Pweng sin Prestuhnsi Se Met, Tisacmpuh 2016
Sokol Kraist ke pacl in Christmas
Sel Prestuhn Dieter F. Uchtdorf
Mwet in Kahsruh Ahkluo ke Prestuhnsi Se Met
Nuh sesr kwewa ma ke in kahlwem kac lah suc kuht uh ke kuht ekihn mempucr ke Alu luhn Jisus Kraist luhn Mwet Luhlahlfongi ke Lwen-sahflah, nga ke sramtweack sramsram luhk uh ke kalmacn kahs tolu inge: Kuht suk Kraist.
Kuht suk in lutlut Kacl. Kuht suk in fahsr Tohkohl. Kuht suk in eklac oacna El.
Lwen nuh kwewa ke lusen yac se, kuht Sokol. Tuhsruhk yohkna ke sie kain in pacl ke yac se—pa Christmas, ke pacl kuht ahkfuhlwactye isuslac luhn Mwet Lahngo sacohk lasr—yohkyohkwelihk eklac luhn insiyacsr nuh Sel.
Ipin ahkolah lasr nuh ke ahkfuhlwactyeyacn Christmas, kuht enenuh in nuhnkuh ke ohiyacn moul luhn mwet suc moul ke yac tausin luo somlah ah ke elos tuh ahkolah insiyaclos in eis tuhkuh luhn Mwet Lahngo.
Mwet Liyacacng Un Sip
Srihklac etuh lasr ke mwet liyacacng un sip, ma se na kuht etuh pa elos “muhta ke in imac, ac liyacacng un sip nahtuhlos ke fong.”1 Mwet liyacacng un sip inge elos oacpacna mwet sahyac, mwet wowo suc ma oruh moul in kasrpaclos ke pengana lwen.
Elos kuh in luhmweyuck nuh ke mwet ma, tuh sie pacl in moul lalos, sahp tiac oaru in sokol Kraist, tuhsruhk insiyaclos eklac ke inkuhsrao ikacklah ac fwackyang pweng se nuh selos kacl Kraist.
Ac pa inge elos, suc tukun elos porongo puhsren mwet us pweng wo inkuhsrao me, in pacl sacna elos som nuh Bethlehem ke elos ke liye ma suc sikyak.2
Mwet Lahlmwetmwet
Mwet Lahlmwetmwet pa mwet pihsrlac suc ma lutlut ke tuhkuh luhn Messiah, Wen nuhtin God. Ke lutlut lalos, elos akihlen akucl ma ahkkahlwemye isuslac Lal. Ke elos akihlwacnwack ma inge, elos sislah lohm selos ac fuhfahsryucsr nuh Jerusalem, siyuck ohinge, “Pia tulik fusr se ma isusla tuh in Tokosra luhn mwet Jew uh?”3
Mwe etwacack lalos kacl Kraist tiac mwe na lahlmwetmwet muhkwena. Ke na elos liye mwe akucl nuh ke isuslac Lal, elos mukwilac na in pacl sac. Elos sramtweack fuhfahsryucsr lalos in suk Kraist.
Mwet Lahlmwetmwet inge elos luhmweyuck nuh ke elos suc ma suk Kraist ke lutlut ac sukyacn lahlmwetmwet. Moniyuck lalos nuh ke ma pwacye kahkahsrihk na kohlohloslac in sokolwack Kraist ac alu nuh Sel oacna ke El ekihn Tohkohsrah luhn tohkohsrah, Mwet Lahngo luhn facluh.4
Simeon ac Anna
Simeon ac Anna elos kuh in luhmweyuck nuh ke mwet ma suk Kraist ke Nguhn. Mwet na oa inge elos arulacna pwacye ke alu lalos ac, ke lalo ac pruhe ac ke moulkihn moul in moniyuck ac ahkostwen, elos muhtwacnglah in tuhpan ke lwen in tuhkuh luhn Wen nuhtin God.
