Etop eke First Presidency, eke Ofiong Duopeba, isua 2017
Ndiyom Christ ke ini Ukabare-isua
Andiwet edi President Dieter F. Uchtdorf
Oyoho Onoitem Iba ke First Presidency
Eno esok kpukpru mbon emi eyomde ndifiok ewe owo eke nnyin idide nte mbon Ufok Abasi Jesus Christ eke mme Ndisana-owo ke Ukpere-edem Ini, ami mkpama ndisiak nde nditongo emi edade iko ita emi ewut ete ke: Nnyin iyom Christ.
Nnyin iyom ndikpeb nto Enye. Man itiene Enye Man ikabare ibiet Enye ofon.
Kpukpru usen ke ofuri isua, nnyin iyom Enye. Edi akpan-akpan ke ini ntem ke isua—Ukabare-isua, ini eke nnyin idarake emana Andinyanga nnyin—esit nnyin osuk eyiyire ke Enye.
Nte ubak mbenge-idem nnyin nno idara Ukabare-isua, yak nnyin ikere-ibanga danga nte mbonowo emi ekedude uwem ke mme isua tosin iba emi ekebede ekenam mbengeidem ndidara edidi Andinyanga.
Mme Ekpemerong
Nnyin inyeneke ediwak ifiok kabanga mme ekpemerong, nkokure edi ke mmo “eketie ke inwang, ekpeme erong mmo ke okoneyo.”1 Mme ekpemerong ikedige didie-didie owo, ukem nte ediwak nti owo emi esinamde ubiongutom mmo man enyene se ediade.
Mmo ekeme ndida-nno mme owo eke, ke ini kiet, emi mitimke iyom Christ, edi esit mmo okpuhore ke ini emi heaven eberede ndien ekworo Christ eno mmo.
Mmo emi edi mbon emi, ke ema ekekop uyo eke mme isungutom heaven, ke ndo-ndo oro eka ke Bethlehem eyom ndikikut.2
Ofiok-nkpo Owo
Mme Ofiok-nkpo Owo ekedi mme ofiok-nwed emi ekekpebde ebanga edidi eke Messiah, Eyen Abasi. Oto ke ukpeb mmo, mmo efiok mme idiongo emi owutde ini emana Esie. Ke ini mmo ekutde idiongo emi, mmo ema edaha-isang ekpong ufok mmo eka Jerusalem, ebup ete, “Enye emi akamanade nte Edidem mme Jew odu mmong?”3
Ifiok mmo kabanga Christ iketreke ke edifiok nwed kpot. Ini kiet emi mmo ekekutde mme idiongo emana Esie, mmo ema enam nkpo. Mmo ema etongo-isang man ekekut Christ.
Mme Ofiok-nkpo Owo ekeme ndida-nno mbon emi eyomde Christ oto ke ukpebnkpo ye ukpeb eke ufoknwed. Ke akpatre nsinifik mmo ndiyom akpaniko anam mmo ekekut Christ enyung etuak ibuot eno Enye nte Edidem mme ndidem, Andinyanga ubonowo.4
Simeon ye Anna
Simeon ye Anna ekeme ndida-nno mbonowo emi eyomde Christ oto ke Spirit. Mme nti owo emi ekedi mme okpono Abasi ke akpaniko onyung, oto ke utre-udia ye akam ye ndidu uwem nsinifik ye nkopitem, ke ebebet man ekut usen edidi Eyen Abasi.
Oto ke akpaniko, nsuhoreidem, ye mbuotidem, mmo ebet ke ime ese edidi Andinyanga.
Ke akpatre, edibet mmo ema enyene udori ke nte Mary ye Joseph ekeyakde nsekeyen oro ono mmo emi ke usen kiet eke edimende idioknkpo ofuri ubonowo idori ke Idemesie.5
Ikot Abasi kotu mbon Nephite ye Lamanite
Inem mbuk emi kabanga nte ikot Abasi ke Obufa Ererimbot eketiede ebet mme idiongo emana Andinyanga odu ke Nwed Mormon.
Mbufo emeti ete ke ema esuene enyung esin-enyin ye mbon emi ekenyenede mbuotidem ke Chrsit. Mbon mbufiok-nkari eke eyo oro ema ebiom ikot Abasi ikpe ete ke mmo edori-enyin ke mme ndisime nkpo. Ke akpaniko, mbon eke midige ikot Abasi ema esong uyo ke esuene mmo ekesim nte mmo enamde “okposong uyom” ke obio (3 Nephi 1:7). Mmo ema esak-nsahi ye mbon emi ekenimde ete ke Andinyanga eyedimana.
Iyatesit ye ifiopesit mmo ama okpon okori nte mmo ekekabare eyire ke ndinam inikiet man ofuri mbon emi enimde Andinyanga ke akpaniko edu ke ndop-uyo. Nwed Mormon ama ewet abanga okposong ubiere.6
Ikot Abasi emi ekedude ke ini emi ekeme ndida-nno mbon emi eyomde Christ kpa ke ini emi mbon efen esakde-nsahi, esuene, enyung esungi. Mmo eyom Christ kpa ke ini mbon efen edomode ndida mmo nte mbon-ufin, anana-ifiok ye nsuhore owo.
Edi nsahi mbon eken ikpanke nti ikot Abasi ke ndiyom Christ.
Jesus Christ
Ke ofuri isua kiet, ndien ndusuk akpan-akpan ke ini Ukabare-isua emi, eyefon ye nnyin inikiet efen ndibup mbume emi ete, “Didie ke ami nyom Christ?”
Ke okposong ini kiet ke eyo uwem esie, akwa Edidem David ekewet ete, “O Abasi, afo edi Abasi mi; nyebak nyom fi: Itong fo odong mi ukpong, obukidem mi oyoyom fi.”7
Ndusuk edu ediyom Abasi ntem ekedi kiet kotu mme ntak emi ekebatde David nte owo emi ekemde esit ye Abasi.8
Kini Ukabare-isua emi ye ke ofuri isua, yak nnyin iyom edima Andinyanga nnyin, Obong Emem, Edisana Owo Israel ke esit ye ukpong nnyin. Ke akamba ndaha, ntak udong emi, idiwutke ete ke nnyin idi mbon Ufok Abasi Jesus Christ eke mme Ndisana-owo ke Ukpere-edem Ini kpot edi eyetim owut nnyin nte mbet Christ.
© 2017 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17 Ndikabare Etop eke First Presidency Message, December 2017. Efik 97929 553