Ko ha Tukufakaholo ʻo e ʻOfá mo e Tokoní
Naʻe ʻeʻepa ʻa Palesiteni Thomas S. Monson ʻi he Senitā Konifelenisí ʻi he ʻaho 11 ʻo Sanuali 2018, ke meʻa ki ai e kakaí. Naʻe fakahoko leva ʻa e ouau meʻafakaʻeikí he ʻaho hono hokó ʻi he Senitā Konifelenisí. Naʻe hoko atu ai ki faʻitoka, ki he fāmili ofí pē, ʻi he hoʻatā tatau pē ʻi he Faʻitoka Sōleki Sití.
Ko ha tāpuaki ke u ʻi heni he ʻahó ni ke fai ha lea ko e manatu melie ki heʻeku Tamaí, ko Palesiteni Thomas Spencer Monson, ko e Palesiteni hono 16 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku fonu e Senitā Konifelenisi ko ʻení he ʻahó ni ʻi hoʻomou ʻofá mo e ngaahi lotú. ʻOku ou fakamālō atu kiate kimoutolu ʻi hoʻomou ʻi hení mo hoʻomou poupoú.
ʻOku fie fakamālō homau fāmilí ki he niʻihi tokolahi kuo nau tokoni ki hono tokangaʻi mo tauhi ʻemau tamaí. ʻOku mau fakamālō loto houngaʻia kia Palesiteni Henelī B. ʻAealingi mo Palesiteni Tieta F. ʻUkatofa. ʻOku mau fakamālō ki he mēmipa ʻo e Kōlomu ʻo e Toko Hongofulu Mā Uá ʻOku mau fakamālō foki ki he Kau Taki Māʻolunga mo e Kau ʻŌfisa ʻo e Siasí. He ʻikai ngalo e kau ngāue ʻi he ʻōfisi ʻo Palesiteni Monisoní mo e kau ngāue kehé. Ki he timi security ʻeku tamaí, kia Tracy Monson mo Dan Stephens, ʻi heʻena faifatongia fisifisimuʻa mo e tokanga makehé. ʻOku mau fakamālō makehe ki heʻene kau nēsí, tautautefito kia Sisitā ʻAlesa Uoka. ʻOku mau fakamālō ki he kau therapist tōnunga ʻeku tamaí, kau toketā nifó mo ʻene kau toketaá, kau ai ʻa Dr. Lāsolo Mekisuela. Kuo fakaofo hoʻomou tauhi taʻetūkua mo ʻofa naʻe faí.
ʻOku ou fie fakamālō ki hoku husepānití ko Roger, mo ʻema kiʻi fānau ʻi heʻenau poupoú lolotonga ʻeku tokoniʻi ʻeku tamaí, ko ʻenau kuitangatá ia.
Siʻeku Tamai ʻofeina, ko ha tāpuaki toputapu mo ha lāngilangi moʻoni, ke u tokangaʻi koe, ʻo hangē ko e kole ʻeku faʻē tōnungá. ʻOku ou ʻiloʻi naʻe “takatakaiʻi [kitaua] ʻe [he] kau ʻāngeló, ke poupouʻi hake [kitaua].”1
Fakaʻosí, ʻoku ou fie fakamālō atu kiate kimoutolu kāingalotu ʻo e Siasí. Naʻe hoko hoʻomou ngaahi lotu fakaʻaho ʻi he taʻu ʻe 54 naʻe hoko ai ʻeku tamaí ko ha ʻAposetolo, mo e Palesiteni ʻo e Siasí, ko ha tokoni lahi.
ʻOku ou fakamālō loto houngaʻia moʻoni he ʻahó ni ki heʻeku tamaí pea mo e tukufakaholo kuó ne fatú—ko ha tukufakaholo ʻo e ʻofá mo e tokoní. Neongo ko ha palōfita ʻeku tamaí, ka naʻá ne ʻiloʻi naʻe ʻikai ke ne haohaoa. Naʻá ne fakafalala loto fakatōkilalo ʻaki e kotoa ʻo hono lotó mo feinga ke hangē ko hotau ʻEiki mo e Fakamoʻui ko Sīsū Kalaisí. Meimei ʻi ha taʻu ʻe taha mei heni, naʻá ne ngāue ai ʻi hono ʻōfisí. Naʻe tuku fakaava pē ha tatau ʻo e makasini Enisgn, pea ʻasi hake ai hano tā. Naʻe tuhu ʻeku tamaí ki he taá mo ne pehē mai, “ʻOku ou ʻilo e tama ko eé. Naʻá ne feinga ke fai hono lelei tahá.”
Ko ha Tukufakaholo ʻo e ʻOfá
Naʻe hanga ʻe Palesiteni Monisoni, ʻi heʻene “feinga pē ke fai hono lelei tahá,” ʻo tuku mai ha tukufakaholo fakangalongataʻa ʻo e ʻofá. Naʻá ne ʻofa ki he ʻEikí mo e kakaí. Naʻá ne vakai ki he meʻa te tau lavá mo ne tui fakamātoato te tau lava ʻo liliu mo fakalakalaka tuʻunga ʻi he Fakalelei ʻa Sīsū Kalaisí.
