Poraus seni ewe Aewin Presetensi, December 2017
Kuta Kraist non Kirisimas
Seni Preseten Dieter F. Uchtdorf
Aruemonun Chon Aninnis non ewe Aewin Presetensi
Ngeni ir meinisin mi mochen weweiti ion kich chon Ewe Mwichefenin Jises Kraist ren Aramas mi Pin non Fansoun Soponon, ua mochen poputa ren ekkei unugat kapas: Sia kuta Kraist.
Sia kuta ach sipwe kaeo usun I. Sipwe tapweno mwirin I. Sipwe appiru I.
Iteiten ran non ewe ier, sia kuta I. Nge sia ennetin fori non ei fansounen ewe ier—Kirisimas, nupwen sia pwapwaiti uputiwan ach Chon Amanau mi acheingicheing—netipach mi ennetin kun ngeni I.
Eu mettoch sia tongeni fori ren ach ammonata ach sipwe pwapwaiti Kirisimas, sipwe ekieki ifa usun ekkewe aramas mi manau rungoru ier me nom ir mi ammonata ar repwe pwapwaiti feiton ewe Chon Amanau.
Ekkewe Chon Mmasa Siip
Ese chommong met sia sinei ussun ekkewe chon mmasa siip, sia chok sinei pwe ra “mammasa nour kewe pwiin siip neman non ewe pwinin.”1 Tipei pwe ekkewe chon mmasa siip mi aramas rese kon napanap, usun chok aramas mi murrino ra chok fori ar angang iteiten ran.
Ra tupuni ekkewe aramas, minne non eu fansoun, rese achocho ne kuta Kraist, nge netiper a siwin nupwen nang a suk me ra kaeo usun Kraist.
Ekkei ir ekkewe minne, mwirin ra rong mongungun chon nang, ra mwitir chok feino ngeni Bethlehem ren ar mochen kuna.2
Ekkewe Wasona
Ekkewe Wasona ir chon kaeo mi kaeo usun feiton ewe Messiah, ewe Noun Kot. Non ar kaeo, ra sinei ekkewe esinisinen An uputiw. Nupwen ra kuna ekkewe esinisin, ra feino seni imwer me ra feino ngeni Jerusalem, ra kapas eis, “Ifa i ewe monukon a uputiw pwe epwe kingen ekewe re Jews?”3
Ar mirit usun Kraist ese chok nom non ar anneani. Nupwen ra kuna ekkewe esinisinen An uputiw, ra foffor. Ra feino ar repwe kuta Kraist.
Ekewe Chon Wasona ra tupuni ekkewe ra kuta Kraist ren ar kaeo me anneani. Ar mochen kuta ennet a esenipato ar kuta Kraist me ar pin ngeni I nour Kingen king, ewe Chon Amanauen aramas meinisin.4
Simeon me Anna
Simeon me Anna ra tupuni ekkewe ra kuta Kraist ren ewe Ngun mi Fel. Ekkei aramas mi murrino mi tupwen non namanam me, ren echikipin me iotek me ar manaueni manauer ren tupwen me anneasochis, ra witiwit ar repwe kuna ranin feiton ewe Noun Kot.
Ren nimenimoch, tipetekison, me nuku, ra witiwit ren feiton ewe Chon Amanau.
Mwirin ekkis fansoun, ra angei niwinin ar nukuchar nupwen Mary me Joseph a pwa ngeniir ewe monukon epwap pwisin mwarei tipisin aramas meinisin.5
Chon nuku nein ekkewe Chon Nifai me Chon Leiman
Porausen ifa usun ekkewe chon nuku non Merika ra witi esinisinen uputiwen ewe Chon Amanau mi non mon ewe Puken Mormon.
Oua chechemeni ekkewe mi wor ar nuku non Kraist ra kuna esit me turunufas. Ekkewe sou tipachem non mettochen fonufan non ena fansoun ra era pwe ekkewe chon nuku mi chok nuku non ereni mi umwes. Ennet, ekkewe rese nuku mi fokkun pwarata ar esit iwe ra “efisi ew ennetin afitikoko” non ewe fonu (3 Nifai 1:7). Ra esita ekkewe ra nuku pwe ewe Chon Amanau epwe uputiw.
A awatteo ar song iwe ra mochen ennetin nieno ekkewe ra nuku non ewe Chon Amanau. Met a fis a maketiw non ewe Puken Mormon. 6
Ekkewe chon nuku non ei fansoun ra tupuni ekkewe ra kuta Kraist ina mo pwe aramas ra takir, esita, are urumotir. Ra kuta Kraist ina mo pwe aramas ra apasa pwe rese tipechem, rese mirt, are pwe ra nuku mettoch mi mwan.
Nge an aramas oput ese epeti ekkewe ennetin chon nuku ar repwe kuta Kraist.
Sia Kuta Kraist
Non unusen ewe ier, me napengeni non ei fansounen Kirisimas, sipwe feioch ren ach pwisin kapas eis “Ifa usun ua kuta Kriast?”
Non eu fansounen manauan mi weires, ewe King David mi nap a makei, “God, en chok ai God, ua posituk. Ua fakkun mochen kunok. Nguni a kakaituk ussun chok ew fonu mi pwas ese wor konik won.”7
Naman ei sokkun kuta Kot iei pwata aramas ra era pwe David mi emon aramas mi usun Kot.8
Non ei fansoun Kirisimas me non unusen ewe ier, amo ita ren netipach me ngunuch sipwe kuta ach Chon Amanau mi acheingicheing, ewe Kingen Kinamwe, ewe Emon mi Pin re Israel. Ei mochen a pwarata ion koch chon ewe Mwichefenin Jises Kraist ren Aramas mi Pin non Fansoun Soponon nge a pwan pwarata ion kich chon kaeo noun Kriast.
© 2017 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon awewen: 6/17. Awewen First Presidency Message, December 2017. Chuukese (Trukese). 97932 901