Poraus seni Fefin Chon Amwa, December 2017
Mochen Mwarei Fengeni An Emon me Emon Chou
Anneani ekkei puk fiti iotek me kuta om kopwe sinei met kopwe aporausa. Ifa usun ach weweiti ewe popun Relief Society epwe amwonata noun Kot fopun ren ekkewe feiochun manau esemuch?
Nuku, Famini, Aninis
“A wor chommong aramas mi pwennikich mi namwot sipwe wato rer ach aninis, ach pesepes, ach tumunur, ach kirokiroch,” Preseten Thomas S. Monson a apasa. “Kich wesewesen noun ewe Samon poun kewe won fonufan, me a wor wisach ach sipwe anisi ekkoch me ekieta Noun kewe. A nuku pwe sia tongeni anisi I.”1
Preseten Henry B. Eyring, Aewin Chon Aninis non ewe Aeiwen Presetensi, a apasa: “Ew watten ekkesiwin a poputa non netipemi nupwen oua tonong An Mwichefen. Oua fori ew pwon mi pin, o oua pwan angei ew pwon mi poputa siwinikemi ngeni pwan emon. …
“… Oua pwon pwe oupwe anisir pwe [osen ekkoch] repwe panino o repwe kinamwe. Oua angei ewe manaman ne anisi ewe Samon epaninio ekkan oser nupwen oua angei we nifangen ewe Ngun mi Fel.”2
“Sipwe mochen aea saramen ewe kapas allim ne kuna ekkoch usun ewe Chon Amanau a kuner—ren tong, apinukunuk, me ewe tong ennet,” Jean B. Bingham, Presetenin Relief Society Unus a apasa. “Ewe ran epwe feito nupwen sipwe unusan weweiti netipan ekkoch me sipwe kinisou pwe epwe wor chen mi kawor ngeni kich—usun sia awora ekkewe ekiek me kapas mi uren ewe tong ennet ngeni ekkoch. …
“Wisach mi chok ach sipwe etiwa ochunon napanapan emon me emon non ach achocho ne winiti usun ach Chon Amanau, Jises Kraist.”3
Nupwen sia mwarei fengeni an emon chou me aponueta ach pwon mi pin, sia suki ewe aan pwe Jises Kraist epwe tongeni efeiochu ekoch. Elter Jeffrey R. Holland seni ewe Mwichen Engon me Ruemon Apostel a aitikich: “Ren ai ekieki usun watte niwinin an Jises Irapengas me Achesefan, ua pwon ngenikemi I esap nikitikicheno iei. Nupwen A apasa ngeni ekkewe mi wongau non pekin ngun, ‘Feito rei,’ a wewen pwe A sinei ewe aan me A sinei ifa usun sipwe pwaracho. A sinei pokiten a fen fetan won ewe aan. A sinei ewe aan pokiten I pwisin mi ewe aan.”4
Pwan ekkoch Wokisin
© 2017 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon awewen: 6/17. Awewen Visiting Teaching Message, December 2017. Chuukese (Trukese). 97932 901