Agtutubo

Tallo a Banag a Laglagipen

Ti balikas a laglagipen ket mamin-adu a makita iti Libro ni Mormon. Inallukoy ni Nephi dagiti kakabsatna a lallaki a manglagip no kasano nga insalakan ti Dios dagiti kapuonanna. Indawat ni Ari Benjamin kadagiti taona a manglagip iti kinaindaklan ti Dios. Ken binilin ni Moroni dagiti agbasbasa kenkuana tapno manglagip no kasano ti kadakkel ti asi ti Apo.

Kasapulan unay ti pananglaglagip iti Apo—makitulagtayo pay a manglaglagip Kenkuana iti tunggal makiranudtayo iti sakramento. Awisennatayo ni Presidente Eyring a manglaglagip kadagitoy tallo a banag kabayatan ti sakramento:

1. Laglagipenyo ni Jesucristo: Basaenyo dagiti nasantuan a kasuratan maipapan ti no kasano a nagserbi ken nangipakita iti ayat kadagiti dadduma. Kasano ti pannakariknayo iti ayatna? Kasano a makapagserbi ken makaipakitakayo iti ayat kadagiti dadduma kas iti inaramid ti Mangisalakan?

2. Laglagipenyo no ania ti nasken nga aramidenyo a nasaysayaat: Utobenyo maipapan ti napalabas a lawasyo nga addaan iti agbabbabawi a puso. Pumilikayo iti maysa a banag a mabalbaliwanyo, ket isuratyo no kasano a maaramidyonto dayta a panagdur-as. Ikabilyo ti panggepyo a tun-oyen (goal) iti lugar a masansan a makitayonto.

3. Laglagipenyo ti panagdur-as nga ar-aramidenyo: Idawatyo iti Dios a tulongannakayo a mangkita iti nasayaat a panagdur-as nga ar-aramidenyo. Isuratyo no ania ti riknayo.

Saantayo a perpekto, ngem ammo ti Mangisalakan dayta. Dayta ti gapu no apay nga indawatna kadatayo a manglaglagip Kenkuana. Ti pananglagip Kenkuana ket mangted kadatayo iti namnama ken tulongannatayo nga agtarigagay a dumur-as. Uray no dadduma no agliwaytayo a manglagip Kenkuana, kuna ni Presidente Eyring, “Kanayon a laglagipennakayo.”