Ke suwohs, puhsisacl, ac luhlahlfongi, elos mongfihsrwacsr tuhpan tuhkuh luhn Mwet Lahngo.
Ke sahflahiyac ah, suwohs lalos ahkinsewowoyeyuck ke Mary ac Joseph kohlwacng nuh selos sie ahwowo suc ac ma sie lwen eis nuh Facl Sifacna ke ma koluk luhn facluh.5
Mwet Luhlahlfongi inmahsrlon Mwet Nephi ac Mwet Lamanite
Sie Sramsram na emtucng ke mwet luhlahlfongi ke Facl Sasuc sruhmuhn ke elos tuhpan ke akucl ke isuslac luhn Mwet Lahngo suc ma konweyuckyak ke Puk luhn Mormon.
Kom esam lah elos suc oasr luhlahlfongi la in Kraist ahkkohsyeyuck ac kalyeiyuck. Mwet suhmaht ke ma luhn facluh ke pacl sac elos ahkkolukye mwet luhlahlfongi muh elos tahfwelah in tahpuhk ma tiac pwacye. Pwacyeiyac ah, mwet suhlahlahlfongi inge arlac uklaclac puhsrwaclos ahkkohs lalos pwacnwacng sie “elyah na luhlahp” in sikyak fin acn sac (3 Nephi 1:7). Elos pihlesruh elos suc luhlahlfongi muh Mwet Lahngo El ac isuslac.
Kasrkuhsrak ac ahngyahng lalos yohkwelihk pwacnwacng elos nuhnkwaclah in onwelah elos nuh kwewa suc luhlahlfongi ke Mwet Lahngo. Puk luhn Mormon ahkkahlwemye ke ma upac se suc utiyucklac inge.6
Mwet luhlahlfongi inge elos luhmweyuck nuh selos suc moul in pacl inge suc ma suk Kraist finne mwet sahyac isrucn, ahkkasrkuhsrak kuh ahkkolukyaclos. Elos suk Kraist finne mwet sahyac elos suk in ahkkolukyaclos muh elos oacna mwet tiac etuh ma, mwet tiac elang ke kuhtwena ma, kuh mwet lahlfon.
Tuhsruhk ahkkohs luhn mwet tiac ahkmuhnahsyelah mwet luhlahlfongi suwohs inge in tui tilac suk Kraist.
Kuht Suk Kraist
Ke lusen yac se, ac sahp yohkna ke pacl in Christmas, ac ma ac wo nuh sesr in sifilpac siyuck sesr sifacna “Kuh nga suk Kraist fuhkah?”
Ke sie pacl upac in moul lal, Tohkohsrah David el sihmihs, “O God, kom God luk, Ac nga kena apkuran nu sum. Nga suk kom ke insiuk nufon: Ngunik malukin kom oana sie acn paola ac pulamlamla ke sripen wangin kof we.”7
Sahp puhla se inge in suk God pa sie srihpac oruh tuh ahkuhtweyucki David muh el sie mwet suc ma suk God ke insiyacl nohfohn.8
Ke puhlan pacl in Christmas se inge ac ke lusen yac na fohn se inge, lwelah kuht in suk Mwet Lahngo sacohk lasr ke insiyacsr ac nguhnasr, Fihsrack lun Mihslac, God Muhtahl lun Israel. Ke srihpen kena se inge, lihksreni, na tiac fahkkuhtyak muhkwena lah suc kuht uh ke kuht ekihn mempucr ke Alu luhn Jisus Kraist luhn Mwet Luhlahlfongi ke Lwen-sahflah tuhsruhk som fahkkuhtyak yohk lah suc na pwacye kuht uh ke kuht ekihn mwet tuhma lutlut luhn Kraist.
© 2017 sel Intellectual Reserve, Inc. Kuh ac suwohs nuh kwewa fihliyucki.Sihmlac fin acn USA.Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, December 2017. Kosraean. 97929 868