm̧m̧an.
Ewōr juon iaļ eaidik ej tōlļo̧k n̄an wōjke eo, im itōrerein ekar wōr juon aen in dāpdeb me ekar jipan̄ er pād wōt ilo iaļ eo. Ak ekar barāinwōt wōr juon maroklep eo me ekar kōtab mejāer jim̧or jān iaļ eo im wōjke eo. Im bōlen eļap kauwōtata ekar itok jān juon ainikien ettōn̄ eļļaaj im kajjirere ej itok jān juon jarlepju eļap im em̧ juon kileplep epaak. Kanooj kailbōkbōk, kajirere eo ekar kareel jet iaan armej ro rōkar tōpar wōjke eo im kar m̧ōn̄ā jān leen wōjke eo eaiboojoj im jino kar en̄jake aer jook im jōbwābwe.6
Bōlen rōkar jino pere bwe wōjke eo ekar lukkuun aiboojoj āinwōt aer kar ļōmņak e. Bōlen rōkar jino kajjitōk m̧ool eo kōn ta eo rōkar en̄jake.
Bōlen rōkar ļōmņak bwe n̄e renaaj oktak jān wōjke eo, mour enaaj pidodoļo̧k. Bōlen armej reban bar kakkure ak kajirere kake er.
Im ilo m̧ool, armej ro rekar ettōn̄ kake er āinwōt armej ro rōkar m̧ōņōņō im em̧m̧an aer pād. Kōn menin bōlen eļan̄n̄e rej em̧m̧akūt jān wōjke eo, renaaj ruwainene n̄an jarlepju eo ilowaan m̧weo eļap peļaakin im naaj nebar er kōn aer kūle, māletlet, im ekkeke.
Pād wōt ilo Iaļ eo
Ro jitōn bōro kōrā, ro jitōn bōro jera, eļan̄n̄e kom̧ij lo an pen ami dāpdep ilo aen in dāpdep eo im etetal dim n̄an lo̧mo̧o̧r; eļan̄n̄e rikajirere im kakkure an ro jet ro rekōm̧m̧an ami m̧ōjņo̧; eļan̄n̄e kom̧ij inepata kōn kajjitōk ko rejjan̄in uwaak ak katak ko kwōj jab meļeļe; eļan̄n̄e kom̧ij būrom̧ōj kōnke inepata ko, ij rōjan̄ kom̧ n̄an keememej ettōņak eo an Liai.
Pād wōt ilo Iaļ eo!
Jab kōtļo̧k aen in dāpdep eo—naan eo an Anij!
Im n̄e jabdewōt ej kajjieon̄ kōm̧m̧an ami jook n̄an bōk m̧ōttan iakwe eo an Anij, meļo̧kļo̧k er.
Jab meļo̧kļo̧k kom̧ij ajri ro nejin Anij; kōjeraam̧m̧an ko reļļap rej kōttar; eļan̄n̄e komaron̄ ekkatak kōm̧anm̧an Ankilaan, kom̧ naaj mour Ippān bar juon alen!7
Kallim̧ur ko kōn nōbar im errā jān laļ in rejjab jejjet, rejjab m̧ool, im rejjab kaju buruwōd. Kallim̧ur ko an Anij repen, m̧ool, im lan̄lōn̄—kiiō im n̄an indeeo.
Ij kūr n̄an kom̧ n̄an ļōmņak kōn kabun̄ im tōmak jān juon jibadbad eutiejļo̧k. Ejjeļo̧k juon men jej bōk ilo m̧weo eļap peļaakin maron̄ keidi n̄an leen ko an mour kōn gospel eo an Jisōs Kraist.
Em̧ool, “mej ear jab loi, im lo̧jilin̄i ear jab ron̄, im re jan̄in deļo̧n̄ ilo buruōn armej, men ko jabdewōt Anij ear kōpoji n̄an ro rej iakwe E.”8
Ikar katakin ippa make bwe iaļin lo̧mo̧o̧r ilo gospel eo an Jisōs Kraist ej iaļ eo n̄an lan̄lōn̄. Ej iaļ eo n̄an jokne im aenōm̧m̧an. Ej iaļ eo n̄an m̧ool.
Ij kam̧ool bwe jān menin letok eo im kajoor eo an Jetōb Kwojarjar, kom̧aron̄ ekkatak menin n̄an kom̧ make.
Ilo tōre in, eļan̄n̄e iaļ in ej pen n̄an kom̧, ij kōjatdikdik bwe kom̧ naaj lo jikin kone im kajoor ilo doulul ko rem̧m̧an an Kabun̄ in: Būraimere, Doulul eo an Jiron̄ ro, im Doulul eo an Kōrā ro. Rej āinwōt jikin kakkije ko ilo iaļ in, ijo me komaron̄ kōkāāl lōke im tōmak eo am̧ n̄an iaļ eo ej itok wōt. Rej juon im̧ōn kone, ijo me komaron̄ en̄jake ke kwōj m̧ōttan wōt im maron̄ bōk rōjan̄ jān kōrā ro jeimi im jatimi im rikaļoor ro m̧ōttami.
