ຂ່າວສານຈາກຝ່າຍປະທານສູງສຸດ, ເດືອນທັນວາ 2017
ການສະແຫວງຫາພຣະຄຣິດໃນຍາມເທດສະການຄຣິດສະມັດ
ໂດຍ ປະທານດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ຕໍ່ທຸກຄົນທີ່ຢາກເຂົ້າໃຈວ່າພວກເຮົາເປັນໃຜ ໃນຖານະທີ່ເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຂ້າພະເຈົ້າຢາກສະເໜີຈຸດເລີ່ມຕົ້ນ ທີ່ອະທິບາຍໂດຍສາມຄຳເຫລົ່ານີ້: ພວກເຮົາສະແຫວງຫາພຣະຄຣິດ.
ພວກເຮົາສະແຫວງຫາທີ່ຈະຮຽນຮູ້ກ່ຽວກັບພຣະອົງ. ທີ່ຈະຕິດຕາມພຣະອົງ. ທີ່ຈະກາຍເປັນເໝືອນດັ່ງພຣະອົງຫລາຍກວ່າເກົ່າ.
ທຸກວັນ ຕະຫລອດປີ, ພວກເຮົາສະແຫວງຫາພຣະອົງ. ແຕ່ໂດຍສະເພາະໃນລະຫວ່າງຍາມນີ້ຂອງປີ—ຄຣິດສະມັດ, ເມື່ອພວກເຮົາສະເຫລີມສະຫລອງວັນກຳເນີດຂອງພຣະຜູ້ຊ່ວຍໃຫ້ລອດທີ່ຮັກຂອງພວກເຮົາ—ເຮົາມັກເອົາໃຈໃສ່ຕໍ່ພຣະອົງຫລາຍກວ່າເວລາອື່ນ.
ໃນພາກສ່ວນຂອງການຕຽມສຳລັບການສະເຫລີມສະຫລອງບຸນຄຣິດສະມັດ, ຂໍໃຫ້ພວກເຮົາໄຕ່ຕອງກ່ຽວກັບວິທີທີ່ຜູ້ຄົນ ຜູ້ມີຊີວິດຢູ່ເມື່ອສອງພັນປີກ່ອນ ໄດ້ຕຽມຕ້ອນຮັບການສະເດັດມາຂອງພຣະຜູ້ຊ່ວຍໃຫ້ລອດແນວໃດ.
ຄົນລ້ຽງແກະ
ພວກເຮົາບໍ່ຮູ້ຫຍັງຫລາຍກ່ຽວກັບຄົນລ້ຽງແກະ, ພຽງແຕ່ຮູ້ວ່າ ພວກເຂົາ “ຢູ່ຕາມທົ່ງ ນອນເຝົ້າຝູງແກະຂອງພວກເຂົາໃນເວລາກາງຄືນ.”1 ຄົນລ້ຽງແກະ ຄົງເປັນຄົນທຳມະດາສາມັນ, ຄືກັນກັບຜູ້ຄົນອື່ນໆ ທີ່ອອກໄປເຮັດວຽກງານຫາລ້ຽງຊີບ.
ພວກເຂົາສາມາດເປັນຕົວແທນໃຫ້ແກ່ ບຸກຄົນ ທີ່ຄັ້ງໜຶ່ງເຄີຍ ບໍ່ສົນໃຈກັບການສະແຫວງຫາພຣະຄຣິດ, ແຕ່ໃຈຂອງພວກເຂົາໄດ້ປ່ຽນໄປ ເມື່ອຟ້າສະຫວັນເປີດອອກ ແລະ ພຣະຄຣິດໄດ້ຖືກປະກາດແກ່ພວກເຂົາ.
ພວກເຂົາຄືຜູ້ທີ່, ຫລັງຈາກໄດ້ຍິນສຽງຂອງອັກຄະທູດຈາກສະຫວັນ, ກໍໄດ້ໄປຍັງເມືອງເບັດເລເຮັມທັນທີ ເພາະຢາກເຫັນ.2
ພວກໂຫລາຈານ
ພວກໂຫລາຈານ ເປັນນັກປາດອາຈານ ທີ່ໄດ້ສຶກສາເລື່ອງພຣະເມຊີອາ, ພຣະບຸດຂອງພຣະເຈົ້າ. ຜ່ານການຮຽນຮູ້ຂອງພວກເພິ່ນ, ພວກເພິ່ນໄດ້ພົບເຫັນເຄື່ອງໝາຍສຳຄັນ ທີ່ບົ່ງບອກເຖິງການກຳເນີດຂອງພຣະອົງ. ເມື່ອພວກເພິ່ນໄດ້ພົບເຫັນແລ້ວ, ພວກເພິ່ນກໍໄດ້ອອກຈາກບ້ານເຮືອນຂອງພວກເພິ່ນ ແລະ ໄດ້ເດີນທາງໄປຍັງເຢຣູຊາເລັມ, ໂດຍຖາມວ່າ, “ເດັກທີ່ຫາກໍເກີດມາເປັນກະສັດຂອງຊາວຢິວນັ້ນຢູ່ໃສ?”3
ຄວາມຮູ້ຂອງພວກເພິ່ນ ບໍ່ໄດ້ເປັນພຽງການສຶກສາສູງເທົ່ານັ້ນ. ເມື່ອພວກເພິ່ນໄດ້ເຫັນເຄື່ອງໝາຍສຳຄັນເຖິງການກຳເນີດຂອງພຣະອົງ, ພວກເພິ່ນກໍໄດ້ລົງມືປະຕິບັດທັນທີ. ພວກເພິ່ນໄດ້ອອກໄປຊອກຫາພຣະຄຣິດ.
