Mensahe iti Visiting Teaching, Disiembre 2017
Siaayat a Makipagbaklay iti Imet ti Tunggal Maysa
Nainkararagan nga adalenyo daytoy a material ken kalikagumanyo ti inspirasion tapno ammuen no ania ti ibinglayyo. Kasano a ti pannakaawattayo iti panggep ti Relief Society ket mangisagananto kadagiti annak a babbai ti Dios para kadagiti bendision ti agnanayon a biag?
Pammati Pamilia Tulong
“Napalikmutantayo kadagiti agkasapulan iti atensiontayo, iti panangallukoytayo, iti suportatayo, iti liwliwatayo, iti panangngaasitayo,” kinuna ni Presidente Thomas S. Monson. “Datayo dagiti ima ti Apo ditoy daga, nga addaan iti bilin nga agserbi ken mangitag-ay kadagiti annakna. Isu ket agpannuray iti tunggal maysa kadatayo.”1
Kinuna ni Presidente Henry B. Eyring, Umuna a Mammagbaga iti Umuna a Panguluen: “Nangrugi ti dakkel a panagbalbaliw iti pusoyo idi immaykayo iti Simbaan. Nagaramidkayo iti katulagan ken inawatyo ti kari a nangrugi iti panagbalbaliw iti mismo nga ugaliyo. …
“… Inkariyo a tulonganyo ti Apo a mangpalag-an iti imet dagiti [dadduma] ket maliwliwaan. Naikkankayo iti bileg a mangtulong a mangpalag-an kadagiti imet idi inawatyo ti sagut ti Espiritu Santo.”2
“Kayattayo nga usaren ti silaw ti ebanghelio tapno kitaentayo dagiti dadduma kas iti ar-aramiden ti Mangisalakan—nga addaan iti panangngaasi, namnama,” kinuna ni Jean B. Bingham, Relief Society General President. “Dumtengto ti aldaw a naan-anay a maawatantayto ti puspuso dagiti dadduma ken agyamantayto iti asi a naipaay kadatayo—kas iti ipaaytayo a naasian a pampanunot ken balikas kadagiti dadduma. …
“Pagrebbengan ken pribilehiotayo ti umarakup iti panagsayaat iti tunggal maysa bayat ti panangikarigatantayo nga agbalin nga ad-adda a kas iti Mangisalakantayo.”3
Bayat ti panangibaklaytayo iti imet ti ti tunggal maysa ken panagtungpal kadagiti katulagantayo, luktantayo ti dalan para ken Jesucristo a mangagas iti dadduma. Insuro ni Elder Jeffrey R. Holland ti Korum dagiti Sangapulo-ket-dua nga Apostol: “Iti panangibilang iti saan a matukod a pateg ti Pannakailansa iti Krus ken ti Pannubbot, ikarik kadakayo a saannanatay a baybay-an ita. Idi kinunana daytoy iti addan nakurapay nga espiritu, ‘Umayka kaniak,’ Kayatna a sawen nga ammona ti dalan a rummuar ken ammona ti dalan nga agpangato. Ammona daytoy gapu ta nagnaannan daytoy. Ammona ti dalan gapu ta Isu ti dalan.”4
Dagiti Mainayon a Nasantuan a Kasuratan
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Visiting Teaching Message December 2017. Ilokano. 97932 864