Messaġġ tal-Għalliema taż-Żjajjar, Diċembru 2017
Lesti li Nġorru t-Tagħbija ta’ Xulxin
Bl-għajnuna tat-talb studjaw dan il-materjal u fittxu li tiksbu l-ispirazzjoni biex tkunu tafu x’ għandkom taqsmu ma’ ħutkom. Li l-ulied nisa ta’ Alla jifhmu l-għan tas-Soċjetà tal-Għajnuna kif jista’ jħejjihom għall-barkiet tal-ħajja eterna?
Fidi, Familja, Għajnuna
“Aħna ninsabu mdawrin minn dawk li għandhom bżonn l-attenzjoni tagħna, l-inkuraġġiment tagħna, l-appoġġ tagħna, il-faraġ tagħna, it-tjubija tagħna,” qal il-President Thomas S. Monson. “Aħna jdejn il-Mulej hawn fid-dinja, b’ mandat li naqduh u nelevaw lil uliedu. Huwa jiddependi minn kull wieħed u waħda minna.”1
Il-President Henry B. Eyring, l-Ewwel Kunsillier fl-Ewwel Presidenza, qal: “Bdiet isseħħ bidla ġewwa qalbkom meta intom sirtu membri tal-Knisja. Intom għamiltu patt, u rċevejtu wegħda li bdiet tibdel l-istess natura tagħkom. …
“… Intom wegħidtu li intom se tgħinu lill-Mulej itaffi t-tagħbija ta’ ħaddieħor u jfarraġġhom. Intom ġejtu mogħtija l-qawwa li tgħinu ttaffu dik it-tagħbija meta intom irċevejtu d-don tal-Ispirtu s-Santu.”2
“Aħna rridu nużaw id-dawl tal-evanġelju biex inkunu nistgħu nħarsu lejn l-oħrajn kif iħares lejhom is-Salvatur—bil-kompassjoni, bit-tama u l-karità,” qalet Jean B. Bingham, President Ġenerali tas-Soċjetà tal-Għajnuna. “Għad jasal il-jum meta aħna jkollna għarfien sħiħ ta’ dak li hemm f’ qalb ħaddieħor u nkunu grati tal-ħniena li ntweriet magħna—hekk kif f’ din il-ħajja aħna nestendu l-ħsibijiet u l-kliem karitattevoli tagħna lejn l-oħrajn. …
“L-obbligu u l-privileġġ tagħna huwa li nħaddnu l-avvanz li naraw f’ kulħadd hekk kif nagħmlu l-almu tagħna biex insiru aktar bħas-Salvatur tagħna, Ġesù Kristu.”3
Hekk kif aħna nġorru t-tagħbija ta’ xulxin u nżommu l-patti tagħna, aħna nkunu qed inħejju t-triq għal Ġesù Kristu biex Hu jkun jista’ jfejjaq lil ħaddieħor. Il-Presbiteru Jeffrey R. Holland tal-Kworum tat-Tnax-il Appostlu għallem: “Meta nikkunsidra l-prezz inkomprensibbli tal-Kruċifissjoni u l-Att tal-Fidwa, inwegħidkom li żgur li issa Huwa mhuwiex se jabbandunana. Meta Huwa qal lill-foqra fl-ispirtu, ‘Ejjew għandi,’ Huwa ried ifisser li Huwa jaf kif għandu joħroġna ‘l barra mis-sitwazzjoni li qegħdin fiha u jaf ukoll kif għandu jelevana ‘l fuq. Huwa jaf dan għaliex Huwa diġà għadda minnu qabel. Huwa jaf it-triq għaliex Huwa hu t-triq.”4
Skrittura Addizzjonali
© 2017 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/17. Approvazzjoni tat-traduzzjoni: 6/17. Traduzzjoni ta’ Visiting Teaching Message, December 2017. Maltese. 97932 159