Mensahe ti Umuna a Panguluen, Disiembre 2017
Panangsapul ken ni Cristo iti Paskua
Ni Presidente Dieter F. Uchtdorf
Maikadua a Mammagbaga iti Umuna a Panguluen
Iti amin nga agtarigagay tapno maawatan no asinotayo kas miembro ti Ti Simbaan ni Jesucristo dagiti Santo iti Ud-udina nga Aldaw, kayatko nga isingasing ti lugar a panangirugiyo a panangsukisok nga ilawlawag dagitoy tallo a balikas: Sapulentayo ni Cristo.
Agkalikagumtayo a mangsursuro ti maipapan Kenkuana. Mangsurot Kenkuana. Agbalin nga ad-adda a kas Kenkuana.
Inaldaw iti unos ti tawen, kalikagumantayo ti mangsapul Kenkuana. Ngem nangnangruna iti daytoy a panawen ti tawen—Paskua, no rambakantayo ti pannakayanak ti ay-ayatentayo a Mangisalakan—ad-adda a maipamaysa dagiti puspusotayo Kenkuana.
Kas paset dagiti panagsaganatayo iti panangrambak iti Paskua, panunotentayo koma no kasano a nagsagana a sumarabo dagiti nagbiag dua ribu a tawen ti napalabasen tapno sarabuenda ti idadateng ti Mangisalakan.
Dagiti Agpaspastor
Ditayo unay ammo ti maipanggep kadagiti agpaspastor, ammotayo laeng nga isuda dagiti “agyan iti away nga agay-aywan nga agpuyat iti rabii kadagiti animalda.”1 Dagiti agpaspastor a nagnangruna pay ngem iti gagangay a tattao, kas iti adu a nasingsingpet a tattao nga agtrabaho iti inaldaw tapno adda pagbiagda.
Maibagianda dagiti tao nga, iti maysa a gundaway, mabalin a saanda a sireregta nga agsapsapul ken ni Cristo, ngem nagbalbaliw dagiti pusoda idi naglukat dagiti langit ket naiwaragawag ni Cristo kadakuada.
Isuda dagiti tao a, kalpasan ti panangdengngegda iti timek dagiti nailangitan a mensahero, napanda a dagus iti Betlehem iti panagtarigagayda a makita isuna.2
Dagiti Masirib a Lallaki
Dagiti masirib a lallaki ket agad-adal iti idadateng ti Mesias, ti Anak ti Dios. Babaen kadagiti sursuroda, nailasinda dagiti tanda a nangipakita iti pannakayanakna. Idi nailasinda dagitoy, pinanawanda dagiti pagtaenganda ket nagbaniagada a napan iti Jerusalem,nga agsalsaludsod,“Sadino ti yan dayta nayanak nga Ari dagiti Judio? ”3
Ti pannakaammoda maipapan ken ni Cristo ket saan a nagtalinaed nga adal laeng. Apaman a nakitada dagiti tanda ti pannakayanakna, nagtignayda. Rinugianda ti nagbaniaga a mangsarak ken ni Cristo.
Dagiti masirib a lallaki ti mangibagi kadagiti agsapsapul ken ni Cristo babaen ti panagsursuro ken panagadal. Ti debosionda iti kinapudno in-inut a nangiturong kadakuada a mangsarak ken ni Cristo ken agrukbab Kenkuana kas Ari dagiti ari, ti Mangisalakan ti sangkataw-an.4
Da Simeon ken Ana
Da Simeon ken Ana ti mangibagi kadagiti agsapsapul ken Cristo babaen ti Espiritu. Dagitoy a nakaskasdaaw a kararua ket napasnek a relihioso ken, babaen ti panagayuno ken panagkararag, ken babaen ti panagbiagda nga addaan kinapasnek ken kinamanagtungpal, sigagagar nga inur-urayda ti aldaw ti idadateng ti Anak ti Dios.
Babaen ti kinapudno, kinapakumbaba, ken pammati, siaanus a pinadpadaananda ti idadateng ti Mangisalakan.
Iti kamaudiananna, nagunggonaan ti kinapudnoda idi indatag da Maria ken Jose kadakuada ti maladaga nga iti maysa nga aldaw awatennanto iti Bagina dagiti basabasol ti sangkataw-an.5
Dagiti Mamatpati kadagiti Nephite ken Lamanite
Ti makasagid-rikna nga estoria maipapan no kasano a pinadpadaanan dagiti mamatpati iti Baro a Lubong dagiti tanda ti pannakayanak ti Mangisalakan ket masarakan iti Libro ni Mormon.
Malagipyo a nauy-uyaw ken naparparigat dagiti addaan iti pammati ken ni Cristo. Pinabasol dagiti sopistikado iti dayta nga aldaw dagiti mamatpati gapu iti agtultuloy a panangsuportada kadagiti minamaag a pammati. Kinapudnona, ipukpukkaw dagiti saan a mamatpati ti panaguyawda ta “inyikkisda” iti pagilian (3 Nephi 1:7). Kinatkatawaanda dagiti namati a mayanakto ti Mangisalakan.
Kasta unay ti pungtot ken gurada gapu ta tinarigagayandan ti mangpapatay iti amin a mamati iti Mangisalakan. Insurat ti Libro ni Mormon ti makatignay-rikna a pangngeddeng.6
Dagiti mamatpati a nagbiag iti daytoy a panawen ket mangibagi kadagiti agsapsapul ken ni Cristo uray pay no katawaan, uyawen, ken laisen ida dagiti dadduma. Sapulenda ni Cristo uray no panggep nga inuulbod nga itakder ida dagiti dadduma kas managbasol, awanan adal, wenno nalaka a mamati.
Ngem ti gura dagiti dadduma ket saan a nangpaay iti namnama dagiti pudno a mamatpati iti panangsapsapulna ken ni Cristo.
Sapulentayo ni Cristo
Iti unos ti tawen, ken nalabit a nangnangruna iti daytoy a panawen ti Paskua, pagsayaatantayo no damagentayo ti saludsod “Kasano ti panangsapsapulko ken Cristo?”
Kabayatan ti narigat a panawen ti biagna, insurat ti naindaklan a ni Ari David, “O Dios,sika ti Diosko, sigaganetgetakto a mangbirok kenka; toy kararuak mawaw kenka, ti lasagko segseggaannaka.”7
Nalabit daytoy nga ugali a panagsapsapul ken ni Cristo ket maysa kadagiti rason nga inladawan ni David kas maysa a tao nga umasideg iti puso ti Dios. 8
Kabayatan daytoy a panawen ti Paskua ken iti unos ti intero a tawen, sapulentayo koma iti puspuso ken karkararuatayo ti ay-ayatentayo a Mangisalakan, ti Prinsipe ti Kappia, ti Nasantuan ti Israel. Para itoy a tarigagay, iti kaaduanna a paset, mangilawlawag saan laeng iti kinasiasinotayo kas miembro ti Ti Simbaan ni Jesucristo dagiti Santo iti Ud-udina nga Aldaw no di ti pudno a kinasiasinotayo kas disipulo ni Cristo.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, December 2017. Ilokano. 97932 864