Mensahe sa Visiting Teaching, Disyembre 2017

Handa Magpas-an sang mga Palas-anon sang Isa kag Isa

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano bala ang paghangop sang katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?

Pagtuo Pamilya Bulig

“Ginapalibutan kita sadtong mga nagakinahanglan sang aton pagtamod, sang aton pagpaisog, sang aton pagsakdag, sang aton pagpaumpaw, sang aton kaayo,” siling ni Pangulong Thomas S. Monson. “Kita ang mga kamot sang Ginuo diri sa duta, nga may mando nga mag-alagad kag mag-alsa sa Iya mga anak. Siya nagasalig sa isa kag isa sa aton.”¹

Si Pangulong Henry B. Eyring, Unang Manuglaygay sa Unang Panguluhan, nagsiling: “Isa ka dako nga pagbag-o ang nagsugod sa inyo tagipusuon sang magkari kamo sa sini nga Simbahan. Naghimo kamo sang kasugtanan, kag nagbaton kamo sang promisa nga nagsugod sa pagbag-o sang inyo mismo kinaugali. …

“ … Nagpromisa kamo nga buligan ninyo ang Ginuo nga pamag-anon ang palas-anon sang [iban] kag paumpawan sila. Ginhatagan kamo sing gahum sa pagbulig pamag-an sadtong mga lulan sang inyo nabaton ang dulot sang Balaan nga Espiritu.”²

“Luyag naton gamiton ang kasanag sang ebanghelyo nga makita ang iban subong sang pagkakita sang Dios sa ila—nga may kaluoy, pag-asa, kag putli nga pagmahal,” siling ni Jean B. Bingham, Pangkabilugan nga Pangulo sang Relief Society. “Ang adlaw magaabot kon san-o makaangkon kita sang lubos nga paghangop sang tagipusuon sang iban kag mangin mapinasalamaton sa kaluoy nga ginhatag sa aton kasubong nga kita nagahatag sing maluluy-on nga panghunahuna kag mga pulong sa iban. …

“Ang aton obligasyon kag prebilihiyo amo nga dal-on naton ang pag-uswag sa tanan sa aton pagtinguha nga mangin mas labing kasubong sa aton Manluluwas.”³

Kon aton ginapas-an ang mga palas-anon sang isa kag isa, kag ginatipigan ang aton mga kasugtanan, ginabuksan naton ang alagyan para kay Jesucristo agud ayuhon ang iban. Si Elder Jeffrey R. Holand sang Korum sang Napulo’g Duha ka Apostoles nagtudlo: “Nga ginabinagbinag ang indi mahangpan nga bili sang Paglansang kag Pagbayad-sala, ginapromisa ko sa inyo indi kita Niya pagtalikdan sa karon. Sang sia nagsiling sa mga imol sa espiritu, ‘Kari kamo sa akon,’ Iya ginapahangop nga nakahibalo Sia sang alagyan pagwa kag alagyan pasaka. Ïya ini nahibaloan bangud Iya na ini naagyan. Nahibaloan niya ang dalan bangud Sia amo’ng dalan.”⁴

Dugang nga Balaan nga mga Kasulatan

Mateo 25:40; Mga Taga-Galacia 6:2; Mosias 2:17; 18:8-9

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, December 2017. Hiligaynon. 97932 861