Men ko kom̧ kar maron̄ ekkatak ilo Būraimere rej kōpooj eok n̄an m̧ool ko jet kwōj katak āinwōt juon jiron̄. Iaļ in lo̧mo̧o̧r eo kwōj etetal ie ilo kilaaj ko an Doulul eo an Jiron̄ ro rej tōlļo̧k n̄an kōkkaajriri im jem̧doon an Doulul eo an Kōrā ro. Kōn kajjojo bun̄tōn ilo iaļ in, em̧ōj lewaj n̄an kom̧ elōn̄ļo̧k men ko rem̧m̧an n̄an ami kwaļo̧k ami iakwe n̄an ro jet kōn kilaan tōmak, tiriam̧o, iakwe em̧ool, wānōk, im jerbal in jipan̄.
Kālet iaļ in lo̧mo̧o̧r in enaaj tōl ļo̧k kom̧ n̄an m̧ōņōņō eo jan̄in kar ron̄ kake im kūrm̧ool eo an mour kwojarjar eo ami.
Ejjāmin naaj pidodo. Enaaj aikuj ijo em̧m̧antata kom̧ maron̄e—aolepān jeļāļo̧kjeņ eo am̧, am̧ kōppeļaak, tōmak, m̧ool, kajoor, kijejeto, im iakwe. Ak juon raan kom̧ naaj reilikļo̧k n̄an kijejeto ko ami, im o, ewi jon̄an ami kam̧oolol bwe maron̄ kajoor wōt, bwe kom̧ kar tōmak im bwe kom̧ kar jab em̧m̧akūt jān iaļ eo.
Wōnm̧aanļo̧k Wōt
Emaron̄ lōn̄ men ko kōn mour in me rej jab pād ilo kajoor ko ami. Ak ilo jem̧ļo̧kin, wōr am̧ kajoor n̄an kālet jim̧or mejān kajjik eo im elōn̄ iaan en̄jake ko ilo iaļ in. Ejjab ļap jon̄an maron̄ ko ami bōtaab kālet ko ami renaaj kōm̧m̧an oktak ilo mour in.9
Kom̧ij jab maron̄ kōtļo̧k bwe jōkjōk eo ren kabūrom̧ōj kom̧.
Kom̧ij jab maron̄ kōtļo̧k jōkjōk ko ami ren kalluik kom̧.
Kom̧ maron̄ lan̄lōn̄ bwe kom̧ij juon leddik nejin Anij. Kom̧ maron̄ loe lan̄lōn̄ im m̧ōņōņō ilo tiriam̧o̧ eo an Anij im ilo iakwe eo an Jisōs Kraist.
Kom̧ maron̄ m̧ōņōņō.
Ij rōjan̄ kom̧ n̄an kobrak būruwōm̧ kōn kam̧m̧oolol kōn m̧weiuk ko reļļap im em̧m̧an eo an Anij ejjab likjab. Kōrā rein jeiū im jatū, kom̧ maron̄ kōm̧m̧ane menin! Ij jar kōn aolepān aō jetōb bwe kom̧ naaj kōm̧m̧ani kālet ko n̄an wōnm̧aanļo̧k n̄an wōjke in mour eo. Ij jar bwe kom̧ naaj kālet n̄an kotak ainikiemi im kōm̧m̧an bwe mour ko ami ren m̧ōņōņō im aiboojoj, lan̄lōn̄ ilo ta iakwe eo an Anij, ilo kabwilōn̄lōn̄ ko an Kabun̄ in An, im gospel eo an Jisōs Kraist emaron̄ bōktok n̄an laļ in.
Al eo an lo̧mo̧o̧r em̧ool emaron̄ jab jejjet ainikien ak aaet ebwe ainikien n̄an ro jet. Jān kar jinoin mour, menin ekar āindein wōt.
Ak n̄an Jemādwōj Ilan̄ im n̄an ro rej iakwe im kautiej E, ej wōt juon al em̧m̧an im aiboojoj—al eo eļap an em̧m̧an im erreo an pinmuur in iakwe im jerbal in jipan̄ n̄an Anij im ro riturin.10
Ij likūt aō kōjeraam̧m̧an āinwōt juon Rijjilōk an Irooj bwe kom̧ naaj lo kajoor eo im rōjan̄ n̄an eddōkļo̧k āinwōt ledik ro nejin Anij em̧ōņōņō ilo ami etetal kajjojo raan ilon iaļ in eaiboojoj an lo̧mo̧o̧r. Ilo āt eo ekwojarjar etan Jisōs Kraist, amen.
© 2017 jān Intellectual Reserve, Inc. Aolep jim̧we ko rej pād ippān. Kar jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an Visiting Teaching Message, November 2017. Marshallese. 97931 874