Mensahe iti Visiting Teaching, Pebrero 2018
Mangam-ammo Kenkuana ken ti Pamiliana
Ti visiting teaching ket maipapan iti sipupudno a panangam-ammo ken panangayat iti tunggal kabsat a babai tapno matulongantayo a mapatibker ti pammatina ken makapagserbi.
Pammati, Pamilia,Tulong
Nagbalin a nasinged nga aggayyem da Rita Jeppeson ken ti visiting teacherna kabayatan ti isasarungkarda ken panangibinglayda kadagiti prinsipio ti ebanghelio. Ngem mairaman pay iti isasarungkarda ti panagay-ayamda a dua kadagiti sinniriban a balikas. Ti magusgustuan unay a banag ni Rita maipapan iti visiting teacherna ket gapu ta ammona nga aggayyemda ken saan laeng a tapno “maibaga a naaramidnan” ti isasarungkar. Adu dagiti banag a maaramid dagiti kakabsat a babbai kabayatan ti isasarungkar, kas iti pannagna nga agkadua wenno panagparut kadagiti ruot iti minuyongan no agay-ayam dagiti ubbing.
Kinuna ni Elder Jeffrey R. Holland ti Korum dagiti Sangapulo-ket-dua nga Apostol, “Makitayo ti bagiyo kas emisario ti Apo kadagiti annakna … Namnamaenmi … nga ugalienyonto ti napudno, naitunos iti ebanghelio a pannakaseknan kadagiti miembro, mangkitkita ken mangay-aywan iti tunggal maysa, mangipaay iti espiritual ken temporal a kasapulanda iti ania man a wagas a makatulong.”1
Ti Apo babaen ken ni Moises binilinna dagiti annak ti Israel a ”ti ganggannaet a makipagtaeng kenka maibilangto kadakayo a kas kailianyo, ket ayatemto [isuna] a kas iti bagim“ (Levitico 19:34). Mabalin a “ganggannaet” dagiti kakabsat a babbai a sarungkaran ken suruantayo bayat ti panangirugitayo iti serbisiotayo, ngem bayat ti panangam-ammotayo kenkuana ken ti pamiliana, dumakkel ti tarigagaytayo a “makipagbaklay iti imet ti tunggal maysa, tapno lumag-anda” ken “pagrereppengen[tayo] ti puspusotayo iti panagkaykaysa ken ayat iti tunggal maysa” (Mosiah 18:8, 21).
Malagip ni Reyna I. Aburto, Maikadua a Mammagbaga iti Relief Society General Presidency, idi kadibdiborsiona a baro a miembro ti Simbaan. “Immay dagiti visiting teacherko iti pagtaengak”, kinunana. “ket impariknada kaniak ti nabara a rikna ti kinakameng ken ayat iti pusok.”2
Ibilang Daytoy
Iti uneg ti pamilia dagiti kakabsat a babbai a sarungkaran ken suruanyo, ania dagiti dumteng a pasamak a nasken a maammuan ken malagipyo?
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Visiting Teaching Principles, February 2018. Ilokano. 15046 864