Ko ha Palōfita Maʻa Hotau Kuongá
Fai ʻe Palesiteni Dieter F. Uchtdorf
Tokoni Ua ʻi he Kau Palesitenisī ʻUluakí
Ko ha lāngilangi moʻoni moʻoku e faingamālie ke u fai ai ha fakaʻapaʻapa kia Palesiteni Tōmasi S. Monisoni, ko ha palōfita ʻa e ʻOtuá pea mo haku kaumeʻa mamae.
ʻI he taimi pelepelengesí ni, ʻoku loloto ai e ngaahi ongo ʻo e lotó mo e fakakaukaú pea ʻikai ha lea feʻunga ke fakamatalaʻi ʻaki ʻeku ʻofá, houngaʻiá mo e mamahí.
ʻOku ou fie fakahaaʻi atu mo Harriet ʻema ongoʻi fiekaungāmamahi moʻoni mo e pōpoaki ʻofa mo houngaʻia ki he fāmilí pea mo kinautolu kotoa pē ʻoku ʻofa kiate iá, kae pehē ki he niʻihi tokolahi ne nau tauhi lelei iá. ʻOku ou fie fakahaaʻi ha loto houngaʻia moʻoni kia Ann Monson Dibb, ko e ʻofefine ʻo Palesiteni Monisoní. Hili e mālōlō e uaifi ʻofeina ʻo Palesiteni Monisoní ko Falanisisí, naʻe tukutaha ʻe ʻEni ʻene ngāue tokoni mateakí mo e ʻofá, kau ai mo hono ngaahi fototehiná ke faitāpuekina ʻa Palesiteni Monisoni ʻi he taimi fakatōtōlaʻā ʻo ʻene moʻuí.
Ko e tui matalaʻiʻakau engeenga e kau mēmipa ʻo e fāmilí ʻi heʻenau fakaʻapaʻapa ki he lanu ne manako taha ai ʻa Palesiteni Monisoní.
ʻOku ou ʻofa lahi kiate ia! Ne u lau ia ko haku kaungāmeʻa, neongo ne teʻeki ai ke ma maheni. ʻOku ou tui ko e taha kotoa pē naʻá ne ʻilo ia pe mamata kiate iá, neongo mei ha feituʻu mamaʻo, ne nau lau ia ko hanau kaungāmeʻa.
ʻI heʻeku folaua mo Sister Uchtdorf e māmaní, naʻe fakahaaʻi mai ʻe he kakaí honau ʻofa, houngaʻia mo ʻenau lotua honau palōfita ʻofeiná. Naʻe fakahoko mai e ongoʻi ʻofa ko ʻení mei he kau talavoú, toulekeleká mo e toʻu kotoa pē.
Naʻe hoko ʻa Palesiteni Monisoni ko ha tangata naʻe mohu talēniti ʻi ha faʻahinga meʻa lahi, pea mo ha tangata fonu laumālieʻia. Naʻe mohu ʻilo, tui, ʻofa, vīsone, fakamoʻoni, lototoʻa mo manavaʻofa—ʻo ʻikau ʻaupito ke ne taki mo ngāue mei ha tuʻunga māʻolunga ange, ka ʻi he tuʻunga fakatāutaha. Naʻá ne maʻu ha ongo makehe ʻi hono lotó ki he masivá mo e faingataʻaʻiá. Te tau ʻofa ki hono leʻó, ki heʻene tuʻu maʻú, mo ʻene falala ki he ʻEikí, ʻene malimalí, ʻene tukuhuá, ʻene loto vēkeveká, ʻene fakatuʻamelié mo ʻene ngaahi talanoa ʻoku ou lau ko ha tala fakatātā mei ha palōfita ʻi onopooni ʻa e ʻOtuá.
Taʻu ʻe 24 kuohilí naʻe fakaafeʻi au mo Helieta ʻe Palesiteni Monisoni ki hono ʻōfisí ke uiuiʻi au ko ha Taki Māʻolunga ʻo e Siasí. Ne u feinga mo Harriet ke ma makupusi e momeniti mahuinga mo taukakapa ko iá ʻi heʻema moʻuí.
Ka naʻe hanga ʻe he ongoʻi loto māfana, tokanga fakatāutaha, fakalotolahi, ʻene loto vēkeveke ki he ngāué mo e ngeia fakaepalōfita ʻa Palesiteni Monisoní, ʻo fakanonga mo fakafiemālieʻi kimaua. Ne ma ongoʻi ne ma ʻi he lotolotonga ʻo ha taha naʻá ne ʻiloʻi e Fakamoʻuí, ko ha taha ʻo ʻEne kau tamaioʻeikí, ko ha taha naʻe ʻafioʻi ʻe heʻetau Tamai Hēvaní.
