Tej Ntsiab Cai txog Kev Mus Saib Xyuas Tom Tsev, Ob Hlis Ntuj 2018
Kawm txog Nws thiab Nws Tsev Neeg
Kev mus saib xyuas tom tsev yog kev paub thiab kev hlub txhua tus viv ncaus xwv kom peb thiaj li muaj peev xwm txhawb nqa lawv txoj kev ntseeg.
Kev Ntseeg, Tsev Neeg, Kev Pab
Rita Jeppeson thiab tus uas los saib xyuas nws tom tsev yeej ua phooj ywg zoo lawm thaum nkawd sib tham thiab hais txog tej ntsiab cai ntawm txoj moo zoo. Tiam sis nkawd ob leeg kuj ua si muab tsiaj ntawv tso ua ke thiab. Yog qhov uas Rita nyiam tshaj txhua yam txog Rita tus mus saib xyuas tom tsev vim Rita paub tias nkawd ua phooj ywg thiab tsis yog nws tuaj xyuas Rita kom “ua tiav” xwb. Muaj ntau yam uas cov viv ncaus ua taus thaum lawv mus saib xyuas tom tsev, xws li taug kev ua ke los yog rho nyom hauv lub vaj thaum cov me nyuam ua si.
Txwj Laug Jeffrey R. Holland los ntawm Pawg Kaum Ob tug Thwj Tim hais tias, “Saib qhov uas nej yog cov neeg uas tus Tswv xa mus qhia Nws cov me nyuam ua ib yam tseem ceeb. … Peb … cia siab hais tias nej yuav txhawj xeeb txog tej mej zeej, thiab ua tib zoo saib xyuas lawv, txawj xav txog lawv, kho tej teeb meem uas lawv muaj raws li nej kho tau, txawm yog ntawm sab ntsuj plig los yog lwm yam.”1
Tus Tswv txib tsev neeg Ixayees dhau los ntawm Mauxes hais tias “ua zoo rau lawv ib yam li nej ua zoo rau nej cov [neeg], thiab hlub lawv ib yam li nej hlub nej lub cev” (Levis Kev Cai 19:34). Cov viv ncaus uas peb mus saib xyuas tom tsev tej zaum yog “lwm haiv neeg” thaum peb pib ua hauj lwm pab lawv, tiam sis thaum peb tab tom paub nws thiab nws tsev neeg, peb haj yam yuav xav “ib leeg txaus siab ris ib leeg tej nra, xwv kom tej nra thiaj li sib” thiab “muab [peb] lub siab sib khi ua ke los ntawm kev koom siab koom ntsws thiab los ntawm kev ib leeg hlub ib leeg” (Mauxiyas 18:8, 21).
Reyna I. Aburto, tus Pab Cuam thib Ob hauv Koom Haum Niam Tsev Tuam Pawg Thawj Tswj Hwm, nco qab hais tias thaum nws yog ib tug poj nrauj tshiab nyob hauv lub Koom Txoos. Nws hais tias, “Ob tug saib xyuas tom tsev tau los rau kuv lub tsev, thiab nkawd ua rau kuv lub siab sov so thiab ua rau kuv muaj lub siab hlub.”2
Xav Txog Qhov No
Hais txog cov viv ncaus uas koj mus saib xyuas tom tsev, muaj tej yam twg hauv lawv lub neej uas koj yuav tsum paub txog thiab nco txog?
© 2018 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus As Kiv: 6/17. Pub txhais ua lus Hmoob: 6/17. Kev txhais Visiting Teaching Principles, February 2018. Hmong. 15046 295