iTukutuku ni Mataveiliutaki Taumada, Janueri 2018
Na iSolisoli ni Veivutuni
Mai vei Peresitedi Thomas S. Monson
A vakavulica o Peresitedi Thomas S. Monson “E noda itavi me da tubu sivia na dauvamumuri tu ga kina kila na ka, mai na druka ki na rawaka”. “Na noda itavi me da yaco me da tamata vinakacake sara. E dua na isolisoli cecere ni Kalou vei keda sa ikoya na reki ni dau tovolea tale, ni sa sega ni cavacava ni ka na druka.”1
Ena vuqa na gauna eda okata na kena yaco mai e dua na yabaki vou kei na kena inaki vata kei na lalawa. Ia eda saga meda walia ena kena vaka vinakataki, me veisautaki, ka tovolei tale. Au kila na sala bibi eda rawa ni saga meda tovoleya tale ena noda ciqoma na ka a kaya o Peresitedi Monson “na solisoli ni veivutuni.”2
Ena vei itukutuku kece mai na nona ivakavuvuli mai gauna kacivi kina me Peresitedi ni Lotu, o Peresitedi Monson e vakasalataki keda meda “Mo ni lomani keimami mai ka laiva me bokoci na neimami i valavala ca ka vakasavasavataka na yalo i keimami ena dra ni soro i Karisito.”3
Na Cakamana ni Veivosoti
“Eda dau digidigi cala kece. Kevaka eda se bera ni vakadodonutaka na digidigi eso oqori, au vakadeitaka vei kemuni ni sa tiko e dua na sala me vakayacori kina. Na iwalewale oqo e vakatokai na veivutuni. Au sa vakamasuti kemuni mo ni vakadodonutaka na nomuni cala. A mate na noda iVakabula me vakarautaka vei kemuni kei au na isolisoli veivakalougatataki o ya. E dina ga ni sega ni rawarawa na sala, na yalayala e ka dina: ‘Ke sa vaka na ka kulakula na nomudou ivalavala ca, sa na vulavula me vaka na uca vulavula’ [Isaiah 1:18]. ‘Ia koi Au, na Turaga, au na sega ni nanuma tale na nona ivalavala ca’ [D&C 58:42]. Kakua ni vakasabusabutaka na nomu bula tawamudu. Kevaka o sa caka cala, na totolo ga ni nomu lesu mai, na totolo ni nomu kunea na vakacegu kamikamica kei na reki e lako vata mai kei na mana ni veivosoti.”4
Gole lesu ki na Sala
“Dina ga ni bibi sara meda digidigi vakavuku, ia eso na gauna eda na cakava na digidigi vakalialia. Na isolisoli ni veivutuni, sa vakarautaka tu na iVakabula, ena rawa meda vakadodonutaka kina noda kosi, me da lesu ki na salatu ena kauti keda ki na lagilagi vakasilesitieli eda vakasaqara tiko.”5
Na Sala Lesu
“Kevaka me so vei kemuni sa bale ena nona ilakolako, au vakadeitaka vei kemuni ni tiko na sala lesu. Na iwalewale oqo e vakatokai na veivutuni. E dina ga ni sala dredre, na nomu bula tawamudu ena vakatau kina. Na cava tale e kilikili mai na nomu sasaga? Au kerei kemuni mo ni sa tekivu sara ga oqo, ka tekivu taura na ikalawa kina veivutuni. Na kena totolo ga ni caka, na kena totolo ni nomu na sotava na vakacegu kei na vakanomodi ka tukuna tiko o Aisea [raica na Aisea 1:18].”6
Na Tamata e Rawa ni Veisau
“E dodonu meda nanuma tiko ni rawa ni veisau na tamata. E rawa ni ra vakanadakuya na itovo ca. E rawa ni ra veivutuni mai na ivalavala ca. E rawa ni ra matabete bula kilikili. Ka rawa ni ra qarava vagumatua na Turaga.”7
Meda Savasava Tale
“E dodonu beka me yali tiko e dua na ka ena nomu bula, e tadola tu vei kemuni e dua na sala. Muduka na caka cala. Vosa vei nomu bisopi. Se cava ga na leqa, e rawa ni wali ena veivutuni dodonu. Ena rawa mo ni savasava tale.”8
Na iTavi Bibi ni iVakabula
“Sa tiki bibi sara ni ituvatuva [ni veivakabulai] na noda iVakabula, o Jisu Karisito. Kevaka e sega na Nona isoro ni solibula, ena maumau na ka kecega. E sega ni se tei rauta meda, na vakabauti Koya walega kei na Nona ilesilesi. Eda gadreva meda cakacaka ka vuli, vakasaqaqara ka masu, veivutuni ka vinaka cake. Eda gadreva meda kila na lawa ni Kalou ka bulataka. E dodonu meda ciqoma na Nona cakacaka vakalotu ni veivakabulai. Ni da sa cakava ga vakakina eda na qai rawata na bulamarau dina.”9
© 2018 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi 6/17. Vakadonui me vakadewa: 6/17. Vakadewa ni First Presidency Message, January 2018. Fijian. 15045 858