Feiā ’āpī

Hina’aro ’ia tātarahapa

’Ua fa’ata’a mai te peresideni Monson ē : « Tā tātou hōpoi’a ’ia fa’ati’a i te ta’ata mai te fāito faufa’a ’ore i te fāito ’aravihi mau, mai te manuia-’ore-ra’a i te rave-hope-ra’a. Tā tātou ’ohipa o te rirora’a ïa ’ei ta’ata maita’i roa a’e. Tē rave nei te mau ta’ata e rave rahi i te ’āva’e tēnuare i te mau ’ōpuara’a ’e te mau fa’aotira’a nō te ha’amaita’i atu ā : ’ata’ata atu ā, ha’apa’o maita’i te tāmā’a ’aore rā ha’api’i mai te hō’ē ’ite ’āpī. E nehenehe ïa teie mau ’ōpuara’a e taui ia ’outou ’ia maita’i roa, te rāve’a maita’i roa ra nō te taui o te tātarahapa ïa.

Noa atu e mea fifi roa te tātarahapa, e tāo’a ra. Tē ti’aturi nei tātou i ni’a ia Iesu Mesia a tātarahapa ai tātou i tā tātou mau hara, i reira tātou e pa’ari ai ’e e haere ai i mua. ’Ua parau te peresideni Monson ē « Te faufa’a rahi o te fa’anahora’a [nō te fa’aorara’a] ’o tō tātou ïa Fa’aora, ’o Iesu Mesia. ’Aita ana’e Tāna tusia tāra’ehara, ’ua mo’e ïa te tā’āto’ara’a ». Nā roto i te tātarahapa, e nehenehe tātou e tāmāhia i tā tātou mau hara ’e ’ia haere i mua nō te riro mai Iāna ra te huru.

’A feruri i te hō’ē mea o te tāpe’a ia ’oe ’ia riro mai te Fa’aora te huru. Tā ’oe ānei mau paraparau ? Nāhea ’oe i te tāu’a i tō ’oe mau hoa ’aore rā ’utu’afare ? I muri iho i te ferurira’a i te mea tā ’oe e nehenehe e ha’amaita’i, ’a pure i te Metua i te Ao ra ’e ’a fa’a’ite i tō ’oe hina’aro ’ia taui. ’A ha’amana’o ē nā roto i te mana o Tāna Tāra’ehara, e nehenehe Iesu Mesia e tauturu ia ’oe ’ia fa’a’oroma’i i tō ’oe mau paruparu. Mai tā te peresideni Monson i ha’api’i mai, « te hōro’a o te tātarahapa, tei ravehia e tō tātou Fa’aora, e tauturu ïa ia tātou ’ia tāmā i tō tātou mau haere’a ».