Mensahe sang Unang Panguluhan, Pebrero 2018

Dalayon nga Magdumdum sa Iya

Ni Pangulong Henry B. Eyring

Unang Manuglaygay sa Unang Panguluhan

Mahunahuna bala ninyo upod sa akon ang propeta nga si Moroni nga nagakurit sang katapusan nga mga tinaga sa Libro ni Mormon sa bulawan nga mga lamina? Nagaisahanon sia. Nakita na niya ang iya pungsod, ang iya katawhan, kag ang iya pamilya nga napukan. Ang kadutaan isa ka “dalayon nga talan-awon” sang inaway (Mormon 8:8). Pero nagalaum sia sa gihapon, tungod nakita niya ang aton panahon! Kag sa tanan nga pwede niya kuntani nga isulat, gin-agda niya kita nga magdumdum (tan-awa sa Moroni 10:3).

Si Pangulong Spencer W. Kimball (1895–1985) mahilig magtudlo nga ang pinakaimportante nga tinaga sa diskyunaryo amo ang magdumdum. Tungod naghimo kita sang mga kasugtanan sa Dios, siling niya, “ang aton pinakadako nga kinahanglanon amo ang dumdumon” ang mga ini.¹

Makita ninyo ang tinaga nga dumdumon sa bug-os nga balaan nga kasulatan. Sang ginalaygayan ni Nefi ang iya mga utod nga lalaki, masami niya sila nga ginaagda nga dumdumon ang mga pulong sang Ginuo kag panumdumon kon paano ginluwas sang Dios ang ila mga katigulangan (tan-awa sa 1 Nefi 15:11, 25; 17:40).

Sa iya dako nga pagpamilin-bilin, si Haring Benjamin naggamit sang tinaga nga dumduma sing pito ka beses. Nagalaum sia nga dumdumon sang iya katawhan “ang pagkawala’y tupong sang Dios … kag ang iya kaayo kag pagkamainantuson” tuhoy sa ila (Mosias 4:11; tan-awa man sa 2:41; 4:28, 30; 5:11–12).

Sang naghikot ang Manluluwas sang sakramento, gin-agda Niya ang Iya mga disipulo nga mag-ambit sang mga simbolo “bilang handumanan” sang Iya pagsakripisyo (Lucas 22:19). Sa tagsa ka pangsakramento nga pangamuyo kamo kag ako makabati, sang tinaga nga dalayon nga nagauna sa tinaga nga magdumdum (tan-awa sa D&C 20:77, 79).

Ang akon mensahe isa ka pangagda, bisan pa gani isa ka pag-alungay, sa pagdumdum. Yari ang tatlo ka mga panugyan kon ano ang sarang ninyo panumdumon tagsa ka semana samtang nagaambit kamo sang balaan nga mga simbolo sang sakramento. Kabay nga makabulig ang mga ini sa inyo, pareho sang pagbulig sang mga ini sa akon.

Dumduma si Jesucristo

Una, dumduma ang Manluluwas. Dumduma kon sin-o Sia sang yara pa Sia sa duta, kon paano Sia nagapakighambal sa iban, kag kon paano Sia nagapakita sang kaayo sa Iya mga binuhatan. Dumduma kon kay sin-o Sia nagapakig-upod kag kon ano ang Iya ginatudlo. Ang Manluluwas “naglibot nga nagahimo sang kaayuhan” (Mga Binuhatan 10:38). Ginduaw Niya ang nagamasakit. Nagpangako Sia sa paghimo sang pagbuot sang Iya Amay.

Labaw sa tanan, sarang naton dumdumon ang dako nga bili nga Iya ginbayran, tungod sang Iya gugma para sa aton, agud kakason ang mantsa sang aton mga sala. Samtang ginadumdum naton Sia, ang aton handum nga sundon Sia magadako. Luyag naton nga mangin mas malulo, mas mapinatawaron, kag mas handa nga hibaluon ang pagbuot sang Dios kag himuon ini.