ພວກໂຫລາຈານສາມາດເປັນຕົວແທນໃຫ້ແກ່ ບຸກຄົນທີ່ສະແຫວງຫາພຣະຄຣິດ ຜ່ານທາງການຮຽນຮູ້ ແລະ ການສຶກສາສູງ. ໃນທີ່ສຸດ ການອຸທິດຕົນຂອງພວກເພິ່ນຕໍ່ຄວາມຈິງ ໄດ້ພາພວກເພິ່ນໄປຊອກຫາພຣະຄຣິດ ແລະ ນະມັດສະການພຣະອົງ ໃນຖານະເປັນຈອມເຈົ້າກະສັດ, ເປັນພຣະຜູ້ຊ່ວຍໃຫ້ລອດຂອງມວນມະນຸດ.4
ຊີເມໂອນ ແລະ ອານາ
ຊີເມໂອນ ແລະ ອານາ ສາມາດເປັນຕົວແທນໃຫ້ແກ່ ບຸກຄົນທີ່ສະແຫວງຫາພຣະຄຣິດ ຜ່ານທາງພຣະວິນຍານ. ບຸກຄົນທີ່ດີເລີດເຫລົ່ານີ້ ໄດ້ອຸທິດຕົນຕໍ່ສາດສະໜາ ແລະ ໂດຍການຖືສິນອົດເຂົ້າ ແລະ ອະທິຖານ ແລະ ໂດຍການດຳລົງຊີວິດດ້ວຍຄວາມອຸທິດຕົນ ແລະ ເຊື່ອຟັງ, ໄດ້ລໍຄອຍດ້ວຍຄວາມກໍຕືລືລົ້ນ ສຳລັບວັນແຫ່ງການສະເດັດມາຂອງພຣະບຸດຂອງພຣະເຈົ້າ.
ໂດຍຄວາມຊື່ສັດ, ຄວາມຖ່ອມຕົວ, ແລະ ສັດທາ, ພວກເພິ່ນໄດ້ເຝົ້າເບິ່ງດ້ວຍຄວາມອົດທົນ ສຳລັບການສະເດັດມາຂອງພຣະຜູ້ຊ່ວຍໃຫ້ລອດ.
ໃນທີ່ສຸດ, ຄວາມຊື່ສັດຂອງພວກເພິ່ນ ກໍໄດ້ຮັບບຳເນັດ ແລ້ວ ເມື່ອນາງມາຣີ ແລະ ໂຢເຊັບ ໄດ້ນຳກຸມມານນ້ອຍ ຜູ້ຊຶ່ງມື້ໜຶ່ງ ພຣະອົງເອງຈະຮັບເອົາບາບຂອງມວນມະນຸດ ມາສະເໜີຕໍ່ພວກເພິ່ນ.5
ຜູ້ທີ່ເຊື່ອໃນບັນດາຊາວນີໄຟ ແລະ ຊາວເລມັນ
ເລື່ອງລາວທີ່ໜ້າປະທັບໃຈ ເຖິງວິທີທີ່ຜູ້ທີ່ເຊື່ອ ຢູ່ໃນໂລກໃໝ່ ໄດ້ຄອຍຖ້າສຳລັບເຄື່ອງໝາຍສຳຄັນ ເຖິງການກຳເນີດຂອງພຣະຜູ້ຊ່ວຍໃຫ້ລອດ ມີຢູ່ໃນພຣະຄຳພີມໍມອນ.
ທ່ານຄົງຈື່ຈຳໄດ້ວ່າ ຜູ້ທີ່ມີສັດທາໃນພຣະຄຣິດ ໄດ້ຖືກເຍາະເຍີ້ຍ ແລະ ຖືກຂົ່ມເຫັງ. ຜູ້ມີຄວາມຮູ້ຫລາຍເລື່ອງທາງໂລກໃນສະໄໝນັ້ນ ໄດ້ກ່າວຫາຜູ້ທີ່ເຊື່ອ ວ່າເປັນຄົນໂງ່ຈ້າທີ່ເຊື່ອເລື່ອງງົມງາຍ. ຕາມຈິງແລ້ວ, ຜູ້ທີ່ບໍ່ເຊື່ອ ໄດ້ເວົ້າເຍາະເຍີ້ຍ ຈົນເຖິງຂັ້ນທີ່ “ໄດ້ຮ້ອງປ່າວ” ໄປທົ່ວແຜ່ນດິນ (3 ນີໄຟ 1:7). ພວກເຂົາໄດ້ເຍາະເຍີ້ຍ ຜູ້ທີ່ເຊື່ອວ່າພຣະຜູ້ຊ່ວຍໃຫ້ລອດຈະມາກຳເນີດ.
