Parau poro’i a te Peresidenira’a Mātāmua, tēnuare 2018
Te hōro’a o te tātarahapa
Nā te peresideni Thomas S. Monson
’Ua ha’api’i mai te peresideni Thomas S. Monson ē « Tā tātou hōpoi’a o te haerera’a mai te hara’ini (médiocrité) i te ’aravihira’a, mai te manuia ’ore i te fa’aotira’a ». « Tā tātou hōpoi’a o te rirora’a i tō tātou iho maita’i-roa-ra’a. Te hō’ē o te mau hōro’ara’a rahi a te Atua nō tātou o te ’oa’oa ïa nō te tāmata noa, nō te mea ho’i e ’ere te manuia-’ore-ra’a i te hope’a ».1
Tē tū’ati pinepine nei tātou i te tupura’a o te hō’ē matahiti ’āpī i te mau fa’aotira’a ’e te mau ’ōpuara’a. E fa’aoti tātou i te ha’amaita’i, i te taui, ’ia tāmata noa. Penei a’e te rāve’a faufa’a roa nō te reira tātou e tāmata fa’ahou ai o te ’āpora’a mai ïa i te mea tā te peresieni Monson i pi’i « te hōro’a o te tātarahapa ».2
I roto i te mau parau i muri nei nō roto mai i tāna mau ha’api’ira’a mai tōna rirora’a mai ’ei peresideni nō te ’Ēkalesia, ’ua a’o mai te peresideni Monson ia tātou ’ia « tu’u mai i te toto tāra’ehara o te Mesia, ’ia fa’a’orehia tā tātou nei mau hara, ’e ’ia mā tō tātou ’ā’au ».3
Te semeio nō te fa’a’orera’a hara
« ’Ua rave rave tātou pa’ato’a i te mau ma’itira’a hape. Mai te mea ’aita ā tātou i fa’a’āfaro atu ra i taua mau ma’itiraa ra, tē ha’apāpū atu nei au ia ’outou ē tē vai ra te hō’ē rāve’a ’ia nā reira. ’Ua parauhia taua fa’anahora’a ra te tātarahapa. Tē tāparu nei au ’ia ’outou ’ia fa’atiti’aifaro i tā ’outou mau hape. ’Ua pohe tō tātou Fa’aora nō te hōro’a ia ’outou ’e iā’u nei i taua ha’amaita’ira’a ra. Noa atu ē, e mea fifi te haere’a, e parau mau rā te fafaura’a : « ’Ia uteute roa tā ’outou mau hara ra, e riro ïa mai te hiona ».[Isaia 1:18]. ’E e ’ore ho’i au, o te Fatu e ha’amana’o fa’ahou ā i te reira’ [PH&PF 58:42]. ’Eiaha e fa’a’ati i tō ’outou ora mure ’ore. Mai te mea ’ua hara ’outou, ’ia oi’oi ’outou i te ha’amata i te ho’i mai, e oi’oi ato’a ïa ’outou i te ’ite i te hau marū ’e te ’oa’oa o te ’āpiti mai i te semeio nō te fa’a’orera’a hara ».4
Ho’i mai i ni’a i te ’ē’a
« Noa atu e mea faufa’a rahi roa e ’ia mā’iti tātou ma te pa’ari, tē vai ra te taime e rave tātou i te mau mā’itira’a ma’ama’a. E fa’ati’a te hōro’a o te tātarahapara’a, ia tātou, tā tō tātou Fa’aora i hōro’a mai, ’ia fa’atiti’aifaro i tō tātou orara’a, ’ia nehenehe ia tātou ’ia ho’i i ni’a i te ’ē’a o te arata’i atu ia tātou i taua hanahana tiretiera ra tā tātou e ’imi nei.5
Te ’ē’a ho’ira’a
« Mai te mea ē, ’ua hi’a te hō’ē o ’outou i roto i tōna tere, te ha’apāpū atu nei au ia ’outou ē, tē vai ra te rāve’a nō te ho’i mai. ’Ua parauhia te fa’anahora’a o te tātarahapa. Noa atu e mea fifi te ’ē’a, nā te reira e fa’aoti i tō ’outou fa’aorara’a mure ’ore. E aha te mea e faufa’a-rahi-hia ai tā ’outou mau tauto’ora’a ? Tē tāparu nei au ia ’outou ’ia fa’aoti i’ō nei ’e i teie nei ’ia rave i te mau ta’ahira’a e tītauhia nō te tātarahapa hope roa. ’Oi’oi ’outou i te rave i te reira, ’oi’oi ato’a ’outou ’ia ora ma te hau ’e te au maita’i ’e te pāpū mai tei parauhia e Isaia [hi’o Isaia 1:18]. »6
E nehenehe te mau ta’ata e taui.
« E ti’a ia tātou ’ia ha’amana’o noa ē, e nehenehe i te ta’ata e taui. E nehenehe tā rātou e fa’aru’e i te peu hape. E nehenehe tā rātou e tātarahapa i tā rātou mau hape. E nehenehe tā rātou e mau i te autahu’ara’a ma te parau-ti’a. ’E e nehenehe tā rātou e tāvini māite i te Fatu ».7
’Ia riro e mea mā fa’ahou
« Mai te mea tē vai nei te tahi mea ti’a ’ore i roto i tō ’outou orara’a, tē vai ra te hō’ē rāve’a nō te tātara i te reira. ’A fa’aea i te rave i te ’ohipa parau-ti’a ’ore. ’A ’āparau i tō ’outou ’episekōpo. Noa atu e aha te fifi, e nehenehe te reira e mātara nā roto i te tātarahapara’a tano. E nehenehe e riro mai e mea mā fa’ahou ».8
Te ti’ara’a faufa’a rahi o te Fa’aora
« Te faufa’a rahi o te fa’anahora’a (o te fa’aorara’a) o tō tātou ïa Fa’aora, o Iesu Mesia. ’Aita ana’e tāna tusia tāra’ehara, ’ua mo’e te mau ta’ata ato’a. ’Aita i nava’i noa i te ti’aturi-noa-ra’a iāna ’e i tāna misiōni. Tītauhia tātou ’ia ’ohipa ’e ’ia ha’api’i ho’i, ’ia ’imi ’e ’ia pure, ’ia tātarahapa ’e ’ia ha’amaita’i. Tītauhia tātou ’ia ’ite i te mau ture a te Atua ’e ’ia ora i te reira. Tītauhia tātou ’ia fāri’i i tāna mau ’ōro’a fa’aorara’a. Mea nā reira noa e noa’a ai ia tātou te ’oa’oa mau ’e te mure ’ore.9
© 2017 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō First Presidency Message, January 2018. Tahitian. 15045 895