Naʻá ne ʻofa ʻi heʻene ongomātuʻá, fototehiná mo hono kāingá. Naʻá ne ʻofa ʻi hono hoa ʻofeina taʻengatá—ʻa e fefine fakaʻofoʻofa, anga fakalongolongo, poupou mo fakalotolahi ko Frances. Naʻá ne ʻofa ʻi hono fāmilí pea mo ʻene kau faifekau ʻi he fakahahake ʻo Kānatá. Kae tautefito ʻene ʻofá ki hono makapuná. Neongo ʻene femoʻuekiná, ka naʻá ne fatu ha ngaahi manatu melie taʻefaʻalaua mo kinautolu. Naʻá ne tokanga moʻoni ki heʻenau moʻuí.
Naʻe ongoʻi foki ʻe he sola mo e vūlangi e ʻofa ʻa Palesiteni Monisoní. ʻI ha taimi ʻe taha, lolotonga ʻene ʻaʻahi ki ha fale toulekeleka, naʻá ne lulululu ai mo ha tangata ʻi ha saliote teketeke. Naʻe sio hake e tangatá mo ne pehē ange, “Palesiteni Monson, kuó ta lulululu ka ʻoku ou fie maʻu ke ta fāʻofua.” Naʻe ʻikai hano taimi, kuo punou hifo ʻa Teti mo fāʻofua loto ʻofa ki he tangatá.
Naʻe faʻa leaʻaki ʻe heʻeku tamaí e fekau maʻongoʻonga ko ia ʻa e Fakamoʻuí:
“Ke ke ʻofa ki ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa.
“Ko e ʻuluaki pea ko e lahi ia ʻo e fekaú.
“Pea ko hono ua ʻoku tatau mo iá, Ke ke ʻofa ki ho kaungāʻapí ʻo hangē pē ko koé.2
Naʻá ne fili foki ke moʻuiʻaki e fekau ko ʻení he ʻaho kotoa pē.
Ko ha Tukufakaholo ʻo e Tokoní
Naʻe tohi ʻe he tangata Pilitānia faʻu faiva ko William Shakespeare ʻi he The Two Gentlemen of Verona ʻo pehē: “ʻOku ʻikai ke ʻofa moʻoni e kakai ia ʻoku ʻikai ke fakahaaʻi ʻenau ʻofá.” 3 Ne mahino lelei ʻeni ki heʻeku tamaí pea naʻá ne fakahaaʻi ʻene ʻofa ki he niʻihi kehé ʻaki ʻene muimui ki he sīpinga ʻa e Fakamoʻuí: “[Naʻá Ne] feʻaluʻaki ʻo fai lelei, … he naʻe ʻiate Ia ʻa e ʻOtuá.” 4 Ko e moʻui kotoa ʻeku tamaí naʻá ne fakaʻaongaʻi ia ʻo tokoni ki he niʻihi kehé.
Ne u faingamālie ke feʻao mo ʻeku tamaí ʻi ha konga lahi ʻo ʻene ngaahi ʻaʻahi fakatāutahá. Ne ma ʻaʻahi maʻu pē ki hano kaumeʻa fuoloa, ko e tangata taʻu 98 ko ʻEletā Keleni R. Luti. Naʻe ʻi ai ha taimi ne fuoloa ai ke ma toe ʻaʻahi ki ai. Naʻe tali ʻe ha sekelitali ʻi he ʻōfisi ʻeku tamaí ha telefoni meia ʻEletā Luti he ʻaho ʻe taha. Naʻá ne fehuʻi ange, “ʻOku kei ʻalu koā ʻa Palesiteni Monisoni ia ʻo ʻaʻahi ki he mahakí, faingataʻaʻiá mo e toulekelá? Kapau ko ia, ʻoku ou kau ai!” Ne ma ʻaʻahi leva ki ai ʻi hono ʻapí. Hili ʻema ʻaʻahí, naʻe tafoki malimali mai ʻa Teti ʻo pehē mai, “ʻEni, ʻoku ou ongoʻi kuó ta fai ha lelei lahi he ʻahó ni.”
Naʻe faʻa mahulu hake e holi ʻeku tamaí ke tokoniʻi e niʻihi kehé, ʻi he meʻa naʻá ne lavá, neongo e fele-mo-fafo hono ngaahi fatongiá. Ka naʻe ʻikai tuka ai, naʻá ne maʻu ha founga: naʻá ne fakaʻaongaʻi e niʻihi kehé ke nau fai ʻene tokoní. Naʻá ne telefoni mo ne fili ha niʻihi ʻo ne pehē ange, “Ko hoku kaumeʻa ʻeni ko Maká? ʻOku fakaofo ʻaupito ʻeni. ʻOkú ke fie fai ha meʻa lelei he ʻahó ni ke ke fiefia ai?” Naʻe ʻuhinga iá, naʻe fie kole ange ʻe Palesiteni Monisoni ke ne “fai ha tokoni maʻana” Naʻe fiefia ʻaupito ʻa “Maka” ke tokoni.
