iTukutuku ni Mataveiliutaki Taumada, Tiseba 2017
Vakasaqarai Karisito ena Siganisucu
Mai vei Peresitedi Dieter F. Uchtdorf
Karua ni Daunivakasala ena Mataveiliutaki Taumada
Kivei ira kece era diva me ra kila vakavinaka se ocei beka o keimami na lewe ni Lotu i Jisu Karisito ni Yalododonu Edaidai, au via solia e dua na vanua mo ni tekivu kina, ka vakamacalataki ena tolu na vosa oqo: Keimami vakasaqarai Karisito.
Keimami vakasaqara me keimami vuli mai Vua. Me muri Koya. Me vakataki Koya vakalevu cake.
Ena veisiga ena loma ni yabaki, keimami vakasaqarai Koya. Ia, vakabibi cake ena gauna marautaki oqo ni—Siganisucu, ni da marautaka tiko na nona sucu na noda iVakabula lomani—e malele vakalevu sara na yaloi keimami ki Vua.
Me tiki ni noda marautaka na Siganisucu, da vakananuma mada na nodra nanamaki era bula tu ena rua na udolu na yabaki sa oti me ra kidavaka na Nona tadu mai na iVakabula.
O iratou na iVakatawa ni Sipi
E sega soti ni levu na ka eda kila baleti iratou na ivakatawa ni sipi, “era sa tiko ena vanua veico, a ra veivuke me vakatawa na sipi e na bogi.”1 E rairai ni ratou tamata wale tu ga o iratou na ivakatawa ni sipi, me vaka e levu na tamata rogo vinaka era cakacaka tiko me ra rawata na nodra bula ena veisiga.
Ena rawa beka ni ratou vakaibalebaletaki vei ira na tamata, ka ena dua na gauna, era a sega tu ni vakasaqara matua na Karisito, ia a veisau na lomadra ni a tadola na lomalagi ka qai vunautaki vei ira na Karisito.
Sa ira oqo, ena nodra rogoca na domodra na italai mai lomalagi, era gole kusa rawa yani ki Peceliema ni ra sa via raica.2
O Iratou na Tamata Vuku
Eratou a tamata kila vakavuli na Tamata Vuku ena nodratou vakadikeva tiko mai na tadu mai ni Mesaia, na Luveni Kalou. Ena veika eratou vulica, eratou kila rawa mai na ivakatakilakila ni dusia na Nona sucu. Ni ratou sa kilai ira rawa, eratou sa biuta na nodratou vale ka gole ki Jerusalemi, ka taroga, “Evei ko koya sa sucu me nodra Tui na Jiu?”3
Na nodratou kila me baleta na Karisito e sega ni tiko vakadua ena veika ni vuli vakatabakidua ga. Ena gauna saraga eratou raica kina na ivakatakilakila ni Nona sucu, eratou sa yavala. Eratou gole yani me vakasaqara na Karisito.
Eratou rawa ni matataki ira na vakasaqara na Karisito ena vuli kei na kila vakavuli na Tamata Vuku. Na nodra guta na dina ena yaco me muataki ira me ra kunea na Karisito ka vakarokorokotaki Koya ni sa Tui ni Tui, ka iVakabula ni kawatamata.4
Simioni kei Ana
O Simioni kei Ana erau rawa ni vakaibalebaletaki vei ira era vakasaqara na Karisito ena Yalo. O ira na yalo vakasakiti oqo era dau lotu vakaidina, ena lolo kei na masumasu kei na nodra bulataka na bula yalodina kei na talairawarawa, era waraka ena nanamaki me ra raica na siga e lako mai kina na Luveni Kalou.
Ena yalodina, yalomalumalumu, kei na vakabauta, era yadrava ena yalovosota na Nona na lako mai na iVakabula.
E qai yaco vakakina, ni a saumi na nodratou yalodina ena nodrau vakaraitaka vei iratou o Meri kei Josefa na gone ka na qai colata vei Koya na ivalavala ca ni kawatamata.5
O ira na vakabauta ena kedra maliwa na Nifaiti kei na Lemanaiti
Na italanoa veitarai me baleti ira na vakabauta ena Vuravura Vou ka ra vakasarava na ivakatakilakila ni sucu ni iVakabula e kune ena iVola i Momani.
Mo nanuma tiko o ira era vakabauta na Karisito era a vakalialiai ka vakacacani. O ira na kila ka ena gauna oya era beitaki ira na vakabauta ni ra takube matua tiko ki na veivakabauta kabukabua qai sesewa. Era a dau vosa veivakacacani sara vakalevu na tawavakabauta ka ra vakavuna “na tiko yavavala levu” ena vanua taucoko. (3 Nifai 1:7). Era vosabeci ira na vakabauta ni na sucu na iVakabula.
E tubu vakalevu sara na nodra cudru kei na katakata me yacova ni ra sa guta vakaukauwa me ra vakagalui ira vakadua era vakabauta na iVakabula. E volaitukutukutaki tu ena iVola i Momani na veika e qai yaco.6
O ira na vakabauta ni gauna oya e rawa ni vakaibalebaletaki vei ira era vakasaqara na Karisito, ena gauna sara madaga era dredrevaki, vakalialiai, se vosa vakacacataki kina. Era vakasaqarai Karisito, ena gauna sara madaga e lasutaki kina na itukutuku baleti ira ka boroi ira me ra tawavuli, tawakila-ka, se rawai rawarawa.
Ia, na nodra veicavilaki na tani e sega ni vakayalolailaitaki ira na vakabauta dina, mai na vakasaqarai Karisito.
Eda Vakasaqarai Karisito
Ena lomani yabaki, ka vakabibi ena gauna ni Siganisucu oqo, ena vinaka sara vei keda meda taroga tale mada na taro “Au sa vakasaqarai Karisito tiko beka vakacava?”
Ena dua na gauna dredre ni nona bula, e a vola na Tui cecere o Tevita, “Oi kemuni na Kalou, ko ni sa noqu Kalou; kau na sou meu qaravi kemuni: sa viagunu vei kemuni na yaloqu, sa gu ga vei kemuni na lewequ.”7
Na ivakarau ni vakasaqara na Kalou oqo e dua na vuna e a vakatokai kina o Tevita ni dua na tamata loma vata kei na Kalou.8
Ena gauna ni Siganisucu oqo ka vakakina ena lomani yabaki taucoko, me da vakasaqara ena yaloda kei na lomada na noda iVakabula lomani, na Tui ni Sautu, na Yalosavasava i Isireli. Baleta na gagadre oqo, vakalevu sara, e sega walega ni vakatakilai keda ni da lewenilotu ni Lotu i Jisu Karisito ni Yalododonu Edaidai, ia, vakabibi cake ni da sa i tisaipeli dina i Karisito.
© 2017 mai na Intellectual Reserve, Inc. Dodonu kece e maroroi. Tabaki e Amerika. Vakadonui me Vakavalagi: 6/17. Veivakadonui me vakadewataki: 6/17. iVakadewa ni First Presidency Message, December 2017. Fijian. 97932 858