Naʻe faitāpuekina makehe ʻa Siamane ʻe Palesiteni Monisoni. Naʻe tokoni ʻene tui mālohí ke fakamālohia kimautolu lolotonga e ngaahi taʻu ʻo e Cold War. Naʻe ʻikai ngata pē heʻene ʻomi ha ʻū katoleta vala mo ha ngaahi meʻa kehe maʻá e kāingalotu ʻi Siamane Hahaké, ka naʻá ne fai ha talaʻofa ʻi he lotu fakaeʻaposetolo naʻá ne fai he 1975, ha tāpuaki fakalaumālie. Naʻe foki mai ʻa Palesiteni Monisoni mo ʻEletā Lāsolo M. Nalesoni he taimi ko iá, ʻo toe muimuiʻi e ngaahi talaʻofa naʻe faí. Naʻe fakahoko kinautolu ʻi he ngaahi taʻu kimui aí. Kuo lea ha palōfita ʻa e ʻOtuá pea naʻe fakaʻapaʻapaʻi ʻe he ʻOtuá e tui mo e ngāue ʻEne tamaioʻeikí.
ʻI heʻeku muimui folau mo Harriet kia Palesiteni Monisoni ki ha konifelenisi ʻi Hamburg, naʻá ne fehuʻi mai ʻo kau kia Maikolo Penitasi, ko ha palesiteni fakasiteiki mālōlō ka ʻoku pēteliake he taimí ni, ko e taha ia e kau paionia lototoʻa ʻo e Siasí ʻi Siamane. Naʻe puke lahi ʻa Brother Penitasi, tokoto fale pē pea ʻikai lava mai ki heʻemau ngaahi fakatahá. Ka naʻe fie ʻaʻahi ki ai ʻa Palesiteni Monisoni.
Ka naʻe toki tafa pē ʻa e vaʻe ʻo Palesiteni Monisoní pea faʻa mamahi ke ne tuʻuaki. Naʻe nofo ʻa Brother Panitsch ʻi he fungavaka nimá pea ʻikai ha ʻeleveita. Naʻe pau ke mau kaka he sitepú. Ka naʻe vilitaki pē ʻa Palesiteni Monisoni. Ko ia ne ma ō leva.
Ko ha kaka faingataʻa ia kia Palesiteni Monisoni, ka naʻá ne fai fiefia ia. Ne mau aʻu ki he tokoua puké pea ʻoange ʻe Palesiteni Monson ha tāpuaki fakataulaʻeiki fakaʻofoʻofa mo fakamālō ange ʻi heʻene moʻui mateakí mo ne fofonga fiefia ange ki ai.
Taimi kotoa pē ʻoku ou fakakaukau au ki he meʻá ni, ʻoku ou manatu ai ki he lea ʻa e ʻAposetolo ko Pitá ʻo kau kia Sīsuú, ko hono kaumeʻa mo e faiako: “[Naʻá Ne] feʻaluʻaki ʻo fai lelei.”1
Ko e lea tatau pē te tau fai ki he tangata ʻoku tau ʻofa, fakaʻapaʻapaʻi mo poupouʻi ko ha palōfita ʻa e ʻOtuá, ko hotau kaungāmeʻa pea ko ha kaungāmeʻa ʻo e ʻOtuá ko Tōmasi Sipenisā Monisoni.
Ko ha aʻusia fakafiefia mo fakalaumālie moʻoni ke hoko ko ha taha ʻo e ongo tokoni kia Palesiteni Monson ʻi he Kau Palesitenisī ʻUluaki ʻo e Siasí. Kuó u ʻinasi ai e fiefiá mo e loto mamahí, kakatá mo e mamahí, ngaahi fetalanoaʻaki mahuʻinga pea mo ha ngaahi momeniti fakalaumālie lahi ʻo hono ui fakaepalōfitá.
Kimuí ni mai, ʻi ha ʻamanaki ke ma mavahe mo Palesiteni ʻAealingi hili ʻema ʻaʻahi ki he ʻapi ʻo e palōfitá, naʻe taʻofi kimaua ʻe Palesiteni Monisoni peá ne pehē mai, “ʻOku ou ʻofa ki he Fakamoʻui ko Sīsū Kalaisí. Pea ʻoku ou ʻilo ʻokú Ne ʻofa mai kiate au.” Ko ha fakamoʻoni pelepelengesi mo ongo moʻoni ia ʻa ha palōfita ʻa e ʻOtuá.
Naʻe hoko moʻoni ʻa Palesiteni Monisoni ko ha palōfita maʻa hotau kuongá. Ko ha tangata naʻe fakatoukatea. ʻE kei tuʻuloa pē ʻa e meʻa kotoa ne tau ʻilo mo ʻofeina ai ʻa Palesiteni Tōmasi S. Monisoní. Kuo foki hono laumālié ki ʻapi ki he ʻOtua ko ʻetau Tamai Hēvaní, naʻá Ne foaki ange ʻa e moʻuí. “Ko e fē pē ha feituʻu te u fononga ai ʻi he māmani fakaʻofoʻofá ni, ʻe fononga maʻu pē mo au ha konga ʻo e kaungāmeʻa mamaé ni.”
ʻOku ou fie fakaaʻu ʻeku fakamāvae ʻofa ki hotau palōfita ʻofeiná: Mālō ʻaupito, Palesiteni Tōmasi S. Monisoni. ʻOfa ke ʻiate koe ʻa e ʻOtuá, ki ha taimi te tau toe feʻiloaki ai. ʻI he huafa ʻo Sīsū Kalaisí, ko hotau Fakamoʻui mo e Huhuʻí, ʻēmeni.