ʻOku ʻikai fie maʻu ia ke tau hoko ko e Palesiteni ʻo e Siasí ka tau toki fakatokangaʻi e fie maʻu ʻa ha taha mo “fai ha meʻa lelei ke tau fiefia ai.” Naʻe ngāueʻi maʻu pē heʻeku tamaí ʻene faʻa ongoʻi, “Ko e meʻa lelei ia ke fai,” peá ne toki ʻilo ai ko e tali ia ki ha lotu ʻa ha taha. ʻI heʻetau muimui ki he ngaahi ueʻi ʻa e Laumālié, ʻe lava ke hoko ʻetau fanga kiʻi tokoni faingofuá ko ha tali ki ha lotu, pea te tau lava ʻo paotoloaki e tukufakaholo ko ʻeni ʻo e tokoni ki he niʻihi kehé.
ʻI ha taʻu ʻe taha mo e konga kuohilí, ne u ʻaʻahi ai mo ʻeku tamaí ki hano kaumeʻa fuoloa, naʻe taʻu 94 pea naʻe puke lahi.Naʻe lea leʻo lahi hifo ʻeku tamaí ʻo pehē ange, “Ko hoku kaumeʻa ʻeni ko Peleneti Koetí?” Naʻe ʻāʻā hake ʻa Brother Koeti mo ne feinga ke lea hake, “Tomu, naʻá ke haʻu. Fakaʻofoʻofa. Fakaʻofoʻofa.”
Naʻe pehē ange heʻeku tamaí, “Peleneti, ʻoku ʻikai ha feituʻu te u fie ʻi ai, ka ko ʻeni pē ʻi ho tafaʻakí. Ko e feituʻu ia ʻoku finangalo e ʻEikí ke u ʻi aí.” Naʻá na talanoa mo ʻeku tamaí ʻo hangē pē naʻe kei siʻí pea kei longomoʻui mo mālohi ʻa Peleneti; hili ia naʻá ne faingāue leva kia Brother Koeti. ʻI heʻema mavahe ʻo luelue atu ʻi he veʻehalá, naʻe pehē mai ʻeku tamaí, “Naʻe ʻomi ʻe he ʻEikí e lakanga fakataulaʻeikí ke mau tokoniʻi mo tāpuakiʻi ʻaki e niʻihi kehé. Ko ha tāpuaki moʻoni ke u ʻaʻahi mai ki hoku kaumeʻá ke ne ʻiloʻi ʻoku kei manatua pē ia. Ann, ʻoku ou ongoʻi kuó ta fai ha lelei lahi he ʻahó ni.” Naʻe malimali taʻetuku pē ʻeku tamaí he ʻaho ko iá. Naʻá ne mapumapu. Naʻá ne fiefia.
ʻI heʻeku siofi iá, ne u fakatokangaʻi ai naʻe ʻilo heʻeku tamaí e founga ke maʻu ai e fiefia moʻoní. Naʻe fakafou ʻi heʻene tokoni mateakí, ʻa ʻene ʻilo ʻoku maʻu e fiefiá ʻi he ʻofa ki he ʻEikí mo e tokoni ki ho kaungāʻapí. Te tau lava ʻo maʻu kotoa e fiefia ko ʻení. ʻOku ʻikai ha founga lelei ange ke fakalāngilangiʻi ai ʻeku tamaí ko e palōfitá pea mo hotau Fakamoʻui ko Sīsū Kalaisí, ka ko e moʻui he ʻaho kotoa pē ke aʻu ki he fakaʻosinga ʻo e ʻahó te tau lava moʻoni ʻo pehē, “ʻOku ou ongoʻi kuó u fai ha lelei lahi he ʻahó ni.”
ʻOku ʻi ai ʻeku fakamoʻoni. ʻOku moʻoni ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ou ʻilo ʻoku moʻui mo ʻofeina ʻe he ʻOtuá ʻEne fānaú. ʻOku ou fakamālō atu kiate kinautolu kotoa pē kuo nau ʻofeina mo fakalangilangiʻi ʻeku tamaí, ko Palesiteni Tōmasi S. Monisoni. ʻOfa ke hokohoko atu ʻetau muimui ki he palōfita ʻa e ʻEikí. ʻOfa ke tau tafoki kia Kalaisi, ko hotau ʻEiki haohaoa mo e Huhuʻí, ke Ne hoko ko hotau faʻifaʻitakiʻanga taʻengatá. ʻOku ou lotua fakamātoato ʻe ʻi ai ha ʻaho ʻe fanongo ai ʻeku tamaí mo kitautolu kotoa ʻi ha ʻaho ki he kupuʻi leá ni: “Mālō, ko e tamaioʻeiki lelei mo angatonu: … hū koe ki he fiefiaʻanga ʻo ho ʻeikí.”5
ʻOku ou fai ʻeni ʻi he huafa ʻo Sīsū Kalaisí, ʻēmeni.