ຄວາມໂມໂຫ ແລະ ຄວາມໂຫດຮ້າຍຂອງພວກເຂົາ ຮ້າຍແຮງຂຶ້ນ ຈົນວ່າພວກເຂົາຕັ້ງໃຈທີ່ຈະກຳຈັດຜູ້ທີ່ເຊື່ອໃນພຣະຜູ້ຊ່ວຍໃຫ້ລອດ ໃຫ້ໝົດສິ້ນ. ພຣະຄຳພີມໍມອນ ມີບັນທຶກກ່ຽວກັບການແກ້ບັນຫາທີ່ໜ້າຫົດຫູ່ໃຈນັ້ນ.6
ຜູ້ທີ່ເຊື່ອທີ່ໄດ້ມີຊີວິດຢູ່ໃນເວລານັ້ນ ສາມາດເປັນຕົວແທນໃຫ້ແກ່ບຸກຄົນທີ່ສະແຫວງຫາພຣະຄຣິດ ແມ່ນແຕ່ຕອນຄົນອື່ນຫົວຂວັນ, ເຍາະເຍີ້ຍ, ແລະ ຍຸແຍ່. ເຂົາເຈົ້າສະແຫວງຫາພຣະຄຣິດ ແມ່ນແຕ່ຕອນຄົນອື່ນພະຍາຍາມລໍ້ລຽນເຂົາເຈົ້າວ່າເປັນຄົນໂງ່ຈ້າ, ບໍ່ມີຄວາມຮູ້ຫລາຍເລື່ອງທາງໂລກ, ຫລື ຖືກຫລອກງ່າຍ ກໍຕາມ.
ແຕ່ຄວາມໝິ່ນປະໝາດຂອງຄົນອື່ນ ບໍ່ໄດ້ເຮັດໃຫ້ຜູ້ທີ່ເຊື່ອ ທໍ້ຖອຍຈາກການສະແຫວງຫາພຣະຄຣິດເລີຍ.
ພວກເຮົາສະແຫວງຫາພຣະຄຣິດ
ຕະຫລອດທັງປີ, ແລະ ບາງທີໂດຍສະເພາະໃນຊ່ວງເທດສະການບຸນຄຣິດສະມັດນີ້, ມັນຄົງເປັນຜົນດີສຳລັບພວກເຮົາທີ່ຈະ ຖາມຄຳຖາມນີ້ອີກເທື່ອໜຶ່ງ ທີ່ວ່າ “ເຮົາສະແຫວງຫາພຣະຄຣິດໃນວິທີໃດ?”
ໃນໄລຍະທີ່ຫຍຸ້ງຍາກຂອງຊີວິດເພິ່ນ, ກະສັດດາວິດທີ່ຍິ່ງໃຫຍ່ ໄດ້ຂຽນວ່າ, “ຂ້າແດ່ພຣະເຈົ້າ ພຣະອົງເປັນພຣະເຈົ້າຂອງຂ້ານ້ອຍ ຈິດວິນຍານຂອງຂ້ານ້ອຍຫິວກະຫາຍຫາພຣະອົງ ດັ່ງດິນແຫ້ງແລ້ງທີ່ຂາດນ້ຳລໍ່ລ້ຽງສັນໃດ, ເນື້ອໜັງຂອງຂ້ານ້ອຍກໍຫິວກະຫາຍຫາພຣະອົງສັນນັ້ນ.”7
ບາງທີທັດສະນະຂອງການສະແຫວງຫາພຣະເຈົ້າ ອາດເປັນເຫດຜົນໜຶ່ງທີ່ດາວິດໄດ້ຖືກບັນຍາຍວ່າເປັນຄົນທີ່ເຮັດຕາມພຣະປະສົງຂອງພຣະເຈົ້າ.8
ໃນຊ່ວງເທດສະການບຸນຄຣິດສະມັດນີ້ ແລະ ຕະຫລອດທັງປີ, ຂໍໃຫ້ພວກເຮົາຈົ່ງສະແຫວງຫາພຣະຜູ້ຊ່ວຍໃຫ້ລອດທີ່ຮັກຂອງເຮົາ, ອົງສັນຕິລາດ, ແລະ ພຣະຜູ້ບໍລິສຸດຂອງອິດສະຣາເອນ ດ້ວຍໃຈ ແລະ ຈິດວິນຍານ. ສຳລັບຄວາມປາດຖະໜານີ້, ສ່ວນໃຫຍ່ແລ້ວ, ມັນບໍ່ພຽງແຕ່ບົ່ງບອກວ່າເຮົາເປັນໃຜ ໃນຖານະທີ່ເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເທົ່ານັ້ນ, ແຕ່ບົ່ງບອກຫລາຍກວ່ານັ້ນ ວ່າເຮົາເປັນສານຸສິດຂອງພຣະຄຣິດແນວໃດ.
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, December 2017. Laotian. 97932 331