iVaqa ni Veisiko, Tiseba 2017
Yalorawarawa ena Colati Vata ni Noda vei iColacola
Vulica ena masumasu na itukutuku oqo ka vakasaqara na veivakauqeti mo kila na ka mo wasea. Ena vakarautaki ira vakacava na luve ni Kalou yalewa ki na veivakalougatataki ni bula tawamudu na kena kilai deivaki na inaki ni iSoqosoqo ni Veivukei?
Vakabauta Matavuvale Veivukei
“Eda sa vakavolivoliti mai vei ira era na gadreva na noda veivuke, veivakauqeti, veitokoni, veivakalomavinakataki, kei na noda loloma,” e kaya o Peresitedi Thomas S. Monson. “Eda sa liga ni Turaga e vuravura edaidai, kei na itavi me qaravi ka vueti ira cake na Luvena. O Koya sa vakararavi tu vei keda yadudua.”1
E kaya o Peresitedi Henry B. Eyring, na iMatai ni Daunivakasala ena Mataveiliutaki Taumada: “E a tekivu e vuniyalomu e dua na veisau levu ena nomu a lako mai ki na Lotu. O a veiyalayalati, ka ciqoma e dua na iyalayala ka a tekivuna na veisau ni kemu ituvaki. …
“… O a yalataka ni o na vukea na Turaga me vakamamadataki na nodra ivua [na tani] ka me ra vakacegui. A soli vei iko na kaukauwa mo vukea na kena vakamamadataki na ivua oqori ena nomu a ciqoma na isolisoli ni Yalo Tabu.”2
“Eda vinakata me da vakayagataka na rarama ni kosipeli me da raici ira kina na tani me vaka e dau vakayacora na iVakabula—ena yalololoma, inuinui, kei na loloma cecere,” e kaya o Jean B. Bingham, Peresitedi Raraba ni Soqosoqo ni Veivukei. “Ena yaco mai na siga eda na kila vakavinaka kina na lomadra na tani ka da na vakavinavinaka ena loloma veivueti e soli vei keda—me vaka ga na noda vakanananu loloma kei na vosa vinaka vei ira na tani ena bula oqo. …
“Sa noda itavi kei na noda galala me da vakacerecerea na vinaka ena tamata kecega ni da segata cake me da vaka na noda iVakabula, o Jisu Karisito.”3
Ni da colata vata na noda icolacola ka maroroya na noda veiyalayalati, eda dolava na sala me vakabulai ira na tani o Jisu Karisito. E vakatavulica o Elder Jeffrey R. Holland ena Kuoramu ni iApositolo Le Tinikarua: “Ni vakasamataki na rabailevu ni isau ni Lauvako kei na Veisorovaki, au yalataka vei kemuni ni o Koya ena sega ni rawa vakadua ni vakanadakui keda oqo. Ena Nona kaya vei ira na yalomalumalumu, ‘Dou lako mai vei au,’ e vakaibalebaletaka o Koya ni kila na sala ki na galala kei na sala ni toso cake. E kila o Koya, baleta ni a sa lakova oti. E kila o Koya na sala baleta ni o Koya na sala.”4
iKuri ni iVolanikalou
© 2017 mai na Intellectual Reserve, Inc. Dodonu kece e maroroi. Tabaki e Amerika. Vakadonui me Vakavalagi: 6/17. Veivakadonui me vakadewataki: 6/17. iVakadewa ni isiting Teaching Message, December 2017. Latvian. 97932 858