Dumduma Kon Ano ang Kinahanglan Ninyo Himuon sing Mas Maayo

Mabudlay ang manumdom sa Manluluwas—sang Iya kaputli kag pagkaperpekto—nga wala nagapanumdom kon daw ano kahigko kag ka indi- perpekto sa aton kon ikumparar sa Iya. Naghimo kita sang mga kasugtanan nga tumanon ang Iya mga kasuguan, pero masami kita nagakabos sa sining mataas nga sulukdan. Pero nahibal-an sang Manluluwas nga matabo ini, amo nga ginhatag Niya sa aton ang ordinansa sang sakramento.

Ang sakramento naghalin sa Daan nga Katipan nga kaugalian sang paghalad, nga nagalakip sang pag-ako sang sala (tan-awa sa Leviticus 5:5). Wala na kita nagahalad sang kasapatan, pero sarang naton sa gihapon itugyan ang aton mga sala. Ang balaan nga mga kasulatan nagatawag sini bilang ang halad sang “isa ka buong nga tagipusuon kag isa ka mahinulsulon nga espiritu” (3 Nefi 9:20) Magkari sa sakramento nga may mahinulsulon nga tagipusuon (tan-awa sa D&C 59:12; Moroni 6:2). Sa inyo paghimo sini, mabaton ninyo ang kapatawaran sang mga sala kag indi kamo magtalang sa banas pabalik sa Dios.

Dumduma ang Inyo Pag-uswag

Sa inyo pagbinagbinag sang inyo kabuhi sa tion sang ordinansa sang sakramento, kabay nga ang inyo mga hunahuna nagasentro indi lamang sa mga sala nga inyo nahimo kundi subong man sa husto ninyo nga nahimo—ang mga tinion sang nabatyagan ninyo nga ang Amay nga Langitnon kag ang Manluluwas nahamuot sa inyo. Mahimo nga hatagan gid ninyo sing tiyempo sa tion sang sakramento ang magpangayo sa Dios nga buligan kamo nga makita ining mga butang. Kon himuon ninyo ini, may mabatyagan kamo nga isa ka butang. Makabatyag kamo sing paglaum.

Sang ginhimo ko ini, ang Espiritu nagpasalig sa akon nga bisan malayo pa ako sa pagkaperpekto, mas maayo ako subong sangsa kahapon. Kag nagahatag ini sa akon sang kompiyansa, nga bangod sa Manluluwas, sarang ako nga mangin mas maayo pa gid bwas.

Ang pirme malawig nga tion, kag nagakahulugan ini sang nakatutok nga pagtinguha. Nahibal-an ninyo paagi sa eksperiyensya kon daw ano kabudlay nga dumdumon sing hungod ang isa ka butang sa tanan nga tion. Pero bisan ano pa ang inyo katutom sa pagdumdum sa Iya sing dalayon, dalayon kamo Niya nga ginadumdum.

Nahibal-an sang Manluluwas ang inyo mga kabudlayan. Nahibal-an Niya ang balatyagon sang ginabudlayan sa mga kabalaka sang kabuhi. Nahibal-an Niya kon daw ano kagilayon ninyo nga kinahanglan ang bugay nga nagagikan sa dalayon nga pagdumdum sa Iya kag pagtuman sa Iya—“agud [inyo] nga dalayon nga maangkon ang iya Espiritu sa pag-upod sa [inyo]” (D&C 20:77; pagdagmit gindugang).

Gani, ginaabi-abi Niya kamo pabalik sa lamesa sang sakramento tagsa ka semana, nga sa liwat nagatanyag sa inyo sang kahigayunan nga magsaksi sa Iya atubang nga inyo Sia dalayon nga dumdumon.

© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17. Petsa sang pagtugot sa paglubad: 6/17. Paglubad sang First Presidency Message, February 2018. Hiligaynon. 15046 861