Mensahe ti Umuna a Panguluen, Pebrero 2018
Kanayon a Laglagipen Isuna
Ni Presidente Henry B. Eyring
Umuna a Mammagbaga iti Umuna a Panguluen
Mailadawanyo kadi kaniak ni propeta Moroni a mangikitkitikit kadagiti maudi a balikas ti Libro ni Mormon kadagiti balitok a pinanid? Agmaymaysa isuna. Nakitana a natnag ti pagilianna, tattaona, ken ti pamiliana. Ti daga ket “agtultuloy” iti gubat (Mormon 8:8). Ngem addaan isuna iti namnama, gapu ta nakitana ti aldawtayo! Ken ti amin a banag a mabalin nga insuratna koma, inawisnatayo a manglaglagip (kitaen iti Moroni 10:3).
Kaay-ayo nga isuro ni President Spencer W. Kimball (1895–1985) a ti kapatgan a balikas iti diksionario ket mabalin a laglagipen. Gapu ta nagaramidtayo kadagiti katulagan iti Dios, kinunana, “ti kangrunaan a kasapulantayo ket laglagipen” ida.1
Masarakanyo ti balikas a lagipen iti amin a nasantuan a kasuratan. Idi balakadan ni Nephi dagiti kakabsatna a lallaki, masansan nga awisenna ida a manglagip kadagiti balikas ti Apo ken manglagip no kasano nga insalakan ti Dios dagiti kapuonanda (kitaen iti 1 Nephi 15:11, 25; 17:40).
Iti naindaklan a pagpakada a bitlana, inusar ni Ari Benjamin ti balikas a laglagipen iti maminpito a gundaway. Ninamnamana a laglagipen koma dagiti taona “ti kinaindaklan ti Dios … ken ti kinaimbagna ken ti naunday a panagsagabana”para kadakuada (Mosiah 4:11; kitaen met iti 2:41; 4:28, 30; 5:11–12).
Idi inrugi ti Mangisalakan ti sakramento, inawisna dagiti disipulona a makiranud kadagiti emblem “kas panglaglagip” iti sakripisiona (Lucas 22:19). Iti tunggal kararag iti sakramento mangngegak ken mangngeganyo, ti balikas a kanayon a sumaruno iti balikas a laglagipen (kitaen iti DkK 20:77, 79).
Ti mensahek ket maysa nga awis, pakaasi, a manglaglagip. Dagitoy ti tallo a singasing maipapan no ania ti malagipyo iti tunggal lawas no makiranudkayo kadagiti sagrado nga emblem ti sakramento. Sapay koma ta makatulong kadakayo, kas iti pannakatulong dagitoy kaniak.
Laglagipenyo ni Jesucristo
Umuna, laglagipenyo ti Mangisalakan. Laglagipenyo no asino Isuna bayat ti kaaddana iti daga, no kasano a nakisao kadagiti dadduma, ken no kasano nga impakitana ti kinaimbagna kadagiti aramidna. Laglagipenyo no asino ti nagbubosanna iti panawen ken no ania ti insurona. Ti Mangisalakan ket ”namagpagna a nagar-aramid iti kinaimbag” (Dagiti Aramid 10:38). Inagasanna dagiti masaksakit. Naikumit isuna iti panangaramid iti pagayatan ti Amana.
Kangrunaan ti amin, malagiptayo ti dakkel a pateg a binayadanna, gapu iti ayatna kadatayo, tapno maikkat ti mulit dagiti basbasoltayo. Bayat ti pananglaglagiptayo Kenkuana, dumakkel ti tarigagaytayo a sumurot Kenkuana. Kayattayo ti agbalin a nasaysayaat pay, ad-adda a managpakawan pay, ken nataltallugod a mangikarigatan a manggun-od iti pagayatan ti Dios ken aramidentayo daytoy.
Laglagipen No Ania ti Kasapulanyo tapno Agaramid iti Nasaysayaat
Narigat a panunoten ti maipapan iti Mangisalakan—ti kinatarnaw ken kinaperpektona—a saan a panunoten no kasano ti kinakurang ken kinaimperpektotayo no idasigtayo. Nagaramidtayo kadagiti katulagan nga agtungpal kadagiti bilinna, ngem masansan a maliwayantayo daytoy nangato a pagrukodan. Ngem ammo ti Mangisalakan a mapasamak daytoy, a gapu no apay intedna kadatayo ti ordinansa ti sakramento.
Adda dagiti nagtaudan ti sakramento iti kannawidan iti Daan a Tulag maipapan iti panagidaton kadagiti sakripisio, a nairaman ti panagikumpisar iti basol (kitaen iti Levitico 5:5). Saantayon nga agidaton kadagiti ayup, ngem mabalintayo pay laeng nga isuko wenno isardeng dagiti basbasoltayo. Awagan dagiti nasantuan a kasuratan daytoy a sakripisio iti “nasneban a puso ken sibababawi nga espiritu” (3 Nephi 9:20). Umaykayo iti sakramento nga addaan iti agbabbabawi a puso (kitaen iti DkK 59:12; Moroni 6:2). Ket no aramidenyo daytoy, gun-odenyonto ti panakapakawan dagiti basbasolyo ken saankayo a mayaw-awan manipud iti dalan nga agturong nga agsubli iti Dios.
Laglagipenyo ti Panagdur-as nga Ar-aramidenyo
Bayat ti panangamirisyo iti biagyo kabayatan ti ordinansa ti sakramento, namnamaek nga ipamaysayo dagiti panunotyo saan laeng a kadagiti banag a naaramidyo a biddut no di ketdi pay kadagiti banag a naaramidyo nga umno—dagiti kanito a nariknayo a maragsakan kadakayo ti Nailangitan nga Ama ken ti Mangisalakan. Mabalinyo pay ti mangala iti kanito bayat ti sakramento tapno idawat ti Dios a tulongannakayo a mangkita kadagitoy a banag. No aramidenyo, ikarik kadakayo a mariknayonto ti maysa a banag. Mariknayonto ti namnama.
No naaramidkon daytoy, impanamnama kaniak ti Espiritu nga idinto ta adayoak pay iti panagbalin a perpekto, nasaysayaatak ita ngem idi kalman. Ken daytoy ti nangted kaniak iti panagtalek a, gapu iti Mangisalakan, mabalinko ti agbalin a nasaysayaat into inton bigat.
Kanayon ket napaut a panawen, ken kaipapananna ti adu a naipamaysa nga aramid a panagkagumaan. Ammoyo napadasak no kasano ti karigat ti sipapasnek nga agpanunot iti maysa a banag a kanayon. Ngem kasano man ti panagtungpalyo a nasayaat iti kariyo a kanayon a laglagipen Isuna, laglagipennakayo a kanayon.
Ammo ti Mangisalakan dagiti pannubokyo. Ammona no ania ti rikna ti kaadda dagiti pakaseknan ti biag a naibaklay kadakayo. Ammona no kasano a kasapulanyo unay ti bendision a sumangbay gapu iti kanayon a pananglaglagip Kenkuana—“tapno kanayon nga adda ti Espirituna [kadakayo]” (DkK 20:77; nainayon ti panangyunay-unay).
Iti kasta, pasangbayennnakayo nga agsubli iti lamisaan ti sakramento iti tunggal lawas, nga idiayana manen ti gundaway a nga agsaksi iti sanguananna a kanayonto a laglagipenyo Isuna.
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, February 2018. Ilokano. 15046 864