Mensahe sang Unang Panguluhan, Disyembre 2017

Pagpangita kay Cristo sa Paskwa

Ni Pangulong Dieter F. Uchtdorf

Ikaduhang Manuglaygay sa Unang Panguluhan

Sa tanan nga luyag makahangop kon sin-o kita bilang mga miyembro sang Ang Simbahan ni Jesucristo sang mga Santos sa Ulihing mga Adlaw, luyag ko sugdan ang pagpaathag paagi sining apat ka pulong: Ginapangita namon si Cristo.

Nagatinguha kita sa pagtuon sa Iya. Sa pagsunod sa Iya. Nga mangin mas kapareho Niya.

Sa tagsa ka adlaw sa bilog nga tuig, aton Sia ginapangita. Apang ilabi na gid sa sining tion sang tuig---ang Paskwa, sa aton pagsaulog sang pagkabun-ag sang aton pinalangga nga Manluluwas---ang aton mga tagipusuon mas labi pa gid nga nakatuon sa Iya.

Bilang parte sang aton mga pagpanghanda sa pagsaulog sang Paskwa, aton binagbinagon kon paano yadtong mga nagkabuhi mga duha ka milenya ang nagligad nangin handa sa pagsug-alaw sang pag-abot sang Manluluwas.

Ang mga Manugpahalab

Wala kita makatul-id parte sa mga manugpahalab, kundi lang nga sila yara “nagatiner sa kaumhan, nga nagabantay sa ila panong sang karnero sa kagab-ihon.”¹ Ang mga manugpahalab laban-laban mga ordinaryo man lang nga mga tawo, kaangay sa madamong maayong mga tawo nga nagahimo sang ila obligasyon sa palangitan-an.

Mahimo sila nga magrepresentar sa mga tawo nga, sa isa ka tion, ayhan indi nangin aktibo sa pagpangita kay Cristo, apang ang ila mga tagipusuon nagbaylo sang ang kalangitan nagbukas kag si Cristo ginpakilala sa ila.

Sila ang amo nga, matapos mabatian ang tingug sang langitnon nga mga mensahero, sa gilayon naglakat sa Betlehem nga luyag makakita.²

Ang mga Mangin-alamon

Ang mga mangin-alamon may mataas nga kinaalam nga nagatuon sa pag-abot sang Mesias, ang Anak sang Dios. Paagi sa ila natun-an, ila nakilala ang mga patimaan nga nagatumod sa Iya pagkabun-ag. Sang ila makilal-an ang mga ini, ginbayaan nila ang ila mga panimalay kag nagbiyahe padulong sa Jerusalem, nga nagapamangkot, “Diin bala sia nga Hari sang mga Judio?”³

Ang ila ihibalo kay Cristo wala nagpabilin nga teoriya lamang. Sang makita nila ang mga patimaan sang Iya pagkabun-ag, naggiho sila. Naglakat sila agud pangitaon si Cristo.

Ang mga mangin-alamon mahimo nga magrepresentar sa ila nga nagapangita kay Cristo paagi sa pagtuon sa pag-akto kag pagtuon sa teoriya. Ang ila debosyon sa kamatuoran sang ulihi nagtuytoy sa ila agud nga makita si Cristo kag simbahon Sia bilang Hari sang mga hari, ang Maluluwas sang katawhan.⁴

Simeon kag Ana

Sanday Simeon kag Ana mahimo magrepresentar sa ila nga nagapangita kay Cristo paagi sa Espiritu. Ining dalayawon nga mga kalag nangin maukod sing espirituhanon kag, paagi sa pagpuasa kag pangamuyo kag sa pagpangabuhi nga may debosyon kag pagtuman, naghulat sing may kakunyag nga makita ang adlaw sang pagkari sang Anak sang Dios.

Paagi sa pagkamainunungon, pagkamapainubuson, kag pagtuo, mapasensyahon sila nga naghulat sa pagkari sang Manluluwas.

Sang ulihi, ang ila pagkamainunungon ginpadyaan sang ginpresentar sa ila nanday Maria kag Jose ang lapsag nga sa isa ka adlaw amo ang magadala sa Iya kaugalingon sang mga sala sang katawhan.⁵

Mga tumuluo sa tunga sang mga Nefinhon kag mga Lamanhon

Ang makatalandog nga estorya kon paano ang mga tumuluo sa Bag-ong Kalibutan nagbantay sang mga patimaan sa pagkabun-ag sang Manluluwas makita sa Libro ni Mormon.

Madumduman ninyo nga yadtong mga may pagtuo kay Cristo ginpangyaguta kag ginpangtamay. Ang mga sosyal sadto nga panahon nag-akusar sa mga tumuluo nga nagasandig sila sa kabuangan nga mga desperates. Sa pagkamatuod, ang indi mga tumuluo tuman ka baskog sa ila nga pagpangyaguta nga nagtuga sila sang “isa ka dako ka kinagubot”sa bug-os nga kadutaan (3 Nefi 1:7). Gin-uliga nila yadtong mga nagapati nga ang Manluluwas matawo.

Ang ila kaakig kag kasingki nagdako sing tuman nga nangin tuman sila kaisog nga pahipuson na gid sa katapusan ang tanan nga nagapati sa Manluluwas. Ang Libro ni Mormon nagsulat sang madrama nga katapusan.⁶

Ang mga tumuluo nga nagkabuhi sa sining panahon mahimo magrepresentar sa ila nga nagapangita kay Cristo bisan nga ang iban nagakadlaw, nagapangyaguta, kag nagapanunlog. Ginapangita nila si Cristo bisan nga ang iban nagatinguha nga bansagan sila nga mga baraghal, kulang sang ihibalo, ukon ilintuon.

Apang ang pagpangyaguta sang iban wala nagapaluya sa matuodtuod nga mga tumuluo sa pagpangita kay Cristo.

Ginapangita Naton si Cristo

Sa bilog nga tuig, kag ayhan ilabi na gid sa sining tion sang paskwa, makabulig sa aton nga sa liwat magpamangkot “Paano ko ginapangita si Cristo”?

Sa mabudlay nga tion sang iya kabuhi, ang bantog nga Haring David nagsulat, “O Dios, ikaw akon Dios; pangitaon ko ikaw sing hanuot: ang kalag ko ginauhaw sa imo, ang akon unod ginalangkag sa imo.”⁷

Ayhan ining kinaugali sa pagpangita sa Dios isa sang mga rason nga si David ginkilala bilang isa ka tawo nga suno sa tagipusuon sang Dios.⁸

Sa sulod sining panahon sang Paskwa kag sa bilog nga tuig, kabay nga pangitaon naton ang aton pinalangga nga Manluluwas, ang Prinsipe sang Paghidaet, ang Isa nga Balaan sang Israel sa bug-os naton nga mga tagipusuon kag mga kalag. Kay ining handum, sa dako nga bahin, nagapakilala indi lamang kon sin-o kita bilang mga miyembro sang Ang Simbahan ni Jesucristo sang mga Santos sa Ulihing mga Adlaw kundi ilabi na kon sin-o kita bilang mga sumulunod ni Cristo.

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang First Presidency Message, December 2017. Hiligaynon. 97932 861