Lamharon

Tatlo ka mga Butang nga Panumdumon

Ang tinaga nga dumduma makita sa madamo nga beses sa Libro ni Mormon. Si Nefi nagpaisog sang iya kauturan nga dumdumon kon paano ginluwas sang Dios ang ila mga katigulangan. Si Haring Benjamin nagpangabay sa iya katawhan nga dumdumon ang pagkawala’y tupong sang Dios. Si Moroni nagpanulin sa iya mga bumalasa nga dumdumon kon daw ano ka maluluy-on sang Ginuo.

Ang pagdumdum sang Manluluwas importante—nagapangako pa gani kita nga dumdumon Sia tagsa nga mag-ambit kita sang sakramento. Si Pangulong Eyring nagaagda sa aton nga dumdumon ining tatlo ka mga butang sa tion sang sakramento:

1. Panumduma si Jesucristo: Basaha ang balaan nga mga kasulatan kon paano ang Manluluwas nag-alagad kag nagpakita sang pagpalangga sa iban. Paano ninyo mabatyagan ang Iya pagpalangga? Paano bala kamo mag-alagad kag magpakita sang pagpalangga sa iban pareho sang ginhimo sang Manluluwas?

2. Panumduma kon ano ang kinahanglan ninyo nga himuon sing mas maayo pa gid: Binagbinaga ang nagligad ninyo nga semana nga may mahinulsulon nga tagipusuon. Magpili sang isa ka butang nga sarang ninyo bag-uhon, kag isulat kon paano ninyo himuon ang ina nga pagbag-o. Ibutang ang inyo lalab-uton sa lugar nga inyo pirme makita.

3. Panumduma ang pag-uswag nga inyo na nahimo: Pangabaya ang Dios nga buligan kamo nga makita ang maayo nga pag-uswag nga inyo na nalab-ot. Isulat ang inyo nabatyagan.

Indi kita perpekto, pero nahibal-an ina sang Manluluwas. Amo ina kon ngaa ginapangabay Niya kita nga panumdumon Sia. Ang magdumdum sa Iya nagahatag sa aton sang paglaum kag nagabulig sa aton nga magtinguha sa pag-uswag. Bisan pa sa tinion nga nagakalipat kita sa pagdumdum sa Iya, si Pangulong Eyring nagasiling, “Iya kamo ginadumdum pirme.”