ຂ່າວສານການຢ້ຽມສອນ, ເດືອນທັນວາ 2017
ຄວາມເຕັມໃຈທີ່ຈະແບກຫາບພາລະຂອງກັນແລະກັນ
ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈຈຸດປະສົງຂອງສະມາຄົມສະຕີສົງເຄາະ ຕຽມທິດາຂອງພຣະເຈົ້າ ສຳລັບພອນແຫ່ງຊີວິດນິລັນດອນແນວໃດ?
ສັດທາ ຄອບຄົວ ສົງເຄາະ
“ເຮົາຖືກອ້ອມຮອບໄປດ້ວຍຜູ້ຄົນທີ່ຕ້ອງການຄວາມສົນໃຈ, ຄວາມກ້າຫານ, ກຳລັງໃຈ, ການປອບໂຍນ, ຄວາມເມດຕາ ຈາກເຮົາ,” ປະທານທອມມັສ ແອັສ ມອນສັນ ໄດ້ກ່າວ. “ເຮົາເປັນພຣະຫັດຂອງພຣະຜູ້ເປັນເຈົ້າ ຢູ່ໃນໂລກນີ້, ໂດຍຖືກສັ່ງໃຫ້ຮັບໃຊ້ ແລະ ໃຫ້ຊ່ວຍຊູລູກໆຂອງພຣະອົງຂຶ້ນ. ພຣະອົງເພິ່ງອາໄສເຮົາແຕ່ລະຄົນ.”1
ປະທານເຮັນຣີ ບີ ໄອຣິງ, ທີ່ປຶກສາທີໜຶ່ງໃນຝ່າຍປະທານສູງສຸດ, ໄດ້ກ່າວວ່າ: “ຄວາມປ່ຽນແປງອັນຍິ່ງໃຫຍ່ແມ່ນເລີ່ມຈາກຈິດໃຈຂອງທ່ານ ເມື່ອທ່ານເຂົ້າມາໃນສາດສະໜາຈັກ. ທ່ານໄດ້ເຮັດພັນທະສັນຍາ, ແລະ ທ່ານໄດ້ຮັບຄຳສັນຍາ ທີ່ເລີ່ມຕົ້ນປ່ຽນແປງທຳມະຊາດຂອງທ່ານ. …
“… ທ່ານໄດ້ສັນຍາວ່າ ທ່ານຈະຊ່ວຍເຫລືອພຣະຜູ້ເປັນເຈົ້າ ແບ່ງເບົາພາລະຂອງ [ຄົນອື່ນ] ໃຫ້ເບົາບາງລົງ ແລະ ສະບາຍຂຶ້ນ. ທ່ານໄດ້ຮັບພະລັງທີ່ຈະຊ່ວຍແບ່ງເບົາພາລະເຫລົ່ານັ້ນ ເມື່ອທ່ານໄດ້ຮັບຂອງປະທານແຫ່ງພຣະວິນຍານບໍລິສຸດ.”2
“ເຮົາຢາກໃຊ້ຄວາມສະຫວ່າງຂອງພຣະກິດຕິຄຸນ ເພື່ອເບິ່ງຄົນອື່ນ ດັ່ງທີ່ພຣະຜູ້ຊ່ວຍໃຫ້ລອດໄດ້ກະທຳ—ດ້ວຍຄວາມເຫັນອົກເຫັນໃຈ, ຄວາມຫວັງ, ແລະ ຄວາມໃຈບຸນ,” ຈີນ ບີ ບິງກຳ, ປະທານສະມາຄົມສະຕີສົງເຄາະສາມັນ ໄດ້ກ່າວ. “ມື້ນັ້ນຈະມາເຖິງ ເມື່ອເຮົາຈະມີຄວາມເຂົ້າໃຈຢ່າງສົມບູນ ເຖິງຄວາມຄິດຂອງຄົນອື່ນ ແລະ ຈະມີຄວາມກະຕັນຍູຫລາຍ ທີ່ເຮົາຈະໄດ້ຮັບຄວາມເມດຕາ—ຄືກັນກັບເມື່ອເຮົາຄິດ ແລະ ກ່າວເຖິງຄົນອື່ນໃນທາງທີ່ມີຄວາມໃຈບຸນ. …
“ໜ້າທີ່ ແລະ ສິດທິພິເສດຂອງເຮົາ ແມ່ນທີ່ຈະຮັບເອົາການພັດທະນາຕົນ ໃນ ແຕ່ລະຄົນ ເມື່ອເຮົາພະຍາຍາມທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດ.”3
ເມື່ອເຮົາແບ່ງເບົາພາລະຂອງກັນແລະກັນ ແລະ ຮັກສາພັນທະສັນຍາຂອງເຮົາ, ແລ້ວເຮົາຈະເປີດທາງໃຫ້ພຣະເຢຊູຄຣິດ ເພື່ອປິ່ນປົວຄົນອື່ນ. ແອວເດີ ແຈັບຟະຣີ ອາ ຮໍແລນ ແຫ່ງກຸ່ມອັກຄະສາວົກສິບສອງ ໄດ້ສອນວ່າ: “ໂດຍການພິຈາລະນາເຖິງລາຄາອັນຍິ່ງໃຫຍ່ຂອງການຄຶງທີ່ໄມ້ກາງແຂນ ແລະ ການຊົດໃຊ້ທີ່ເຮົາບໍ່ສາມາດເຂົ້າໃຈໄດ້, ຂ້າພະເຈົ້າສາມາດສັນຍາກັບທ່ານວ່າ ບັດນີ້ພຣະອົງຈະບໍ່ປະຕິເສດທີ່ຈະຊ່ວຍເຮົາ. ເມື່ອພຣະອົງກ່າວຕໍ່ຜູ້ທຸກຍາກທາງວິນຍານວ່າ, ‘ຈົ່ງມາຫາເຮົາ,’ ພຣະອົງໝາຍຄວາມວ່າ ພຣະອົງຮູ້ທາງອອກ ແລະ ພຣະອົງຮູ້ທາງຂຶ້ນ. ພຣະອົງຮູ້ທາງ ເພາະພຣະອົງເຄີຍຍ່າງເທິງມັນ. ພຣະອົງຮູ້ທາງ ເພາະພຣະອົງ ຄື ເສັ້ນທາງ.”4
ຂໍ້ພຣະຄຳພີເພີ່ມເຕີມ
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Message, December 2017. Laotian. 97932 331